Security forces continue to launch operations against Maoists:
ওড়িশা আৰু ছত্তীশগড়ৰ সীমান্তৰ গৰিয়াবন্দত চিপিআই (মাওবাদী)ৰ বিৰুদ্ধে অভিযান চলাই ইতিমধ্যে শীৰ্ষ মাওবাদী নেতা সহ কুৰিৰো অধিক মাওবাদীক ধৰাশায়ী কৰা নিৰাপত্তা বাহিনীয়ে শেহতীয়াকৈ অবিৰত অভিযানত অৱস হৈ পৰিছে বুলি তাৎপৰ্যপূৰ্ণ মন্তব্য কৰিছে ছত্তীশগড়ৰ ৰাজধানী ৰায়পুৰৰ মহাপৰিদৰ্শক (আই জি) অমৰেশ মিশ্ৰই ৷
শীৰ্ষ আৰক্ষী বিষয়াজনে উল্লেখ কৰা মতে, নিৰাপত্তা বাহিনীয়ে ভাবিছিল যে ডেৰ দিনৰ পাছত মাওবাদীৰ বিৰুদ্ধে অভিযান শেষ হ’ব। কিন্ত মাওবাদী কেডাৰে ঘন অৰণ্য মাজৰ পৰা অবিৰতভাবে গুলীবৰ্ষণ অব্যাহত ৰখাত এই অভিযান পুনৰ আগন্তুক তিনিদিনলৈ সম্প্ৰসাৰণ কৰিবলৈ বাধ্য হৈছে নিৰাপত্তা বাহিনী ৷
উল্লেখ্য যে নিৰাপত্তা বাহিনীৰ অভিযানৰ প্ৰথম বাধা আছিল দুৰ্গম অঞ্চলটো। দ্বিতীয়টো বাধা হৈ পৰিছিল লজিষ্টিক। লজিষ্টিক কামত প্ৰায় ডেৰ দিন সময় লাগিল। কিন্তু মাওবাদীৰ বিৰুদ্ধে অভিযান দীঘলীয়া হোৱাৰ লগে লগে ৰছদপাতিৰ সংকটৰ সমান্তৰালভাৱে ভোকত আতুৰ হৈ পৰিবলগীয়া হৈছে নিৰাপত্তা বাহিনী ৷ তথাপিও পিছ হুহুঁকি নাহি মাওবাদীৰ বিৰুদ্ধে গৰিয়াবন্দৰ বনাঞ্চলৰ চাৰিওফালৰ পৰা নিৰাপত্তা বাহিনীয়ে মাৰাথন অভিযান চলাই গৈছে ৷
ছত্তীশগড়ৰ ৰাজধানী ৰায়পুৰৰ মহাপৰিদৰ্শক অমৰেশ মিশ্ৰই সংবাদ মাধ্যমৰ আগত সদৰি কৰে যে ওড়িশা আৰু ছত্তীশগড়ৰ সীমান্তৰ গৰিয়াবন্দত যোৱা মঙলবাৰৰ যৌথ অভিযানত ১৬জন মাওবাদী নিহত হৈছিল। এই অভিযান কিমান বিপদজনক আছিল, মাওবাদীসকলক কেনেকৈ পৰিকল্পিত আৰু সম্পূৰ্ণ প্ৰস্তুতিৰে আক্ৰমণ কৰা হৈছিল, তাৰ বিৱৰণ দিছিল ৷
দেওবাৰে নিশা চোৰাংচোৱা সূত্ৰৰ খবৰ মতে, ছত্তীশগড়ৰ ২৫-৩০ জনীয়া মাওবাদীৰ এটা দলে কুলহাৰীঘাটত সমবেত হৈছিল।” সেই দলটোত শীৰ্ষ নেতৃত্বও আছিল । একাংশ নেতাৰ মূৰৰ মূল্য কেইবা কোটি টকা ধাৰ্যও আছিল ৷ গৰিয়াবন্দৰ অৰণ্যত মাওবাদীয়ে কেনেকৈ ধন সংগ্ৰহ কৰিব, ক’ত নিৰাপদ আশ্ৰয় ল’ব, পঞ্চায়ত নিৰ্বাচন ইত্যাদি আলোচনা কৰিবলৈ উপস্থিত হয় নেতা- কেডাৰ সকল ।
