কেৱল অৰণ্যৰ সংকোচনেই নহয়, চহৰ আৰু পাৰ্শ্বৱৰ্তী অঞ্চলত বাসোপযোগী পৰিৱেশ দ্ৰুতগতিত ধ্বংস হোৱাৰ সময়ত বিগত সময়চোৱাত তেজপুৰ আৰু পাৰ্শ্বৱৰ্তী অঞ্চল সমূহত বিভিন্ন প্ৰজাতিৰ সাপ তথা অন্যান্য বন্য জীৱ মানুহৰ ঘৰৰ ভিতৰত প্ৰৱেশ কৰিছে ৷
উল্লেখযোগ্য যে, মানুহৰ ঘৰৰ ভিতৰত থকা নিগনি আৰু এন্দুৰ আদি খাদ্যৰ বাবেই এনেদৰে সাপে প্ৰৱেশ কৰাৰ লগতে খাদ্যৰ শংকটত পৰা বান্দৰে তেজপুৰ চহৰৰ লগতে বিভিন্ন অঞ্চলত সৰ্বসাধাৰণক অতিষ্ঠ কৰিছে ৷
যোৱা ছয় এপ্ৰিলৰ পৰা বৰ্তমানলৈকে তেজপুৰ আৰু কাষৰীয়া অঞ্চলত সৰ্পবান্ধৱ সৌৰভ বৰকটকীয়েই তেওঁৰ সৰ্পবান্ধৱ হিচাপে খ্যাত সহযোগীৰ সহায়ত উদ্ধাৰ কৰিছে ৫৪টা বন্যজীৱ ৷
উল্লেখযোগ্য যে, তেজপুৰ আৱৰ্তভৱন, কেতেকীবাৰী, বামপৰ্বতীয়া, কটনৰ’ড, গাভৰু শিৱমন্দিৰ, বাৰহলীয়া, সদৰ আৰক্ষী থানাৰ আৱাস, গাৰোৱানপট্টী, আই টি আই শিৱ মন্দিৰ, গেৰেকী, আৰক্ষী নাৱেশ, পিথাখোৱা, মাজগাঁও, মুঢ়াতেতেলী, ডেকাৰগাঁও আদি অঞ্চলৰ পৰা উদ্ধাৰ হোৱা এই বন্যজীৱ সমূহৰ ভিতৰত আছে বিষাক্ত ফেটী সাপ ১২ডাল, অজগৰ ১০ডাল, মোচোৰাগোম চাৰিডাল, বাকৰাজ ১০ডাল, তথা ধোৰাসাপ আৰু ইণ্ডো চাইনিজ মোছোৰাগোম আৰু মেকুৰী চকুৱা সাপ সহ আন ১০ডাল সাপ ৷
তদুপৰি এই সময়চোৱাতে উদ্ধাৰ কৰা হৈছে একোটা ফেঁচা,জহামাল,ঈগল আৰু পাঁচটা কেকোঁ৷উল্লেখযোগ্য যে,ইয়াৰে ভিতৰত একাধিক অজগৰৰ দৈৰ্ঘ ন ফুটৰ অধিক৷তদুপৰি,বিহগুৰি কলিতাগাঁৱৰ মনোজ কলিতাৰ কুকুৰা ফাৰ্মত উদ্ধাৰ হোৱা এটা অজগৰে ৫০টাৰ অধিক মুৰ্গী ভক্ষণ কৰিছিল ৷
এনেদৰে সাপ আৰু অজগৰ মানুহৰ ঘৰত উদ্ধাৰ হোৱা সন্দৰ্ভত অঞ্চল সমূহৰ ৰাইজে কয় যে সাপ আৰু অজগৰ তেজপুৰত পূৰ্বৰে পৰা বহু সংখ্যক আছে যদিওঁ আগতে ঘৰৰ বাৰীত তথা প্ৰাকৃতিক ক্ষেত্ৰত মাজে সময়ে দেখিবলৈ পোৱা গৈছিল ৷
ৰাইজে লগতে কয় যে,বৰ্তমান হোলা তথা পিতনি আদি নিঃশেষ হোৱাৰ লগতে একোখন মুক্ত বাৰীও নোহোৱা হোৱাত সাপে মানুহৰ ঘৰৰ ভিতৰত প্ৰৱেশ কৰিবলৈ লৈছে আশ্ৰয় আৰু খাদ্যৰ সন্ধানত৷বৰকটকীয়ে উদ্ধাৰ কৰা এইবোৰ জীৱ পাছত সমীপৰ নিৰাপদ প্ৰাকৃতিক আৱাস ক্ষেত্ৰ আৰু তেজপুৰৰ ভোমোৰাগুৰি সংৰক্ষিত বনাঞ্চলত মুকলি কৰি দিয়ে ৷
আনহাতে,যোৱা দীঘলীয়া সময় ধৰি বালিপৰা ভালুকপুং সংযোগী পথত বিশেষকৈ চাৰিদুৱাৰ অঞ্চলত এজাক বান্দৰক বহু সংখ্যক পথচাৰীয়ে বিভিন্ন খাদ্য দি আহিছে৷ক্ৰমশ মানুহৰ ওপৰত নিৰ্ভৰশীল হৈ পৰা এই বান্দৰ জাকে বালিপৰা,চাকিদুৱাৰৰ লগতে কাষৰীয়া বিভিন্ন অঞ্চলত উপদ্ৰৱ চলাই আহিছে ৷
এনে অৱস্থাত কৰ’নাকেন্দ্ৰীক পৰিস্হিতিৰ সময়ত পুৱাৰ পৰাই বহু লোকে বান্দৰ জাকক ফলমূলকে ধৰি বিভিন্ন বিস্কুট চানা আদি দিয়াৰ বিষয়ে প্ৰকাশ কৰি বৰকটকীয়ে কয় যে এনে অৱস্থাত কোনোবাই এই বান্দৰজাকক কিছু পৰিমানে ফলমূল দিছে য’দিও বিস্কুট আদি দিয়াটো একেবাৰে অনুচিত ৷
তদুপৰি,এনে কাৰ্যই বান্দৰ জাকৰ বন্য চৰিত্ৰ নোহোৱা কৰি মানুহৰ সমস্যাহে বৃদ্ধি কৰিব বুলি উল্লেখ কৰি বৰকটকীয়ে লগতে কয় যে বনাঞ্চলৰ সংৰক্ষণ আৰু খাদ্যৰ তথা ফলমূলৰ গছ বৃদ্ধিত বন বিভাগে গুৰুত্ব নিদিলে সমস্যাৰ সমাধান নহয়৷বৰকটকীয়ে চাৰিদুৱাৰ আৰু বালিপৰা সংৰক্ষিত বনাঞ্চলৰ বান্দৰক বিস্কুট আদি দিয়াটো বন্ধ কৰি তথা সৰ্বসাধাৰণক সজাগ কৰিবলৈ ইয়াত বনবিভাগে ফলক আৰিব লাগে বুলিও কয় ৷