কেন্দ্রীয় চৰকাৰে চাকৰিয়ালসকলক অচিৰে সুখবৰ দিব পাৰে। চৰকাৰে কোম্পানীসমূহত কৰ্মৰত শ্রমিক-কর্মচাৰীক অধিক পাৰদৰ্শিতাৰে কৰ্মৰত হােৱাৰ বাবে সপ্তাহত চাৰিদিন কর্মদিন আৰু তিনিদিন ছুটী প্ৰদানৰ এক নিয়ম প্ৰৱর্তনৰ যাে-জা চলাইছে। অৱশ্যে ইয়াৰ ফলত কোম্পানীৰ কৰ্মচাৰীসকলে দীঘলীয়া ‘শ্বিফট’ত কৰ্মৰত হ’ব লাগিব পাৰে।
কেন্দ্রীয় শ্রম সচিব অপূর্ব চন্দ্ৰই প্ৰকাশ কৰা মতে, সপ্তাহত ৪৮ ঘণ্টা কৰ্মৰত হােৱাৰ নিয়ম অব্যাহত থাকিব যদিও কোম্পানীসমূহে তিনিটা শ্বিফটত কৰ্মচাৰীক নিয়ােগ কৰিব পাৰিব। ১২ ঘণ্টাৰ শ্বিফটত কাম কৰা কৰ্মচাৰীয়ে সপ্তাহত চাৰিদিন, ১০ ঘণ্টা শিফটত কাম কৰা ব্যক্তিয়ে সপ্তাহত পাঁচদিন আৰু আঠঘণ্টাৰ শ্বিফটত কৰ্মৰত ব্যক্তিয়ে সপ্তাহত ছদিন কাম কৰিব লাগিব।
অৱশ্যে তিনিটা শ্বিফটত কৰ্মচাৰীক নিয়ােগৰ ক্ষেত্ৰত কোম্পানীসমূহৰ ওপৰত কোনাে বাধ্যবাধকতা নাথাকিব। পৰিৱৰ্তিত কর্মসংস্কৃতিৰ প্রতি লক্ষ্য ৰাখি দেশৰ কোম্পানীসমূহত কাম-কাজৰ নিয়ম-নীতি সলনি কৰাৰ সিদ্ধান্ত লােৱা হৈছে বুলি শ্রম সচিবে সংবাদ মাধ্যমৰ আগত প্রকাশ কৰে। এই নিয়ম প্ৰৱর্তিত হলে কোম্পানীসমূহে চাৰি বা পাঁচদিনৰ কৰ্মৰত সপ্তাহ’ৰ বাবে চৰকাৰৰ পৰা অনুমতি লােৱাৰ প্ৰয়ােজন নাথাকিব।
যদিহে কোনাে কোম্পানীয়ে কর্মচাৰীক সপ্তাহত চাৰিদিন নিয়ােগ কৰিব বিচাৰে, তেন্তে উক্ত কর্মচাৰীক সপ্তাহত তিনিদিন ছুটী দিব লাগিব। একেদৰে পাঁচদিন কৰ্মচাৰীক নিয়ােগ কৰিলে দুদিন ছুটী দিব লাগিব। নতুন শ্রম আইন বলৱৎ কৰাৰ পাছত কোম্পানীসমূহে আঠৰ পৰা ১২ ঘণ্টাৰ কর্মদিন নির্বাচনৰ স্বাধীনতা লাভ কৰিব।
কোম্পানীসমূহে নিজৰ চাহিদা, উদ্যোগৰ ধৰণ আৰু অরস্থান অনুসৰি কর্মদিন স্থিৰ কৰিব পাৰিব। নতুন শ্রম আইন প্রৱর্তন হলে ব্যক্তিগত খণ্ডত কৰ্মৰত শ্রমিক-কর্মচাৰীসকলে মানসিক হেঁচাৰ পৰা মুক্ত হৈ কাম কৰাৰ সুযােগ লাভ কৰিব। বিশেষকৈ এই আইনে দেশৰ তথ্য প্রযুক্তি খণ্ডত কৰ্মৰত লােকসকলক উপকৃত কৰাৰ সম্ভাৱনা আছে।