Donald Trump: অসাধাৰণ ব্যক্তি নে বহুৱা? নে তাচ পাতৰ খেলৰ সেইজন বহুৱা (জোকাৰ) যিয়ে খেলৰ গতিয়ে সলনি কৰি কঢিয়াই আনে সৌভাগ্য? হয়, এয়া আমেৰিকাৰ ৰাষ্ট্ৰপতি ড’নাল্ড ট্রাম্পৰ কথাই কৈছো।
ইজৰাইল আৰু ইৰানৰ ১২ দিনীয়া যুদ্ধত ট্রাম্পৰ ভূমিকা বিশ্বজুৰি এক চৰ্চাৰ বিষয়।হৈছে। মুহূর্ততে আক্রমণ কৰি পাছ মুহূৰ্ততে ট্রাম্পৰ মুখৰ পৰা নিৰ্গত শান্তিৰ বতৰাই চকু কপালত তুলিছে বিভিন্নজনৰ।
দৰাচলতে এয়া ট্রাম্পৰ বহুৱালি নে তেওঁৰ বাৎসল্যসুলভ চৰিত্ৰ? মার্কিন যুক্তৰাষ্ট্ৰৰ ইতিহাসত এনে এজন ৰাষ্ট্ৰপতি বিৰল বুলি চৰ্চিত হৈছে। ১২ দিনীয়া ইজৰাইল-ইৰানৰ সংঘাতক যদি উপাখ্যান বুলি ভবা হয় পৰা তেন্তে এইখন নাটকৰ মূল নায়ক হ’ব ট্রাম্প। দুদিন পূর্বে ট্রাম্পে ইৰানত বোমা আক্ৰমণ কৰি বিশ্বকে হতচকিত কৰাই নহয়, বিশ্বযুদ্ধৰ আগজাননীৰ আশংকা বাৰ্তা দিয়া বুলিও ভীতিগ্রস্ততাৰ সৃষ্টি হয়।
ট্রাম্পৰ বিৰোধীসকলে বিশ্বযুদ্ধৰ মাজলৈ মার্কিন যুক্তৰাষ্ট্ৰক ঠেলি দিয়া বুলি সমালোচনাত মুখৰ হয়। দৰাচলতে ট্রাম্পে বিভিন্ন সময়ত তেওঁৰ পূর্বসূৰীসকলৰ বিৰুদ্ধে এই অভিযোগ উত্থাপন কৰি আহিছে। আন বহুতে আকৌ ট্রাম্পৰ শান্তিৰ ন’বেল প্রত্যাশালৈও তীব্র কটাক্ষ কৰে। মার্কিন ৰাষ্ট্ৰপতিয়ে মধ্যপ্রাচ্যৰ যুদ্ধবিৰতিৰ মধ্যমণি হ’বলৈ চেষ্টা চলাইছে। ইয়াৰ আঁৰত ট্রাম্পৰ শান্তিৰ ন’বেল বঁটাৰ অভিলিপ্সা বুলিয়ে ভবা হৈছে।
শান্তিক উপহাস, হঠাতে আক্রমণ
যোৱা ১৯ জুনত হোৱাইট হাউছে কয় যে দুসপ্তাহৰ ভিতৰতে আমেৰিকাই যুদ্ধত অংশগ্রহণ কৰিব নে নকৰে সেয়া সিদ্ধান্ত ল’ব। ইয়াৰ দুদিন অতিক্রম নকৰোতেই মার্কিন বি-২ ব’ম্বাৰে ইৰানৰ তিনিটা পাৰমাণবিক ঘাটিত আক্রমণ কৰে। বিভিন্ন প্রতিবেদনত প্রকাশ যে ট্রাম্পে দুসপ্তাহৰ সময়সীমা বান্ধি দিয়াৰ পূর্বেই আক্ৰমণৰ পৰিকল্পনা চূড়ান্ত কৰিছিল।
দুসপ্তাহৰ সময়সীমা বান্ধি শত্রুপক্ষক শ’লঠেকত পেলাবলৈ চেষ্টা কৰিছিল ট্রাম্পে। সূত্ৰত প্রকাশ যে হোৱাইট হাউছৰ মাত্র কেইজনমান লোকেহে আক্ৰমণৰ বিষয়ে আগতীয়াকৈ জানিছিল। মার্কিন উপ-ৰাষ্ট্ৰপতি জে ডি ভান্সেও এই ক্ষেত্রত লক্ষ্যণীয় মন্তব্য কৰিছিল।
ট্রাম্পৰ ইৰান আক্ৰমণৰ প্ৰসংগত ভান্সে সংবাদ মাধ্যমক কৈছিল, ‘দৰাচলতে মই আৰু আমাৰ কোনেও এই বিষয়ত অৱগত নহয় যে কেতিয়া ৰাষ্ট্ৰপতিয়ে সিদ্ধান্ত গ্রহণ কৰিলে। এই কথা ৰাষ্ট্ৰপতিৰ বাহিৰে কোনেও গম পোৱা নাছিল।’ চর্চা অনুসৰি ট্রাম্পে আক্ৰমণৰ পৰিকল্পনা কৰি থকাৰ সময়ত জাউৰিয়ে জাউৰিয়ে প্রশ্ন কৰিছিল হোৱাইট হাউছৰ বিষয়াসকলক আৰু বাৰে বাৰে কৈছিল যে তেওঁ এই পৰিকল্পনা যিকোনো মুহূর্ততে পৰিত্যাগ কৰিব। দৰাচলতে ট্রাম্পে কোনেও নজনাকৈ সংগোপনে ৰচিছিল আক্ৰমণৰ পৰিকল্পনা।
