Gamusa:গামোচাৰ মূল্য ২৫ হেজাৰ !
নলবাৰী বৰভাগৰ ৰণাকুছিত এই বিশেষ গামোচা ।
গামোচাখনৰ চলিছে নিলাম ।
:গামোচা এখন নিলাম কৰিবলৈ মানুহৰ মনত ব্যাপক উছাহ। বৰভাগৰ ৰণাকুছি বৰগোসাঁই ঘৰৰ বাৰ্ষিক হোম যজ্ঞ অনুষ্ঠান এইবেলি আঠ আৰু ন ফেব্ৰুৱাৰীত বর্ণাঢ্য কাৰ্যসূচীৰে অনুষ্ঠিত হৈ দেওবাৰে উক্ত বার্ষিক হোমযজ্ঞ অনুষ্ঠানৰ সামৰণি পৰে। পুৱাৰে পৰা বিভিন্ন মাংগলিক আৰু সামাজিক কাৰ্যসূচী ৰূপায়ণৰ শেষত দিনৰ ভাগত উলিওৱা হয় ধর্মীয় শোভাযাত্রা।
এই ধর্মীয় শোভাযাত্ৰাত বৰগোসাঁই ঘৰৰ মূল সিংহাসনৰ লগতে এখন গামোচা পৰিভ্ৰমণ কৰা হয়। লোকাচাৰ অনুসৰি প্ৰভুৰ এই মূল গামোচাখনত সকলোবে সামর্থ্য অনুসৰি দান-দক্ষিণা দি সেৱা লয়। অঞ্চলটোৰ সৰ্বস্তৰৰ ৰাইজৰ উপস্থিতিত এই ধর্মীয় শোভাযাত্রাত পৰিভ্ৰমণ কৰি অহাৰ পাছত এই বিশেষ গামোচাৰ নিলাম প্রক্রিয়া হয়। এই গামোচাখন যিয়ে কিনিব তেওঁলোকৰ পৰিয়াল মংগলময় হোৱা বুলি এক প্রবাদ আছে।
যাৰ বাবে এই বিশেষ গামোচাখন কিনিবলৈ এইদৰে ভিৰ কৰা পৰিলক্ষিত হয় ৰণাকুছিৰ বৰগোসাঁই ঘৰৰ বাকৰিত। উল্লেখ্য যে উক্ত গামোচাখন বৰভাগৰ ৰণাকুছি গাঁৱৰ (সম্প্ৰতি গুৱাহাটীৰ বাসিন্দা) নগেন কলিতাই ২৫ হেজাৰ টকাত নিলাম কৰে।
