Destroyed NHs in Assam The government is busy only looting toll gates :
অসমৰ ৰাষ্ট্ৰীয় ঘাইপথসমূহৰ অধিকাংশই কেৱল জৰাজীৰ্ণ অৱস্থাৰ ফলতে যাতায়াতৰ অনুপযোগী হৈ থকা নাই। ইয়াৰ উপৰি পথবোৰত সুৰক্ষাৰ বাবে থাকিবলগীয়া অন্যান্য ব্যৱস্থাও পর্যাপ্ত নহয়। ইয়াৰ পৰিণতিতে বিপদসংকুলভাৱে চলি আছে যাতায়াত ব্যৱস্থা।
ৰাজ্যৰ পথ যোগাযোগ ব্যৱস্থাত সুৰক্ষাৰ নীতি সম্পৰ্কীয় পৰীক্ষণত পোহৰলৈ আহিছে এই উদ্বেগজনক তথ্য। ৰাষ্ট্ৰীয় ঘাইপথসমূহ মসৃণ হোৱাই নহয়, উপযুক্ত পোহৰৰ ব্যৱস্থাও থাকিব লাগে; কিন্তু অসমত যিদৰে পথৰ অৱস্থা জৰাজীৰ্ণ, তেনেদৰেই পোহৰৰ ব্যৱস্থাও অতি দুর্বল। সেইবাবে ৰাষ্ট্ৰীয় পথৰ বহু গুৰুত্বপূৰ্ণ অংশত সঘনে দুর্ঘটনা সংঘটিত হৈ আহিছে। ইয়াৰ ফলত বহু লোকৰ প্ৰাণহানি হৈছে।
অসমত ৰাষ্ট্ৰীয় ঘাইপথৰ দৈর্ঘ্য ১,০৭৭ কিলোমিটাৰ। ইয়াৰে মাত্র ১০৫ কিলোমিটাৰতহে সামান্য পোহৰৰ ব্যৱস্থা আছে। অথচ ৰাষ্ট্ৰীয় ঘাইপথত পোহৰৰ ব্যৱস্থা কিদৰে আৰু কোন কোন অংশত কৰিব লাগে সেই নিয়ম ৰাষ্ট্ৰীয় ঘাইপথ প্ৰাধিকৰণে নিৰ্ধাৰণ কৰি থৈছে। সেই অনুসৰি, টোল প্লাজা আৰু ইয়াৰ সংলগ্ন অংশ পথত, ট্রাক চলাচল কৰা পথৰ অংশ, বাছ চলাচল কৰা অংশ, ট্রাক আৰু বাছ ৰোৱা পথৰ অংশ, পথৰ ভাঁজ অংশ, পথৰ মাজতে থকা চ’ক, ছাৰ্ভিচ পথ, উৰণীয়া সেতু, উৰণীয়া সেতুৰ তলৰ যাতায়াত চলা অংশ আদিত পোহৰৰ ব্যৱস্থা থকাটো বাধ্যতামূলক।
এই অংশবোৰত পোহৰৰ ব্যৱস্থা কিমান উচ্চতাৰ পৰা কৰা হ’ব সেয়াও বিজ্ঞানসম্মতভাৱে নিৰ্ধাৰণ কৰা আছে। উদাহৰণ স্বৰূপে পথ বিভাজিত অংশ আৰু পথৰ মাজত থকা চ’ক অঞ্চলত ভূমিৰ পৰা ন্যূনতম ৫০ মিটাৰ ওপৰৰ পৰা পোহৰ ৰাস্তাত পৰিব লাগে। অসমত এই নিয়ম প্রয়োজন অনুসৰি প্ৰযোজ্য হোৱা নাই।
কেৱল মাত্ৰ গুৱাহাটীৰ জালুকবাৰীৰ পৰা খানাপাৰালৈহে ইয়াৰে কিছু নিয়ম পালন কৰা হৈছে। নিয়ম সম্পূর্ণ পালিত নোহোৱাৰ ফলত এই অংশত প্রায়ে দুর্ঘটনা হৈ আহিছে। পর্যাপ্ত পোহৰৰ অভাৱতে এনেবোৰ দুৰ্ঘটনা সংঘটিত হৈ থকা বুলি পৰিবহণ বিভাগে নিশ্চিত কৰিছে। গুৱাহাটীৰ পথৰ উক্ত অংশটোত যিখিনি ব্যৱস্থা গঢ়ি তোলা হৈছে তাৰ বাদে ৰাজ্যৰ আন কোনো স্থানতে এই সুবিধাবোৰ নাই।
উল্লেখ্য যে ইতিমধ্যে শীতৰ বতৰৰ আৰম্ভণি হৈছে। কুঁৱলী পৰিবলৈও ধৰিছে। কুঁৱলীৰ বাবে ৰাষ্ট্ৰীয় ঘাইপথত ৰাজ্যত দুর্ভাগ্যজনকভাৱে সঘনাই দুর্ঘটনা সংঘটিত হৈ আহিছে। এনে দুর্ঘটনাবোৰৰ বেছি ভাগৰে মূল কাৰণ হ’ল ৰাষ্ট্ৰীয় ঘাইপথত উপযুক্ত পোহৰৰ অভাৱ। ভঙা-ছিঙা ৰাস্তাৰ ওপৰত ভূতৰ ওপৰত দানহ পৰাৰ দৰে পোহৰৰ অভাৱে ৰাষ্ট্ৰীয় পথত যাতায়াত ব্যৱস্থা অতি বিপদসংকুল কৰি তুলিছে।
টোলগেটৰ নামত লুণ্ঠন চলোৱাত চৰকাৰ সিদ্ধহস্ত। ইয়াৰ বিপৰীতে পথ সুৰক্ষাত মুঠেও দায়বদ্ধ নহয়। প্রসংগক্রমে উল্লেখ্য যে অসমত থকা ৰাষ্ট্ৰীয় ঘাইপথৰ লগত তিনিটা সংস্থা জড়িত হৈ আছে। সেই অনুসৰি একাংশ পথ অসম চৰকাৰৰ লোকনিৰ্মাণ বিভাগৰ ৰাষ্ট্ৰীয় ঘাইপথ সংমণ্ডলৰ অধীনত পৰে। একাংশ পথৰ দায়িত্বত আছে ৰাষ্ট্ৰীয় ঘাইপথ আন্তঃগাঁথনি উন্নয়ন নিগম লিমিটেড। আনটো সংস্থা হ’ল ভাৰতৰ ৰাষ্ট্ৰীয় ঘাইপথ প্ৰাধিকৰণ। এই তিনিওটা সংস্থাই পথসমূহ সুৰক্ষাৰ বিষয়টোক প্রকৃতার্থক উপেক্ষা কৰি আহিছে।
প্রসংগক্রমে উল্লেখ্য যে ভাৰতৰ মুঠ ৰাষ্ট্ৰীয় ঘাইপথৰ ২৫,৪০০ কিলোমিটাৰত নিয়ম অনুসৰি পোহৰৰ ব্যৱস্থা আছে। তথ্য অনুসৰি, অসমৰ পথতে পোহৰৰ ব্যৱস্থাটো সর্বাধিক দুর্দশাগ্রস্ত অৱস্থাতে আছে।