Hemant Soren was sworn in as 14th CM of Jharkhand:
ইণ্ডি এলায়েন্স বহু কেই গৰাকী ৰথী-মহাৰথীৰ উপস্থিতিত বৃহস্পতিবাৰে ঝাৰখণ্ডৰ ১৪ সংখ্যক মুখ্যমন্ত্ৰী হিচাপে শপত গ্ৰহণ কৰে হেমন্ত সোৰেনে ৷ ৪৯ বছৰীয়া জনজাতীয় নেতা গৰাকীক মুখ্যমন্ত্ৰী হিচাপে শপত গ্ৰহণ কৰায় ঝাৰখণ্ডৰ ৰাজ্যপাল সন্তোষ কুমাৰ গংগৱাৰে।
ৰাঁচীৰ মোৰাবাদী খেলপথাৰত অনুষ্ঠিত এক অনুষ্ঠানত ৰাজ্যপাল গৰাকীয়ে শপত আৰু গোপনীয়তাৰ শপত গ্ৰহণ কৰায় সোৰেনক ৷ য’ত উপস্থিত থাকে কংগ্ৰেছৰ সভাপতি মল্লিকাৰ্জুন খৰ্গে, লোকসভাৰ বিৰোধী দলপতি ৰাহুল গান্ধী, পশ্চিম বংগৰ মুখ্যমন্ত্ৰী মমতা বেনাৰ্জী, সমাজবাদী পাৰ্টিৰ মুৰব্বী অখিলেশ যাদৱ,পঞ্জাৱৰ মুখ্যমন্ত্ৰী ভগৱন্ত মান,আপৰ মুৰব্বী অৰবিন্দ কেজৰিৱাল, ৰাঘৱ চাধা, সঞ্জয় সিং, বিহাৰৰ বিৰোধী দলপতি তথা আৰ জেডি নেতা তেজস্বী যাদৱ, ডি এম কে নেতা উধয়ানিধি ষ্টালিন আৰু কৰ্ণাটকৰ উপ -মুখ্যমন্ত্ৰী ডি কে শিৱকুমাৰ।
শপত গ্ৰহণ কৰাৰ পূৰ্বে কুৰ্তা আৰু পাইজামা পৰিহিত সোৰেনে জেএমএমৰ সভাপতি তথা তেওঁৰ পিতৃ প্ৰাক্তন মুখ্যমন্ত্ৰী শ্বিবু সোৰেনক সাক্ষাৎ কৰে। জেএমএমৰ নেতা গৰাকীৰ মুখ্যমন্ত্ৰী হিচাপে এইয়া চতুৰ্থটো কাৰ্যকাল। সদ্য সমাপ্ত বিধানসভা নিৰ্বাচনত বিজেপিৰ গামলিয়াল হেমব্ৰমক ৩৯,৭৯১টা ভোটৰ ব্যৱধানত পৰাস্ত কৰি হেমন্ত সোৰেনে বৰহাইটৰ আসনখন অক্ষুণ্ণ ৰাখিবলৈ সক্ষম হয় ৷
উল্লেখ্য যে ৮১ জনীয়া ঝাৰখণ্ড বিধানসভাত জেএমএম নেতৃত্বাধীন মিত্ৰজোঁটে ৫৬খন আসন লাভ কৰাৰ বিপৰীতে বিজেপি নেতৃত্বাধীন এনডিএ – এ লাভ কৰে ২৪ খন আসন।