World Bank:
প্রধানমন্ত্রী নৰেন্দ্ৰ মোদী চৰকাৰৰ কার্যকালৰ এটা দশক অর্থাৎ ১০ বছৰত দেশত ২৭কোটি লোকে চৰম দাৰিদ্ৰৰ পৰা পৰিত্ৰাণ পালে। এই তথ্য বিশ্ববেংকৰ শেহতীয়া এক প্রতিবেদনত প্রকাশ পাইছে। মোদী চৰকাৰক প্ৰশংসা কৰি প্ৰতিবেদন খনত কোৱা হয় যে ২০১১-১২ত দেশত চৰম দাৰিদ্ৰৰ হাৰ ২৭.১ শতাংশ হোৱাৰ বিপৰীতে ২০২২-২৩ ত ইয়াৰ হাৰ ৫.৩ শতাংশলৈ হ্রাস পায়।
অর্থাৎ এই ১০ বছৰত দেশত প্রায় ২৭ কোটি অর্থাৎ ২৬ কোটি ৯০ লাখৰো অধিক লোকক চৰম দাৰিদ্ৰৰ কবলৰ পৰা উদ্ধাৰ কৰা হৈছে। এনে কম সময়তে বৃহৎ সংখ্যক লোকে দৰিদ্ৰতাৰ পৰা নিষ্কৃতি পোৱা ঘটনাক আর্থ-সামাজিক উন্নয়নৰ দিশত এক উল্লেখযোগ্য সাফল্য বুলি বিশ্ববেংকে উল্লেখ কৰিছে ।
উল্লেখ্য যে বিশ্ববেংকে পূর্বে দৈনিক ২.১৫ ডলাৰ (প্রায় ১৮৪ টকা) ব্যয় সামর্থ্য অনুসৰি দৰিদ্ৰতাৰ সংজ্ঞা নির্ধাৰণ কৰিছিল। ২০২১ত এই সীমা দৈনিক তিনি ডলাৰ (প্রায় ২৫৭ টকা) ব্যয় সামর্থ্যলৈ বৃদ্ধি কৰে। অৰ্থাৎ সম্প্রতি দৈনিক ২৫৭ টকা ব্যয়ৰ সামর্থ্য থকা এজন ব্যক্তি দৰিদ্ৰ নহয়।
উল্লেখ্য যে কৰ’না কালত ২০২০ত ভাৰতত কমেও ৫.৬ কোটি লোক নতুনকৈ দৰিদ্ৰতাৰ কবলত পৰে বুলি বিশ্ববেংকৰ প’ভার্টি এণ্ড শ্বেয়াৰ্ড প্রস্পেৰিটি’ শীর্ষক প্রতিবেদন প্রকাশ পাইছিল। ইয়াৰ বিপৰীতে আন্তর্জাতিক বিত্তীয় প্রতিষ্ঠানটোৰ প্ৰতিবেদনত কোৱা হৈছে যে মোদী চৰকাৰৰ দিনত দেশত ২৭ কোটি লোকক চৰম দাৰিদ্ৰৰ পৰা উদ্ধাৰ কৰা হৈছে।
লক্ষ্যণীয় যে কৰ’না মহামাৰীয়ে কৰা মোকাবিলাৰ উদ্দেশ্যে মোদী চৰকাৰে বহু সংখ্যক দাৰিদ্ৰ দূৰীকৰণ আঁচনি ঘোষণা কৰে। প্ৰতিবেদন খনত আঙুলিয়াই দিয়া হৈছে যে ২০১১-১২ত ভাৰতত কমেও ৩৪.৫ কোটি চৰম দৰিদ্ৰ লোক আছিল।
এইসকলৰ সংখ্যা ২০২২-২৩ত চাৰে সাত কোটিলৈ হ্রাস পায়। তদুপৰি প্রতিবেদনখনত কোৱা হৈছে যে ২০১১ৰ পৰা ২০২৩ৰ সময়ছোৱাত নিম্ন-মধ্য আয়ৰ দৰিদ্ৰৰ সংখ্যাও ৫৭.৭ শতাংশৰ পৰা ২৩.৯ শতাংশলৈ হ্রাস পাইছে।
