Union Minister Sarbananda Sonowal receives First Mother Ship at Vizhinjam – India’s first deep water Container Transshipment Port:
কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আজি ভাৰতৰ প্ৰথম গভীৰ পানীৰ কণ্টেইনাৰ ট্ৰেন্সশ্বিপমেণ্ট বন্দৰ ভিজিঞ্জামত অভিযান আৰম্ভ হোৱা প্ৰথম মাডাৰশ্বিপ ‘এমভি চান ফাৰ্নাণ্ডো’ক আদৰণি জনায়। ৯,০০০ টি.ই.ইউ. পৰ্যন্ত ক্ষমতা থকা জাহাজখনে ভাৰতৰ প্ৰথম স্বয়ংক্ৰিয় বন্দৰটোত ডকিং কৰে। উক্ত অনুষ্ঠানটোত কেৰালাৰ মুখ্যমন্ত্ৰী পিনাৰী বিজয়নও উপস্থিত আছিল।
অনুষ্ঠানত ভাষণ প্ৰদান কৰি কেন্দ্ৰীয় মন্ত্ৰী সৰ্বানন্দ সোণোৱালে কয়, “ভাৰতৰ প্ৰথম গভীৰ পানীৰ আন্তঃৰাষ্ট্ৰীয় কণ্টেইনাৰ ট্ৰেন্সশ্বিপমেণ্ট টাৰ্মিনেল ভিজিঞ্জামত প্ৰথম মাডাৰশ্বিপৰ অভিযানে ভাৰতৰ সামুদ্ৰিক খণ্ডৰ বাবে এক ঐতিহাসিক মুহূৰ্তৰ সূচনা কৰিছে। এয়া মোদী চৰকাৰৰ ‘মেক ইন ইণ্ডিয়া’ পদক্ষেপৰ এক অনন্য নিদৰ্শন। ভাৰত চৰকাৰ, কেৰালা চৰকাৰৰ লগতে আদানি পোৰ্ট ছেজৰ মাজত ৰাজহুৱা-ব্যক্তিগত অংশীদাৰিত্বৰ সহযোগিতাই ভাৰতৰ সামুদ্ৰিক খণ্ডৰ বিকাশৰ বাবে এয়া এক নতুন দিগন্তৰ সৃষ্টি কৰিছে। প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বত ভাৰতে বন্দৰসমূহক সুসজ্জিত আৰু বিশ্বমানৰ সক্ষম কৰি তুলিছে।
‘মেক ইন ইণ্ডিয়া’ৰ দৃষ্টিভংগী পূৰণেৰে ভিজিঞ্জাম বন্দৰে প্ৰধানমন্ত্ৰী গতি শক্তি ৰাষ্ট্ৰীয় লজিষ্টিক নীতিৰ লগতে সামুদ্ৰিক অমৃতকাল ভিজন ২০৪৭ক গতিশীলতা দিছে। এই সাফল্যই দেশৰ বন্দৰ খণ্ডত এক নতুন যুগৰ আৰম্ভণি চিহ্নিত কৰিছে। একেই উদ্দীপনাৰে প্ৰধানমন্ত্ৰী নৰেন্দ্ৰ মোদীৰ দূৰদৰ্শী নিৰ্দেশনাত আমাৰ মন্ত্ৰালয়ে মহাৰাষ্ট্ৰৰ ৱধাৱনত অত্যাধুনিক বন্দৰ আৰু গালাথিয়া উপসাগৰত আন্তঃৰাষ্ট্ৰীয় কণ্টেইনাৰ ট্ৰেন্সশ্বিপমেণ্ট টাৰ্মিনেল (আইচিটিটি)কে ধৰি বৃহৎ বন্দৰ প্ৰকল্পসমূহৰ কাম মিছন মোডত কৰি আছে।
আন্তঃৰাষ্ট্ৰীয় জাহাজ পথৰ ওচৰত ভিজিঞ্জামৰ কৌশলগত অৱস্থানৰ ফলত জাহাজৰ বাবে পৰিবহণৰ সময় যথেষ্ট হ্ৰাস হয়, যাৰ ফলত ই সামুদ্ৰিক বাণিজ্যৰ বাবে এক গুৰুত্বপূৰ্ণ কেন্দ্ৰবিন্দু হৈ পৰিছে। ভিজিঞ্জাম আন্তঃৰাষ্ট্ৰীয় সাগৰীয় বন্দৰৰ বিকাশে বহু নিযুক্তিৰ সৃষ্টি, বাণিজ্য বৃদ্ধি আৰু বিনিয়োগ আকৰ্ষিত কৰি কেৰালাৰ অৰ্থনৈতিক বিকাশ বৃদ্ধি কৰিবলৈ সাজু হৈছে। ভিজিঞ্জাম আঞ্চলিক বাণিজ্যৰ বাবেও এক গুৰুত্বপূৰ্ণ মাধ্যম হ’বলৈ সাজু হৈছে, যিয়ে দক্ষিণ-পূব এছিয়া, মধ্য প্ৰাচ্য আৰু আফ্ৰিকাৰ মাজত বাণিজ্যৰ প্ৰৱেশদ্বাৰ হিচাপে কাম কৰিব পাৰিব।
ভাষণ প্ৰসংগত সৰ্বানন্দ সোণোৱালে লগতে কয়, প্ৰধানমন্ত্ৰী নৰেন্দ্ৰ মোদীৰ গতিশীল নেতৃত্বত ভাৰতে দেশৰ বন্দৰ খণ্ডৰ উন্নয়নৰ ক্ষেত্ৰত দ্ৰুতগতিত আগবাঢ়িছে। আমি অনাগত বছৰবোৰত শীৰ্ষ সামুদ্ৰিক বিশ্ব শক্তি হোৱাৰ লক্ষ্য ৰাখিছোঁ। ভিজিঞ্জাম বন্দৰৰ কাৰ্যকৰীকৰণে কলম্বো আৰু ছিংগাপুৰ ট্ৰেন্সশ্বিপমেণ্ট হাবৰ সৈতে প্ৰতিযোগিতাৰ সূচনা কৰিব আৰু ভাৰতৰ গুৰুত্ব বিশ্ব প্ৰেক্ষাপটত বৃদ্ধি কৰিব।
ভাৰত চৰকাৰে দেশৰ সামুদ্ৰিক খণ্ডক সুসজ্জিত কৰিবলৈ সাগৰমালা প্ৰকল্পৰ ক্ষিপ্ৰ ৰূপায়ণত যথেষ্ট গুৰুত্ব দিছে, ইয়াৰ অধীনত কেৰালাত ২৪,০০০ কোটিতকৈও অধিক মূল্যৰ প্ৰকল্প ৰূপায়ণ কৰা হৈছে। ভিজিঞ্জাম বন্দৰটোৱে বিশ্বৰ যোগান শৃংখলাৰ ব্যাঘাত হ্ৰাস কৰাৰ বাবে এক কাৰ্যকৰী বিকল্প আৰু মুখ্য জাহাজ পৰিবহণ লাইনৰ বিকল্প প্ৰদান কৰিব।