ABSU :বড়ো মাধ্যমৰ শিক্ষাৰ কে’বাটাও দাবী পূৰণৰ সিদ্ধান্ত চৰকাৰৰ
৩৫ খন আদর্শ বিদ্যালয়-৫৪ খন উচ্চতৰ মাধ্যমিকক উন্নীত কৰি পদ সৃষ্টিৰ সিদ্ধান্ত
বড়ো মাধ্যমৰ শিক্ষা ব্যৱস্থাৰ উন্নয়নক লৈ শুকুৰবাৰে অসম চৰকাৰে কে’বাটাও সিদ্ধান্ত গ্রহণ কৰছ। নিখিল বড়ো ছাত্ৰ সন্থা (এবছু) আৰু বড়ো সাহিত্য সভাৰ লগত জনতা ভৱনত শিক্ষামন্ত্রী ডাঃ ৰণোজ পেণ্ডৰে অনুষ্ঠিত এখন বৈঠকতে এনে সিদ্ধান্তবোৰ গ্ৰহণ কৰা হয়। প্রায় ডেৰ ঘণ্টাজুৰি চলা বৈঠকৰ সন্দৰ্ভত এবছুৰ সভাপতি দ্বীপেন বড়োৱে সদৰী কৰা অনুসৰি, চাহ বাগিচাৰ আর্হিত বিটিআৰতো ৩৫ খন আদর্শ হাইস্কুল স্থাপনৰ সিদ্ধান্ত বৈঠকত গ্রহণ কৰা হয়।
একেদৰে হায়াৰ ছেকেণ্ডাৰী পৰ্যায়ৰ ৫৪ খন শিক্ষানুষ্ঠানৰ বাবে সুকীয়া পদ সৃষ্টি কৰা হ’ব। বড়ো মাধ্যমৰ বাবে বিশেষ টে’ট অনুষ্ঠিত হ’ব বুলি বৈঠকতে সিদ্ধান্ত লোৱা হয় বুলি বড়োৱে সদৰী কৰে।
এই প্রসংগত তেওঁ কয়, ‘বড়ো শান্তি চুক্তি আৰু শিক্ষা সম্পর্কীয় কে’বাটাও দাবী পূৰণৰ বাবে যোৱা আঠ ডিচেম্বৰত আমি প্রতিবাদত বহিছিলো। তাৰ পাছত আমাক আলোচনালৈ মতা হয়।
আমাৰ দাবীৰ ভিতৰত আছে- অসম ন্যায়িক সেৱাৰ মূল পৰীক্ষাত বড়ো ভাষাক অন্তর্ভুক্ত কৰা, চি টে’টত বড়ো ভাষাক অন্তর্ভুক্ত কৰা, বড়ো মাধ্যমৰ বিটিআৰৰ অন্তর্ভুক্ত আৰু বাহিৰৰ শিক্ষানুষ্ঠানক প্রাদেশিকীকৰণ কৰা, ১০১ খন বড়ো মাধ্যমৰ হায়াৰ ছেকেণ্ডাৰী শিক্ষানুষ্ঠান উন্নীত কৰি পদ সৃষ্টি কৰা, ৩৫ খন বড়ো মাধ্যমৰ আদর্শ হাইস্কুল স্থাপন কৰা, বড়োলেণ্ড বিশ্ববিদ্যালয়ৰ এটা চৌহদ ওদালগুৰিত স্থাপন কৰা আৰু কে’বাখনো মহাবিদ্যালয়ত বড়ো মাধ্যমৰ পদ সৃষ্টি কৰা।’
এনে দাবীবোৰৰ ভিত্তিতে আজিৰ বৈঠকত উল্লিখিত দাবীবোৰ গ্ৰহণ কৰা হয় বুলি বড়োৱে সদৰী কৰে। তেওঁ লগতে কয় যে বড়োলেও বিশ্ববিদ্যালয়ৰ এটা চৌহদ ওদালগুৰিত স্থাপনৰ সিদ্ধান্ত গ্ৰহণ কৰি পাঁচটা বিভাগৰ বাবে পদ সৃষ্টি কৰা হ’ব বুলি শিক্ষামন্ত্রীয়ে বৈঠকত আশ্বাস প্রদান কৰে। তদুপৰি বৈঠকত অপ্রাদেশিকীকৃত শিক্ষানুষ্ঠানৰ পদ প্রাদেশিকীকৰণক লৈ হোৱা আলোচনাত ইতিমধ্যে গঠিত ৰাজ্য চৰকাৰৰ কেবিনেট উপ- সমিতিয়ে পদক্ষেপ গ্রহণ কৰিব বুলি শিক্ষামন্ত্ৰীয়ে আশ্বাস দিয়াৰ কথাও এবছুৰ সভাপতিজনে সদৰী কৰে।
আলোচনা ফলপ্রসূ বুলিও মন্তব্য কবে বড়োৱে।
https://x.com/DipenBoroBTR/status/1880261065591935227?ref_src=twsrc%5Etfw%7Ctwcamp%5Etweetembed%7Ctwterm%5E1880261065591935227%7Ctwgr%5E8d7e38815c78a4a58d21431a15b0bf31c0e3be31%7Ctwcon%5Es1_c10&ref_url=https%3A%2F%2Fpublish.twitter.com%2F%3Furl%3Dhttps%3A%2F%2Ftwitter.com%2FDipenBoroBTR%2Fstatus%2F1880261065591935227