সাত ৰাজ্যৰ দলীয় নেতৃত্বৰে বাৰ্তালাপ প্ৰধানমন্ত্ৰী নৰেন্দ্ৰ মোদীৰ

দেশত কৰ’নাই সৃষ্টি কৰা জটিল পৰিবেশৰ সময়ত বিজেপিৰ কৰ্মীসকলে জনসাধাৰণক কৰা সহায় সহযোগিতাক বিশ্বৰ মজিয়ালৈ লৈ যাব দলটোৱে । প্ৰধানমন্ত্ৰী নৰেন্দ্ৰ মোদীয়ে এই ঘোষণা কৰি তাৰ বাবে ৰূপায়ণ কৰিবলগীয়া কাৰ্যৰ পৰামৰ্শ আগবঢ়ায় ৷ বিশেষকৈ তলাবন্ধৰ সময়ছোৱাত বিজেপিয়ে সেৱা হি সংগঠন(সেৱাই সংগঠন) অভিযান আৰম্ভ কৰে আৰু ইয়াৰ অধীনত ৰাইজৰ মাজত কৰ’নাৰ বিৰুদ্ধে সজাগতাৰ সৃষ্টিৰ উপৰি বিভিন্ন ধৰণে সহায় সহযোগিতা আগবঢ়ায়। এই অভিযান আগন্তুক দিনবোৰতো অব্যাহত থাকিব বুলি আজি অসমকে ধৰি দেশত সাতখন ৰাজ্যৰ দলীয় মুৰব্বীসকলে ভিডিঅ’ কনফাৰেঞ্চিঙৰ জৰিয়তে প্ৰধানমন্ত্ৰীক অৱগত কৰে ।

উক্ত অভিযানৰ বুজ লোৱাৰ উদ্দেশ্য আয়োজন কৰা এই ভিডিঅ’ কনফাৰেন্সিঙৰ শেষত মোদীয়ে দলৰ সকলো মণ্ডল, জিলা, ৰাজ্য আৰু শেষত ৰাষ্ট্ৰীয় সমিতিক ৰাইজক আগবঢ়োৱা সেৱা সম্বলিত এখন পুস্তিকা ডিজিটেল মাধ্যমত প্ৰকাশ কৰিবলৈ তেওঁ আহ্বান জনায়। এই পুস্তিকা প্ৰতাখন ৰাজ্যৰ ৰাজ্যিক ভাষাৰ লগতে হিন্দী আৰু ইংৰাজীত প্ৰকাশ কৰিব লাগিব। সদৌ শেষত অহা ২৫ ছেপ্তেম্বৰত পণ্ডিত দীনদয়াল উপাধ্যায়ৰ জন্মদিনটোত সমগ্ৰ দেশৰ তথ্য সম্বলিত এখন প্ৰতিবেদন ৰাষ্ট্ৰীয় স্তৰত প্ৰকাশ কৰা হ’ব । গতিকে তাৰ পূৰ্বেই মণ্ডল, জিলা আৰু ৰাজ্যিক সমিতিৰ নিজা নিজা দায়িত্ব সম্পূৰ্ণ কৰিব লাগিব। এই পুস্তিকা প্ৰকাশৰ বাবে এখন সম্পাদনা সমিতি গঠন কৰিবলৈও মোদীয়ে পৰামৰ্শ দিয়ে ৷

তেওঁ কয় “বিজেপিৰ কৰ্মকৰ্তাসকলে এই সংকটকালত ৰাইজক যি ধৰণে সেৱা আগবঢ়াইছে সেয়া মানৱ ইতিহাসৰ এক বৃহৎ কাৰ্য ৷ গতিকে ইয়াৰ তথ্য যুগমীয়া হৈ থাকিব লাগিব। সেয়ে পুস্তিকাবোৰ ডিজিটেল মাধ্যমত প্ৰকাশ কৰিব লাগিব । উল্লেখযোগ্য যে এই ভিডিঅ’ কনফাৰেন্সত অসমৰ মুখ্যমন্ত্ৰী সৰ্বানন্দ সোনোৱাল, মন্ত্ৰী ড° হিমন্ত বিশ্ব শৰ্মা,প্ৰাক্তন সাংসদ ৰমেন ডেকা, মন্ত্ৰী ভৱেশ কলিতা, ৰাজ্যিক বিজেপিৰ সাংগঠনিক সম্পাদক ফণীন্দ্ৰ নাথ শৰ্মা, সাংসদ দিলীপ শইকীয়া আদিয়ে অংশগ্ৰহণ কৰে ৷ অসমত দলে ৰাইজক কি দৰে সহায় সহযোগিতা আগবঢ়াইছে সেই ব্যাখ্যা দাঙি ধৰে জ্যেষ্ঠ নেতা বিজয় গুপ্তাই ।