ইউনিচেফৰ দ্বাৰা প্ৰকাশিত শেহতীয়া এক প্ৰতিবেদনৰ তথ্য অনুসৰি, সাম্প্ৰতিক বিশ্বত ১০ৰ পৰা ১৯ বছৰ বয়সীয়া প্ৰতি সাতগৰাকী শিশুৰ এটি মানসিক সমস্যাত আক্ৰান্ত হৈছে । ইউনিচেফৰ এই প্ৰতিবেদনত লগতে উল্লেখ কৰা অনুসৰি, ক’ভিড মহামাৰীয়ে শিশু আৰু কিশোৰৰ মানসিক স্বাস্থ্যত যথেষ্ট নেতিবাচক প্ৰভাৱ পেলাইছে । ক’ভিডৰ এই প্ৰভাৱ দীৰ্ঘদিনলৈ বৰ্তি থাকিব পাৰে বুলিও প্ৰতিবেদনটোত উল্লেখ কৰা হৈছে ।
শিশু আৰু কিশোৰে সাম্প্ৰতিক সময়ত সন্মুখীন হোৱা মানসিক সমস্যাৰ দিশটোৰ প্ৰতি বয়স্ক নাগৰিকসকলক লক্ষ্য ৰাখিবলৈকো আন্তৰ্জাতিক শিশু সংগঠনটোৱে আহ্বান জনাইছে । ইউনিচেফৰ মতে, শিশু আৰু কিশোৰক মানসিক সমস্যামুক্ত কৰাৰ ক্ষেত্ৰত প্ৰয়োজনীয় পদক্ষেপ গ্ৰহণ কৰা হোৱা নাই ।
সবাতোকৈ উদ্বেগজনক তথ্যটো হৈছে বিশ্বত প্ৰতি বছৰে প্ৰায় ৪৬ হেজাৰ শিশু আৰু কিশোৰে মূলত মানসিক সমস্যাৰ সন্মুখীন হৈ আত্মহনন কৰি আহিছে । কিন্তু ইয়াৰ পাছতো বিশ্বৰ শিশু আৰু কিশোৰে সন্মুখীন হোৱা মানসিক সমস্যাৰ প্ৰতি অভিভাৱকৰ লগতে বিশেষজ্ঞসকলৰ বিশেষ গুৰুত্ব আৰোপ নকৰাৰ অভিযোগ উত্থাপিত হৈ আহিছে । ইউনিচেফে এই প্ৰতিবেদনত ২১খন দেশৰ শিশু, কিশোৰ আৰু প্ৰাপ্তবয়স্কৰ মানসিক সমস্যাৰ সন্দৰ্ভত আলোকপাত কৰিছে । একেটা প্ৰতিবেদনতে উল্লেখ কৰা অনুসৰি বিশ্বৰ প্ৰতি পাঁচজন যুৱ প্ৰজন্মৰ এজনে প্ৰায়ে মানসিক সমস্যাত আক্ৰান্ত হোৱা বুলি স্বীকাৰ কৰিছে ।