AAP Pressmeet:
ৰাজ্যত শেহতীয়াকৈ বিভিন্ন বিভাগৰ কৰ্মচাৰী সকলে দৰমহাৰ অভাৱত ৰাজপথত আন্দোলন কৰিব লগা ঘটনাই ভাৰতীয় জনতা পাৰ্টীৰ শাসনত থকা মুখ্যমন্ত্রী হিমন্ত বিশ্ব শৰ্মা চৰকাৰৰ চূড়ান্ত ব্যৰ্থতাৰ দিশটো উন্মচিত কৰিছে। অসম চৰকাৰে প্ৰতি মাহে হাজাৰ কোটি টকাৰ ঋণ লৈ থকাৰ পাছতো চৰকাৰী কৰ্মচাৰী সকলক সময়মতে দৰমহা প্ৰদান কৰিব নোৱাৰা বিষয়টোক আজি আপ অসমে কঠোৰ ভাষাৰে নিন্দা কৰিছে।
ৰাজ্য চৰকাৰৰ বিভিন্ন বিভাগৰ কৰ্মচাৰী সকলক অসম চৰকাৰে দৰমহা প্ৰদান কৰিব নোৱাৰা বিষয়টোৰ সন্দৰ্ভত আজি আপ অসমৰ ৰাজ্যিক মুখ্য কাৰ্যালয়ত এখনি সংবাদমেল সম্বোধন কৰি আপৰ ৰাজ্যিক মুখপাত্ৰ সুশান্ত কুমাৰ নাথে কয় যে, অসমৰ ইতিহাসত সৰ্ববৃহৎ পৰিমাণে ঋণ লোৱা চৰকাৰে কি কাৰণত নিম্নোক্ত বিভাগৰ কৰ্মচাৰী সকলক দৰমহা প্ৰদান কৰিব পৰা নাই৷
অসম চৰকাৰৰ অধীনত একাংশ কৰ্মচাৰীয়ে দৰমহা লাভ নকৰা বিভাগ সমূহ হ’ল:
১/কৃষি বিপনন পৰিষদ: ৭ শ কৰ্মচাৰীয়ে বিগত ৮ মাহে লাভ কৰা নাই দৰমহা
২/ পঞ্চায়ত আৰু গ্ৰামোন্নয়ন বিভাগ: ২১ শতকৈও অধিক কৰ্মচাৰীয়ে বিগত ১৪ মাহে লাভ কৰা নাই তেওঁলোকৰ দৰমহা ।
৩/ উন্নয়ন প্ৰাধিকৰণ বিভাগ: শ শ কৰ্মচাৰীয়ে যোৱা ৭০ মাহ প্যৰ্যন্ত লাভ কৰা নাই দৰমহা।
৪/ শিক্ষা বিভাগৰ সৰ্ব শিক্ষাৰ অধীনৰ কৰ্মচাৰী সকলৰ দৰমহাৰ পইচা চৰকাৰে মুকলি কৰি দিয়া নাই বাবেই ২৫ হাজাৰ ঠিকাভিত্তিক শিক্ষকে লাভ কৰা নাই দৰমহা।
৫/ শিক্ষা বিভাগৰ ষ্টেট পুলৰ ১০ হাজাৰ কৰ্মচাৰীয়ে বিগত বহু মাহ লাভ কৰা নাই দৰমহা ৷
৬/ মধ্যাহ্ন ভোজনৰ কৰ্মচাৰী সকলেও বহু মাহে লাভ কৰা নাই মাত্র ১৫০০ শ টকাৰ নূন্যতম দৰমহা ৷
ইয়াৰ উপৰিও ১ লাখ নিযুক্তিৰ ভিতৰত নিযুক্তি লাভ কৰা আৰোগ্য মিত্ৰ সকলেও আজিলৈকে নিজৰ দৰমহাৰ সম্পূৰ্ণ অংশ লাভ কৰা নাই।
দূর্ভাগ্যজনক কথাটো হ’ল যে, ৬,৮০০ পৌৰ কৰ্মচাৰীয়ে এই চৰকাৰৰ দিনত ২০২২ চনলৈ মুঠ ৩ বছৰৰ দৰমহা লাভ নকৰাকৈও থাকিব লগা হৈছে। ক’ভিদৰ সময়ত বৰ্তমানৰ মুখ্যমন্ত্ৰী আৰু সেই সময়ৰ ৰাজ্যৰ স্বাস্থ্য মন্ত্ৰী হিমন্ত বিশ্ব শৰ্মাই দিয়া প্ৰতিশ্ৰুতি সোঁৱৰাইদি অসমত ক’ভিড চিকিৎসা সেৱাত কৰ্মৰত হোৱা ক’ভিদৰ চাফাই কৰ্মী সকল চাকৰি প্ৰতিশ্ৰুতি অনুসৰি কিয় আজিলৈকে নিয়মীয়াকৰণ কৰা নহল বুলিও আজিৰ এই সংবাদমেলত চৰকাৰক তীক্ষ্ন ভাৱে প্ৰশ্ন কৰে আপ অসমে।
