সমগ্র বিশ্বৰ লগতে ভাৰতকো ক’ভিডে ভয়াৱহতাৰ মাজলৈ লৈ গৈছে। উদ্যোগ-বাণিজ্য খণ্ডক মাধমাৰ শােধােৱা অতিমাৰীৰ ফলত মানসিকভাৱেও বিপর্যস্ত হৈছে বৃহৎসংখ্যক লােক।
ক’ভিডে উদ্যোগ খণ্ডত প্রচণ্ড আঘাত শােধােৱাই কেৱল নহয়, ইয়াৰ মাৰাত্মক আক্ৰমণত মানসিকভাৱে দুৰ্বল হৈ পৰা ব্যৱসায়ীৰ আত্মহত্যাৰ ঘটনাও বৃদ্ধি পাইছে। এই ভয়াৱহ ছবি উন্মােচিত হয় চলিত সংসদৰ শীতকালীন অধিবেশনত।
ক’ভিডৰ ভয়াৱহতাত দেশজুৰি ক্ষুদ্র আৰু মজলীয়া উদ্যোগসমূহৰ মৃত্যু হ’বলৈ ধৰিছে। সংসদৰ চলিত অধিবেশনতে এই সম্পর্কীয় অত্যন্ত উদ্বেগজনক ছবি উন্মােচিত হৈছে।
কংগ্ৰেছ নেতা ৰাহুল গান্ধী আৰু তৃণমূলৰ অভিষেক বন্দ্যোপাধ্যায়ৰ প্রশ্নৰ উত্তৰত কেন্দ্রীয় ক্ষুদ্র আৰু মজলীয়া উদ্যোগ মন্ত্রণালয়ে দেশক প্ৰত্যাহ্বানৰ সন্মুখীন কৰা এই পৰিস্থিতিৰ বিষয়ে প্রকাশ কৰে।
বিৰােধীয়ে সমস্বৰে দাবী কৰে যে অতিমাৰীৰ এটাৰ পাছত আনটো ঢৌৰ আক্ৰমণত দেশৰ পৰা ৫৭ লাখ মজলীয়া উদ্যোগ বন্ধ হৈছে। কিয়নাে মন্ত্রণালয়ে দাঙি ধৰা তথ্য অনুসৰি, ক’ভিডৰ খুন্দাত দেশৰ প্রতি এশটাৰ ভিতৰত নটা অর্থাৎ ন শতাংশ অতি ক্ষুদ্র,ক্ষুদ্র আৰু মজলীয়া শ্ৰেণীৰ উদ্যোগ প্রতিষ্ঠানত তলা ওলমিছে।
তদুপৰি চৰকাৰে দাঙি ধৰা আন এক ভয়াৱহ তথ্য অনুসৰি, ২০১৯ৰ তুলনাত ২০২০ত অর্থাৎ দেশক ক’ভিডে আক্রান্ত কৰা বৰ্ষত ব্যৱসায়ীসকলৰ আত্মহত্যাৰ সংখ্যা বৃদ্ধি পাইছে। ৰাহুল গান্ধীৰ লিখিত প্রশ্নৰ উত্তৰত কেন্দ্রীয় ক্ষুদ্র আৰু মজলীয়া উদ্যোগ মন্ত্রী নাৰায়ণ ৰানেই কয় যে ৰাষ্ট্ৰীয় অপৰাধ ৰেকর্ড ব্যুৰ’ (এন চি বি)ৰ তথ্য অনুসৰি, ২০১৯ত দেশত ৯,০৫২ জন ব্যৱসায়ীয়ে আত্মহত্যা কৰিছিল।
২০২০ত এই সংখ্যা ১১,৭১৬ লৈ বৃদ্ধি পায়। অৱশ্যে ইয়াৰ ভিতৰত কিমানজন ক্ষুদ্র-মজলীয়া ব্যৱসায়ী সেই হিচাপ এন চি আৰ বিত নাই। একেদৰে তৃণমূল সাংসদৰ প্ৰশ্নৰ উত্তৰত মন্ত্রীয়ে জনােৱা মতে,ক্ষুদ্র-মজলীয়া ব্যৱসায়ীৰ আত্মহত্যাৰ হিচাপ নাৰাখে মন্ত্রণালয়ে।
অৱশ্যে চৰকাৰে কয় যে ২০১৯ৰ তুলনাত ২০২০ত অর্থাৎ ক’ভিডৰ বৰ্ষত ব্যৱসায়ীৰ আত্মহত্যাৰ সংখ্যা বৃদ্ধি পাইছে। চৰকাৰৰ বক্তব্য অনুসৰি, ক’ভিড পৰিস্থিতিত তলাবন্ধৰ পাছত ৰাষ্ট্রীয় ক্ষুদ্র উদ্যোগ নিগমে দেশজুৰি এটি অনলাইন সমীক্ষা চলাইছে।
