Condemnation of Jua :
ৰাজ্যত বর্ধিত সাংবাদিক নিগ্ৰহৰ ঘটনাত গভীৰ উদ্বেগ প্রকাশ কৰে জাৰ্ণেলিষ্ট ইউনিয়ন অৱ আসাম (জুৱা)ই। বঙাইগাঁৱৰ বিজি কলনিত কালি বাতৰি সংগ্ৰহ কৰিবলৈ যোৱা সাংবাদিক এদল দুর্বৃত্তৰ আক্ৰমণৰ লগতে বিশ্বনাথত ‘ঈশান নিউজ’ৰ সাংবাদিক আবুল মাজানক আৰক্ষীয়ে গ্ৰেপ্তাৰ কৰা কাৰ্যক গভীৰ উদ্বেগ প্রকাশ কৰে জুৱাই। এক বিবৃতিত জুৱাৰ সভাপতি চেমিম চুলতানা আহমেদ আৰু সাধাৰণ সম্পাদক ধনজিৎ কুমাৰ দাসে কয় যে ৰাজ্যত বিগত সময়ছোৱাত সঘনাই এটাৰ পাছত আনটো সাংবাদিক নিগ্ৰহৰ ঘটনা সংঘটিত হোৱাৰ পাছতো চৰকাৰ-প্ৰশাসনে ইয়াৰ বিৰুদ্ধে কঠোৰ পদক্ষেপ গ্ৰহণ কৰা পৰিলক্ষিত হোৱা নাই। ইয়াৰ বিপৰীতে আৰক্ষী প্রশাসনে সাংবাদিকৰ বিৰুদ্ধে বহু ক্ষেত্ৰত নেতিবাচক স্থিতি গ্রহণ কৰা দেখা গৈছে। দুর্ভাগ্যজনকভাৱে নাগৰিকৰ সুৰক্ষাৰ দায়িত্বত ন্যস্ত আৰক্ষী- প্ৰশাসনৰ দ্বাৰা বিভিন্ন অজুহাতত সাংবাদিক শাৰীৰিক-মানসিক নিৰ্যাতনৰ বলি হোৱা দেখা গৈছে।
#মুখ্যমন্ত্ৰীলৈ স্মাৰকপত্ৰ প্ৰেৰণ জুৱাৰ বঙাইগাঁৱৰ জিলা সমিতিৰ
বঙাইগাঁৱত কালি আক্ৰমণৰ ঘটনাৰ বলি হোৱা সাংবাদিক আফটাব আলীয়ে আজি বঙাইগাঁও থানাত এজাহাৰ দাখিল কৰে। এই ঘটনাক তীব্র গৰিহণা দিয়াৰ লগতে দুর্বৃত্তক গ্ৰেপ্তাৰ আৰু সাংবাদিকৰ নিৰাপত্তা সুনিশ্চিত কৰাৰ দাবীত জুৱাৰ বঙাইগাঁও জিলা সমিতিয়ে জিলা আয়ুক্তৰ জৰিয়তে মুখ্যমন্ত্রী ড° হিমন্ত বিশ্ব শর্মালৈ এখন স্মাৰকপত্ৰ প্ৰেৰণ কৰে। তদুপৰি জাফাৰ বঙাইগাঁও জিলা সমিতিয়ে দুর্বৃত্তক আটক কৰি শাস্তি প্রদানৰ দাবীত আজি আৰক্ষী অধীক্ষকক এখন স্মাৰক পত্ৰ প্ৰদান কৰে।
#মাজানক শীঘ্রে মুকলি কৰি দিয়াৰ দাবী
জুৱাই সাংবাদিক মাজানক শীঘ্রে মুকলি কৰি দিবলৈ দাবী জনাইছে। চতিয়াত সংঘটিত ‘হিট এণ্ড ৰাণ’ৰ এটা বাতৰি পৰিৱেশনৰ বাবে সাংবাদিকজনক গ্রেপ্তাৰৰ অভিযোগ উঠিছে। সাংবাদিকক এইদৰে সহজ আক্ৰমণৰ লক্ষ্য কৰি লোৱা ঘটনাক কোনোপধ্যে মানি ল’ব নোৱাৰি আৰু ই অতি গৰিহণাৰ যোগ্য বুলি বিবৃতিত কয় জুৱাই। আনহাতে, গৃহ বিভাগৰ দায়িত্বত থকা মুখ্যমন্ত্রী ড: শৰ্মাক সাংবাদিকক সুৰক্ষা নিশ্চিত কৰিবলৈ দাবী জনায়।