Nagas continue to encroach on Assamese land:
সম চৰকাৰৰ দুৰ্বল ভূমিকাৰ সুযোগ লৈ চুবুৰীয়া নগালেণ্ডে অসমৰ মাটিত ব্যাপক বেদখল চলাই গৈছে। ইখনৰ পাছত সিখন ঠাই নিজৰ দখললৈ নিছে নগালেণ্ডে।
এই ক্ষেত্রত নগালেণ্ড চৰকাৰৰ প্ৰত্যক্ষ পৃষ্ঠপোষকতাৰ বিপৰীতে অসম চৰকাৰে সদায় মূৰ পোলোকা মৰা নীতি গ্রহণ কৰি আহিছে। যোৰহাট জিলাৰ মৰিয়নিৰ অসম-নগালেণ্ড সীমান্তৱর্তী অঞ্চলত অৱস্থিত তিনিখন সংৰক্ষিত বনাঞ্চল ক্রমে দিছে ভেলী, দিছৈ আৰু তিৰু হিলছ সংৰক্ষিত বনাঞ্চলৰ অধিকাংশ ভূমি এতিয়া নগালেণ্ডৰ দখললৈ গ’ল।
স্মর্তব্য যে দুদিনমান পূর্বে অসম আৰক্ষীৰ এটা দলক সীমান্তৱর্তী য়াজাং চি নগা বস্তিত নগালোকে আক্রমণ কৰাৰ লগতে ওৰে ৰাতি বস্তিখনত আবদ্ধ কৰি মাৰপিট কৰিছিল। ইয়াৰ পাছতো লজ্জাজনকভাবে অসমৰ প্রশাসনে কোনো ব্যৱস্থাই ল’ব নোৱাৰিলে। সেই একেই য়াজাং চি বস্তিৰ কাষত এতিয়া অসমৰ মাটিত নগাই বেদখল চলাইছে। অসমৰ ভূমিত অৱস্থিত ৰজাবাৰী নামৰ গাঁওখনৰ কাষতে বেদখল আৰম্ভ কৰিছে নগা দুর্বৃত্তই।
মৰিয়নিৰ বনাঞ্চলিক বিষয়া কাৰ্যালয়ৰ অন্তৰ্গত তিৰু হিলছ সংৰক্ষিত বনাঞ্চলত ইটোৰ পাছত সিটো টিলাৰ গছ-গছনি কাটি তহিলং কৰি গৈছে। সবাতেকৈ উদ্বেগজনক কথাটো হ’ল ৰজাবাৰীৰ বাসিন্দা সন্তোষ কৰ্মকাৰৰ ঘৰৰ পাছফালে বাৰীৰ কাষতেই নগা দুর্বৃত্তই গছ-গছনি কাটি তহিলং কৰাৰ লগতে বেদখল আৰম্ভ কৰিছে। এই বিষয়ে স্থানীয় ৰাইজে টীয়কৰ প্ৰশাসনক অৱগত কৰিছিল; কিন্তু বিষয়টোলৈ প্রশাসনে কোনো গুৰুত্বই নিদিয়াৰ গুৰুতৰ অভিযোগ উঠিছে।
কিছুদিন পূর্বে সংঘটিত অসম আৰক্ষীক নগা দুর্বৃত্তই মাৰপিটৰ ঘটনাৰ পৰিপ্ৰেক্ষিতত আৰক্ষীও আগুৱাবলৈ সাহস কৰিব পৰা নাই। উল্লেখ্য যে ৰজাবাৰী, চুতীয়াকাৰী আৰু ৰণখামত অসম আৰক্ষী বেটেলিয়নৰ তিনিটাকৈ সীমান্ত নিৰীক্ষণ চকী (বিঅ’পি) আছে যদিও নগাৰ আগ্রাসন ৰোধ কৰাৰ ক্ষেত্ৰত তেওঁলোক সদায় পিছ হোঁহকি আহিছে।
ঊর্ধ্বতন বিষয়াই বিষয়টোক লৈ কোনোদিনেই গুৰুত্ব প্রদান কৰা পৰিলক্ষিত হোৱা নাই। অসমৰ ৰাজহ গাঁৱৰ নিচেই কাষতে এইদৰে নগাই বেদখল আৰম্ভ কৰাত স্বাভাৱিকতে অঞ্চলটোত উত্তেজনা বৃদ্ধি পোৱাৰ লগতে গাঁওবাসী আতংকৰ মাজত থাকিবলগীয়া হৈছে।
ইফালে, নগাই বেদখল চলোৱা উক্ত ৰাজহ ভূমিৰ খাজনা ৰজাবাৰীৰ ৰাইজে দি আহিছে বুলিও স্থানীয় লোকে জানিবলৈ দিছে। অসমৰ মাটিত নগাই বেদখল চলোৱা নাই বুলি সততে কৈ ফুৰা অসমৰ মুখ্যমন্ত্ৰীয়ে এতিয়া কি ক’ব? ইফালে, সীমা সমস্যা সমাধান হোৱা বুলি মিঠাই বিলোৱা মৰিয়নিৰ বহুবল্কি বিধায়ক ৰূপজ্যোতি কুৰ্মীৰ ভূমিকাক লৈও অসন্তুষ্টি ব্যক্ত কৰিছে অঞ্চলটোৰ ৰাইজে। এই ক্ষেত্ৰত সচেতন ৰাইজে অসম চৰকাৰক অতি শীঘ্রেই ব্যৱস্থা গ্ৰহণ কৰাৰ বাবে আহ্বান জনাইছে।