আই জি পি গৰাকীয়ে আৰু কয় যে, নিৰাপত্তা বাহিনীৰ এই অভিযানক তিনিটা পৰ্যায়ত বিভক্ত কৰা হৈছিল ৷ পৰিকল্পনা, কৌশল আৰু নিৰীক্ষণ। এই যৌথ অভিযানৰ অংশীদাৰ আছিল ই-৩০, কোব্ৰা ২০৭, চি আৰ পি এফৰ ৬৫, ২১১ বেটেলিয়ন আৰু ওড়িশাৰ স্পেচিয়েল অপাৰেচন গ্ৰুপ ৷ এছ অ’ জি’য়ে একেলগে এই অভিযান আৰম্ভ কৰে। কুলহাৰীঘাট পাহাৰীয়া অঞ্চললৈ যোৱাৰ সময়তেই আৰম্ভ হয় মাওবাদীৰ স’তে মুখামুখি সংঘৰ্ষ। আনকি মাওবাদীয়ে ড্ৰোন ব্যৱহাৰ কৰি বাহিনীৰ গতিবিধি নিৰীক্ষণ কৰিছিল। কিন্তু সেই ড্ৰ’নৰ চোৰাংচোৱাগিৰি নস্যাৎ কৰি নিৰাপত্তা বাহিনী মাওবাদীৰ ফালে ক্ৰমাৎ অগ্ৰসৰ হৈছিল ৷
নিৰাপত্তা বাহিনীয়ে তিনিফালৰ পৰা মাওবাদী দলটোক ঘেৰাও কৰে। মাওবাদীসকলৰ পলায়নৰ সকলো পথ বন্ধ কৰি দিয়ে। আনহাতে, ছত্তীশগড়ৰ নিৰাপত্তা বাহিনীয়ে বাকী বিষয়টো নিৰীক্ষণ কৰি আছিল।
আই জি গৰাকীয়ে আৰু কয় যে কুলহাৰীঘাট জনজাতীয় অঞ্চলটো অতি স্পৰ্শকাতৰ এলেকা হিচাপে চিহ্নিত আছিল ৷ আনকি এই অঞ্চলটো ৭৫ কিলোমিটাৰ দূৰত্বত পাহাৰ আৰু অৰণ্যৰে আগুৰি থকা সাতখন গাঁৱৰে গঠিত। এইটোৱেই হৈছে ‘ন’-নেটৱৰ্ক জ’ন’। এই কুলহাৰীঘাটত ১৫০০ লোক বাস কৰে। সাতখন গাঁৱৰ চাৰিখন আকৌ পাহাৰৰ ওপৰৰ ফালে। যিটো অতি দুৰ্গম। ওড়িশা, অন্ধ্ৰপ্ৰদেশ আৰু ছত্তীশগড়ৰ মাওবাদীসকলে এই অঞ্চলটোক নিজৰ কেন্দ্ৰবিন্দু কৰি লৈছিল।
পাহাৰ, ডাঠ অৰণ্য আৰু দুৰ্গম পথ আৱৰি থকা এই অঞ্চলটো আছিল দুৰ্ধষ মাওবাদী নেতা চলপতিৰ দৰে মাওবাদী নেতাৰ মুক্ত বিচৰণস্থলী ৷ গাঁৱৰ মানুহে স্থানীয় এই অঞ্চলটোলৈ বৰ বেছিকৈ নাহে। সপ্তাহত এবাৰ ৰেচন সংগ্ৰহ কৰেহি ৷ ফলত মাওবাদীয়ে কুলহাৰীঘাটৰ এই সাতখন গাঁও আৰু পাহাৰৰ ওপৰত থকা চাৰিখন গাঁৱক নিজৰ শিবিৰ হিচাপে বাছি লৈছিল।
স্মতৰ্ৱ্য যে,নিৰাপত্তা বাহিনীৰ যৌথ অভিযানত মাওবাদীৰ কেন্দ্ৰীয় সমিতিৰ সদস্য চলপতিকে ধৰি ১৬জন মাওবাদী নিহত হয়। চলপতিৰ মূৰৰ মূল্য ধাৰ্য আছিল এক কোটি টকা। ইয়াৰ বাহিৰেও সেই গোটৰ আন কেইবাজনো শীৰ্ষ নেতা আছিল, যাৰ কিছুমানৰ মূৰৰ মূল্য ৫ কোটি টকা। আৰক্ষীয়ে দাবী কৰা মতে, অভিযানত ১৬ জন নহয় অধিক মাওবাদীৰ মৃত্যু হৈছে। কিন্তু আন মাওবাদী কেডাৰে সংঘৰ্ষৰ পিছত আৰক্ষী উপস্থিত হোৱাৰ পূৰ্বেই মৃত্যু হোৱা সতীৰ্থ মাওবাদীৰ মৃতদেহ লগত লৈ ঘন জংঘললৈ পলায়ন কৰে ৷ ৷
