Farmer purchase helicopters to apply fertilizers to their fields:
মানুহজনৰ নাম ড: ৰাজাৰাম ত্রিপাঠী, পেছাত এজন কৃষক। আন দহজন খেতিয়কৰ দৰে ৰাজাৰাম ত্রিপাঠীয়েও নিজৰ খেতিডৰালৈ চাই সেউজ, লহপহ ভৱিষ্যতৰ সপোন দেখিছিল। সফল কৃষক হোৱাৰ লক্ষ্যৰ বাবেই তেওঁ নিজৰ লাখটকীয়া দৰমহাৰ বেংকৰ চাকৰি এৰি দেহৰ ঘাম পানী কৰি কেৱল কৃষিকর্মতে নিজকে নিয়োজিত ৰাখিছিল। সেই ৰাজাৰামেই আজি নিজৰ কষ্ট আৰু সাধনাৰ বলত দেশৰ শ্রেষ্ঠ কৃষক হিচাপে পৰিচয় গঢ়িবলৈ সমর্থ হৈছে।
ভাৰত চৰকাৰৰ কৃষি আৰু খাদ্য পৰিষদ আৰু কৃষি মন্ত্রণালয়ৰ পৰা তেওঁ তিনিবাৰকৈ দেশৰ শ্রেষ্ঠ কৃষকৰ সম্মান লাভ কৰিছে। কেৱল সিমানেই নহয়, দেশৰ আটাইতকৈ ধনী কৃষকসকলৰ তালিকাৰ শীর্ষস্থানত থকা কৃষকসকলৰ ভিতৰত অন্যতম হিচাপে চিহিন্ত হৈছে চত্তীছগড়ৰ এই কৃষকজন।
চত্তীছগড়ৰ বাস্তাৰৰ বাসিন্দা ৰাজাৰাম ত্রিপাঠীৰ ককাদেউতাক এজন পৰিশ্রমী কৃষক আছিল। তেওঁৰ দেউতাকেও শিক্ষকতাৰ সমান্তৰালভাৱে বহু বিঘা মাটিত শাক-পাচলিৰ খেতি কৰিছিল। সেই সূত্রে শৈশৱৰ পৰাই খেতি পথাৰৰ স’তে চিনাকি আছিল ৰাজাৰাম। উত্তৰাধিকাৰীসূত্রে ৰাজাৰামে খেতি মাটিৰ লগতে পাইছিল পথাৰৰ প্ৰতি তীব্র মোহ।
বর্তমান তেওঁৰ তিনিখনকৈ কৃষিফার্ম আছে যাৰ মুঠ মাটিকালি ১০০০ একৰতকৈও বেছি। ৰাজাৰামে জানিবলৈ দিয়া মতে, তেওঁৰ কৃষি ফার্মখনত ৪০০টা পৰিয়ালে কাম কৰি আছে। দেশৰ এইগৰাকী ধনী কৃষকৰ উপাৰ্জনৰ প্ৰধান উৎস হৈছে জালকৰ খেতি।
নিজৰ অধিকাংশ কৃষিভূমিতেই তেওঁ জালুকৰ খেতি কৰিছে। ৰাজাৰামে জালুকৰ খেতি কৰিবলৈ বা জালুক গছবোৰ বগাই যাবলৈ যিবিলাক গছ ৰোপণ কৰিছে সেইবোৰ অতি মূল্যবান গছ। তেওঁ জালুক বগাবৰ বাবে অস্ট্রেলিয়ান চেণ্ডন নামৰ মূল্যবান গছবিধ ৰোপণ কৰিছে, যি গছৰ কাঠৰ মূল্য আন্তঃৰাষ্ট্ৰীয় বজাৰত অতি বেছি।
আনহাতে, নিজৰ ফাৰ্মত উৎপাদিত জালুক আদিৰ পেকেজিঙৰ বাবেও তেওঁৰ নিজঃ ইন্ডাস্ট্রি আছে।ৰাজাৰামে জানিবলৈ দিয়া মতে, সম্পূর্ণ জৈৱিকভাৱে এই খেতি কৰা বাবে আন্তঃৰাষ্ট্ৰীয় বজাৰত তেওঁৰ ফার্মত উৎপাদিত জালুকৰ বিশেষ চাহিদা আছে।
জানি আচৰিত হ’ব, ৰাজাৰামে জালুকৰ লগতে অন্যান্য ওষধি উদ্ভিদৰ খেতিৰ পৰা উপাৰ্জন কৰা ধনেৰে অলপতে এখন হেলিকপ্টাৰ ক্রয় কৰিছে। চাৰিখন আসনযুক্ত,সাত কোটিটকীয়া হেলিকপ্টাৰখন অৱশ্যে তেওঁ নিজৰ ভ্ৰমণৰ উদ্দেশ্যে নহয়, খেতি পথাৰত সাৰ আৰু ঔষধ ছাঁটিয়াবলৈহে ক্রয় কৰিছে।
তেওঁ কয় যে ইংলণ্ড আৰু জার্মানীত হেলিকপ্টাৰৰ জৰিয়তে ঔষধ আৰু সাৰ স্ত্ৰেৰ বাবে হেলিকপ্টাৰ ব্যৱহাৰ কৰা দেখিয়েই তেওঁ এই হেলিকপ্টাৰখন ক্রয় কৰাৰ সিদ্ধান্ত লয়। কৃষি পথাৰত সাৰ -ঔষধ প্রয়োগৰ লগতে অন্য এটা কাৰণতো তেওঁ হেলিকপ্টাৰখন ক্রয় কৰিছে বুলি জানিবলৈ দিয়ে। তেওঁকয় যে নৱপ্ৰজন্মৰ মাজত খেতিৰ প্রতি যাতে ইতিবাচক মনোভাৱ গঢ় লৈ উঠে, সেই উদ্দেশ্য লৈও হেলিকপ্টাৰখন ক্রয় কৰা হৈছে। সম্প্রতি তেওঁ হেলিকপ্টাৰ চালনাৰ প্রশিক্ষণ লৈ এই কামতো সিদ্ধহস্ত হৈ উঠিছে।