গুৱাহাটী মহানগৰীৰ বৰঝাৰস্থিত লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰত আজি শুল্ক বিভাগে ৩৪ লক্ষাধিক টকাৰ চোৰাং বিদেশী চিগাৰেট জব্দ কৰিবলৈ সক্ষম হয়। আজি দিনৰ প্ৰায় ১২:৩০ বজাত বৰঝাৰ বিমানবন্দৰত গোপন সূত্ৰৰ পম খেদি ইতিমধ্যে সষ্টম হৈ থকা শুল্ক বিভাগে এখন বিমানৰ পৰা ৩৪ বাণ্ডিল বিদেশী চোৰাং চিগাৰেট জব্দ কৰে। উক্ত চোৰাং চিগাৰেটখিনি আইজলৰ পৰা স্পীড প’ষ্টত পাৰ্চেল যোগে আহিছিল।
কোনো দুষ্ট চক্ৰই ইয়াৰে ৩৪ বাণ্ডিল চিগাৰেটৰ ভিতৰত ৩১ বাণ্ডিল শ্ৰীনগৰলৈ আৰু বাকী ৩ বাণ্ডিল দিল্লীলৈ লৈ যোৱাৰ পৰিকল্পনা কৰিছিল। ৩৪ টা বাণ্ডিলত মুঠ ১৬,৩৮০ টা পেকেট চিগাৰেট আছে । উক্ত চোৰাং বিদেশী চিগাৰেট খিনিৰ বিদেশী বজাৰ মূল্য প্ৰায় ৩৪ লাখ ৭৬ হেজাৰ টকা। কোনখন বিমান যোগে উক্ত চিগাৰেট খিনি বৰঝাৰ বিমানবন্দৰলৈ আহিল সেই বিষয়ে শুল্ক বিভাগে সবিশেষ তথ্য প্ৰকাশ কৰা নাই ।
জানিব পৰা মতে সম্প্ৰতি জব্দকৃত বিদেশী চোৰাং চিগাৰেট খিনি বৰঝাৰ বিমানবন্দৰস্থিত শুল্ক বিভাগৰ ট্ৰেনজিত মেইল অফিচত ৰখা হৈছে আৰু এই সন্দৰ্ভত শুল্ক বিভাগে তদন্ত অব্যাহত ৰাখিছে। উল্লেখ্য যে, কিছুদিন পূৰ্বে বিমানবন্দৰটোত ২০ লক্ষাধিক মূল্যৰ বিদেশী চোৰাং চিগাৰেট জব্দ কৰা হৈছিল।