সিফালে চৰকাৰৰ বিভিন্ন কামত নিজৰ জীৱন কিম্বা পৰিয়ালকো আওকাণ কৰি চৰকাৰ প্ৰতিটো নিৰ্দেশ পালন কৰি চৰকাৰী কামত নিয়োজিত হৈ অহা আশা কৰ্মী অংগনৱড়ী কৰ্মী আৰু মধ্যাহ্ন ভোজনৰ কৰ্মচাৰী সকলক চৰকাৰে প্ৰতিশ্ৰুতি ৰক্ষা কৰি তেওঁলোকৰ অতি নূন্যতম দৰমহা খিনিও প্ৰদান কৰাত কিয় ব্যৰ্থ হৈছে বুলি প্ৰশ্ন কৰা লগতে এই সকল কৰ্মচাৰীৰ দৰমহা কেতিয়া বৃদ্ধি হব বুলি আজিৰ এই সংবাদমেলত চৰকাৰক প্ৰশ্ন কৰে “আম আদমি পাৰ্টী” অসমে।
লগতে ৰাজ্যৰ ভিন্ন বিভাগৰ কৰ্মচাৰী সকলৰ দৰমহা প্ৰদানত ব্যৰ্থ হোৱা আৰু প্ৰতিশ্ৰুতি অনুসৰি কৰ্মচাৰী সকলৰ দৰমহা বৃদ্ধিৰ বিষয়ত অতি চূড়ান্ত ভাবে ব্যর্থ হোৱা অসম চৰকাৰে প্ৰতি মাহে হাজাৰ হাজাৰ হাজাৰ কোটি টকাৰ ঋণ লৈ এই ধন ক’ত খৰচ কৰিছে বুলিও প্ৰশ্ন কৰে আপৰ নেতৃত্বই।
আজিৰ এই সংবাদমেলত ৰাজ্য চৰকাৰে বৰ্তমানলৈ এক লাখ বিৰাল্লিছ হাজাৰ কোটি টকাৰ ঋণ লোৱাৰ পাছতো বহুতো বিভাগত দৰমহা প্ৰদান কৰিব নোৱাৰা বিষয়টো এটা নুবুজা সাঁথৰ বুলি প্ৰকাশ কৰি আপ অসমৰ মুখপত্ৰ সুশান্ত কুমাৰ নাথে কয় যে, “ৰাজ্যত এতিয়া ৰাইজ গভীৰ চিন্তিত হৈছে। বজাৰত অনিয়ন্ত্ৰিত মূল্যবৃদ্ধি আৰু চৰকাৰৰ ঋণ লৈ ঘিঁউ খোৱাৰ প্ৰৱণতাৰে BJP চৰকাৰে অসমক শ্ৰীলংকাৰ দৰে আৰ্থিক অনাটনৰ পৰিবেশলৈ ঠেলি দি ৰাজ্যৰ আৰ্থিক অৱস্থাৰ প্ৰতি ভাবুকিৰ সৃষ্টি কৰি জনতাক দিনে দিনে এক অন্ধকাৰ ভৱিষ্যতৰ মুখলৈ ঠেলি দিছে বুলি অভিযোগ উত্থাপন কৰে।
শীঘ্ৰেই দৰমহা লাভ নকৰাকৈ থকা সকলো বিভাগৰ কৰ্মচাৰী সকলক দৰমহা প্ৰদানৰ কৰাৰ লগতে প্ৰতিশ্ৰুতি অনুসৰি অসম চৰকাৰক আশা কৰ্মী, মধ্যাহ্ন ভোজনৰ কৰ্মী আৰু অংগনৱাড়ী কৰ্মী সকলৰ দৰমহা বৃদ্ধি, আৰু ক’ভিদৰ চাফাই কৰ্মী সকলক নিয়মীয়া চৰকাৰী সংস্থাপন প্ৰদান কৰাৰ দাবী জনায় ৷
সংবাদ মেলত উপস্থিত থাকে আপৰ মুখপাত্র, জাম কুটুম, মনিৰত্নম ডেকা,আৰু ৰামা পৰিহাৰ ৷