Impact of Middle East war on India:
দৈনিক অগ্ৰদূত ডিজিটেল ডেক্স:-মার্কিন ৰাষ্ট্ৰপতি ড’নাল্ড ট্রাম্প আৰু ইজৰাইলৰ প্রধানমন্ত্রী বেঞ্জামিন নেতানিয়াহুৰ আঁকোৰগোঁজালিত সূত্রপাত ঘটা মধ্যপ্রাচ্য যুদ্ধৰ অশুভ প্রভাৱ পৰিছে বাতৰি কাকত আৰু অন্যান্য ছপা কর্মতো। এই ভয়াৱহ যুদ্ধৰ পৰিপ্ৰেক্ষিতত নিউজ প্রিন্টকে ধৰি মুদ্রণত ব্যৱহৃত সকলো সা-সামগ্রীত ২০ শতাংশ পর্যন্ত মূল্যবৃদ্ধি ঘটিছে। সম্প্রতি উন্নতমানৰ প্রিমিয়াম নিউজ প্রিণ্টৰ মূল্য প্রতি কিলোগ্রামত ৬৮.৩৫ টকাৰ পৰা ৭৫.৬০ টকালৈ বৃদ্ধি পাইছে। একেদৰে মধ্যমীয়া মানৰ নিউজ প্রিণ্টৰ মূল্য প্রতি কিলোগ্রামত ৫৮.৮০ টকাৰ পৰা ৬৮.২৫ টকালৈ আৰু তাতকৈ কম মানৰ নিউজ প্রিণ্টৰ মূল্য ১০ কিলোগ্রামত ৫১.৪৫ টকাৰ পৰা ৫৯.৮৫ টকালৈ বৃদ্ধি পাইছে। একেদৰে ছপাশালত ব্যৱহৃত চিয়াহীকে ধৰি অন্যান্য মুদ্রণ সামগ্ৰীৰো মূল্য কমেও শতাংশ পর্যন্ত বৃদ্ধি পাইছে। কাজেই ইয়ে ঘাইকৈ ছপা মাধ্যমৰ প্ৰতি প্রত্যাহ্বান কঢ়িয়াই আনিছে। অত্যধিক মূল্যবৃদ্ধিৰ হেঁচা এই খণ্ডই বহন কৰিবলগীয়া হোৱাৰ আশংকা প্রকট হৈছে। লক্ষ্যণীয় যে অনেক ব্যক্তিৰ সংস্থাপনৰ বাট মুকলি কৰা তথা গণতন্ত্ৰৰ চতুৰ্থ স্তম্ভৰ ভূমিকা পালন কৰি অহা সংবাদপত্ৰসমূহৰ সংকটক লৈ অসম চৰকাৰে গা এৰা দিয়াৰ আচৰণ কৰি আহিছে। বিগত ১২ বছৰে ৰাজ্য চৰকাৰে বিজ্ঞাপনৰ নিৰিখ বৃদ্ধি কৰা নাই; অথচ বিগত সময়ত নিউজ প্রিন্টকে ধৰি মুদ্ৰণত ব্যৱহৃত সকলো সামগ্ৰীৰ মূল্য কে’বাগুণে বৃদ্ধি পায়। তৎসত্ত্বেও ২০১৪ৰ পাছৰ পৰা ৰাজ্য চৰকাৰে বিজ্ঞাপনৰ নিৰিখ বৃদ্ধি কৰা নাই। কেৱল ভোট লাভেৰে ক্ষমতা দখলৰ অংকৰে এখনৰ পাছত আনখন বিনামূলীয়া আঁচনি ৰূপায়ণ কৰি অহা ৰাজ্য চৰকাৰে এক দশকৰো অধিক কাল ধৰি বাতৰি কাকতৰ বিজ্ঞাপনৰ নিৰিখ বৃদ্ধি নকৰাটো ৰহস্যজনক। এই সংক্রান্তত ইতিমধ্যে গুৱাহাটী উচ্চ ন্যায়ালয়ে নির্দেশো প্রদান কৰিছে যদিও চৰকাৰে তালৈ কাণসাৰ কৰা নাই।