ইয়াত প্রকাশ পায় যে ৯১ শতাংশ ক্ষুদ্র আৰু মজলীয়া উদ্যোগ চলি থাকিলেও ন শতাংশ বন্ধ হৈছে। কংগ্ৰেছৰ দাবী অনুসৰি, দেশত আছে প্রায় ৬.৬৩ কোটি ক্ষুদ্র আৰু মজলীয়া উদ্যোগ। সেয়েহে চৰকাৰী হিচাপ অনুসৰি ইয়াৰ ভিতৰত ৫৭ লাখ উদ্যোগ প্রতিষ্ঠানৰ দুৱাৰ বন্ধ হৈছে।
ৰাহুলে আনহাতে প্রশ্ন কৰিছিল যে কেন্দ্রই ক্ষুদ্র-মজলীয়া উদ্যোগৰ বাবে কি কৰিছে। অভিষেকৰ প্রশ্ন আছিল যে চৰকাৰৰ ব্যৱস্থাৱলীত কিবা লাভ হৈছে নে ? কিয়নাে মােদী চৰকাৰে কৰা দাৰী অনুসৰি, তলাবন্ধ সময়ৰ পৰাই ক্ষুদ্র-মজলীয়া উদ্যোগৰ বাবে ঋণৰ যােগান, ঋণৰ গেণ্টিৰ দৰে বিভিন্ন পদক্ষেপ লােৱা হৈছে।
ৰাহুলৰ প্ৰশ্নৰ উত্তৰত চৰকাৰে কয় যে ক’ভিডৰ আঘাতত ঋণ পৰিশােধ কৰিব পৰা নাই ক্ষুদ্র আৰু মজলীয়া উদ্যোগ প্রতিষ্ঠানে। ফলত এই খণ্ডত অনুৎপাদক সম্পদ (এনপিএ)ৰ পৰিমাণ বৃদ্ধি পাইছে।
ক’ভিডৰ পূৰ্বৱর্তী বিত্তীয় বৰ্ষত অর্থাৎ ২০১৯-২০ৰ শেষত ক্ষুদ্র-মজলীয়া প্ৰতিষ্ঠানৰ বাবে মুদ্রা ঋণত অনুৎপাদক সম্পদৰ পৰিমাণ আছিল ২২ হেজাৰ কোটি টকা। ক’ভিডৰ সময়ছােৱাত ২০২০-২১ৰ শেষত ৩৪ হেজাৰ কোটি টকাৰ অধিক হৈছে।
বিৰােধীৰ অভিযােগ অনুসৰি, মােদীৰ শাসনকালত মূল্যবৃদ্ধিৰ ফলত সাধাৰণ মানুহৰ দৰে বিধ্বস্ত হৈছে ক্ষুদ্র-মজলীয়া উদ্যোগ। দেশৰ ১৭০টা এনে উদ্যোগ সংগঠনৰ ঐক্যমঞ্চই কেঁচা সামগ্ৰীৰ মূল্যবৃদ্ধিৰ প্ৰতিবাদত অহা ২০ ডিচেম্বৰত উৎপাদন বন্ধ ৰখাৰ আহ্বান জনাইছে।
ইয়াৰ ফলত প্রায় ৩০ হেজাৰ কোটি টকাৰ লােকচান আৰু আয় ক্ষতিগ্রস্ত হ’লেও ক্ষুদ্র-মজলীয়া উদ্যোগে এই পথত খােজ কাঢ়িবলৈ বাধ্য হৈছে বুলি তেওঁলােকে দাবী কৰিছে। বিৰােধীসকলৰ মতে, এই ছবিখনে দাঙি ধৰে যে মােদী চৰকাৰে ক’ভিডৰ ক্ষতিপূৰণৰ বাবে দিয়া দৰবৰ কোনাে ফল নধৰিল।
মন কৰিবলগীয়া যে বিৰােধী মৰ্চা গঠনক লৈ কংগ্ৰেছৰ স’তে এতিয়া তৃণমূল প্রায় প্রতিদিনে দ্বন্দ্ব অব্যাহত আছে। বিজেপিৰ বিৰুদ্ধে নিষ্ক্রিয় ভূমিকা গ্রহণ কৰা বুলি তৃণমূলে প্রতিদিনেই কংগ্ৰেছক আক্রমণৰ লক্ষ্য কৰি তােলাৰ বিপৰীতে তৃণমূলে বিজেপিক সুবিধা কৰি দিয়া বুলি কংগ্ৰেছে অভিযােগ কৰিছে।
এই পৰিস্থিতিত অৱশ্যে ৰাহুল গান্ধী আৰু অভিষেক বন্দ্যোপাধ্যায়ে প্রায় একেসুৰীয়া প্রশ্ন কৰে চৰকাৰক। ৰাহুলৰ প্রথম প্রশ্ন আছিল ক্ষুদ্র আৰু মজলীয়া ব্যৱসায়ীৰ আত্মহত্যাৰ বিষয়ে চৰকাৰ অৱগত নে?
অভিষেকে প্রশ্ন কৰিছিল এইসকলৰ ক্ষতিপূৰণ সম্পর্কীয়। ইয়াৰ উত্তৰতে পােহৰলৈ আহে। ক’ভিডৰ আক্ৰমণৰ আন এক নির্মম ছবি।