অপাৰেছন মিডনাইট হেমাৰ: শক্তি প্রদর্শন
ইৰানৰ বিৰুদ্ধে চলোৱা ‘অপাৰেছন মিডনাইট হেমাৰ’ আছিল ৱাশিংটনৰ প্ৰতিৰক্ষা আধিপত্যৰ প্ৰদৰ্শন। বিশ্বজুৰি শত্রুপক্ষক এই অভিযানৰ জৰিয়তে ট্রাম্পে শক্তিশালী বার্তা প্ৰেৰণ কৰিলে বুলি ধাৰণা কৰা হৈছে। মার্কিন বাহিনীয়ে নিক্ষেপ কৰা বি-২ ব’ম্বাৰৰ সামর্থ্য আৰু আগ্নেয়শক্তি অতুলনীয়।
এই ব’ম্বাৰে জিবিইউ-৫৭ বাংকাৰ বাস্তাৰ নিক্ষেপ কৰে। ১৩ হেজাৰ কিলো ওজনৰ এই বোমাই ভূতলৰ দুশ ফুট ভিতৰলৈ ক্ষতিসাধন কৰিব পাৰে। আকাশ পথেৰে আক্ৰমণৰ শক্তি প্ৰদৰ্শনৰ উপৰি আমেৰিকাই নৌ বাহিনীৰ শক্তিও প্রদর্শন কৰিছে। মার্কিন ছাবমেৰিনে ইৰানৰ লক্ষ্যস্থলীলৈ নিক্ষেপ কৰে ক্রুজ ক্ষেপণাস্ত্র। এই উচ্চশক্তি সম্পন্ন ক্ষেপণাস্ত্রসমূহে ছেটেলাইট যোগাযোগৰ জৰিয়তে লক্ষ্যস্থলী যদি সলনি কৰা হয় তেন্তে নিক্ষেপৰ পাছতো গতিপথ সলনি কৰি আঘাত হানিব পাৰে।
মাত্র এয়েই নহয়, যুদ্ধক্ষেত্ৰত হোৱা ক্ষয়-ক্ষতিৰ তথ্য বহন কৰে এইসমূহ উচ্চ প্রাবল্যৰ ক্ষেপণাস্ত্রই। মুঠতে সামগ্রিকভাবে অপৰাছেন মিডনাইট হেমাৰ আছিল শক্তি প্রদর্শন। ইয়াক অতি সন্তর্পণে সম্পন্ন কৰা হৈছিল। এই অভিযানৰ জৰিয়তে মার্কিন বাহিনীৰ অদম্য যুঁজাৰু শক্তিৰ ধাৰণা পুনৰ প্ৰতিপন্ন কৰা হৈছে বুলি বিশেষজ্ঞই কয়। আমেৰিকাৰ কোনো ধৰণৰ ক্ষয়-ক্ষতি নোহোৱাকৈ ট্রাম্পে এইসমূহ লক্ষ্য সাধন কৰিবলৈ সক্ষম হ’ল।
ইৰানক দিলে বিকল্প প্রস্থান পথ (প্রস্থান ৰেম্প)
ইৰানক বিমান আক্ৰমণ কৰাৰ পাছত ট্রাম্পে ইৰানক মধ্যপ্রাচ্যৰ ভিতৰতে দুর্বল বুলি কৈছিল আৰু লগতে কৈছিল যে তেহৰানে নিশ্চিতভাবে শান্তি প্রতিষ্ঠা কৰিব লাগিব কিয়নো ভৱিষ্যতৰ আক্ৰমণসমূহ অধিক ভয়াৱহ আৰু সহজ হ’ব। অৱশ্যে বাশিংটনে জানিছিল যে এই সংঘাতে আমেৰিকাক ভূ-ৰাজনৈতিকভাবে অথবা ট্রাম্পক ৰাজনৈতিকভাবে সহায় নকৰে।
ট্রাম্পে এই কথা জানিছিল যে জনপ্রিয় ঘৰুৱা সমর্থন নেহেৰুৱাকৈ এই উত্তেজনাৰ পথৰ পৰা আঁতৰিবলৈ তেহৰানক প্রস্থান ৰেম্পৰ প্ৰয়োজন হ’ব। ইৰানে কাটাৰত থকা মার্কিন বাহিনী ঘাটি আক্ৰমণৰ পাছত লক্ষ্যণীয়ভাবে ট্রাম্পে ওলোটাই আক্রমণ নকৰিবলৈ সিদ্ধান্ত ল’লে।
এক প’ষ্টত ট্রাম্পে কয়, ‘মই এই কথা জনাবলৈ পাই আনন্দিত যে কোনো এজনো আমেৰিকানৰ ক্ষতিসাধন হোৱা নাই আৰু ক্ষয়-ক্ষতি হোৱা নাই।’ তেল আভিভ আৰু তেহৰানৰ মাজত যুদ্ধবিৰতি চুক্তি সম্পন্ন হোৱা বুলি ঘোষণা কৰাৰ পাছতে ট্রাম্পে এইদৰে কয়। চমুকৈ ক’বলৈ গ’লে ট্রাম্পে মার্কিন সামৰিক শক্তি প্রদর্শন কৰিলে, ইৰানৰ পাৰমাণবিক ঘাটিত আঘাত হানিলে আৰু তাৰ পাছত দাবী কৰিলে যে তেওঁ শান্তি প্রচেষ্টাৰো মধ্যস্থতা কৰিছে।এই সমগ্র প্রক্রিয়াত হতাহত নহ’ল আমেৰিকাৰ এজনো সৈনিক।
চকু ন’বেলত
দীর্ঘদিন ধৰি ট্রাম্পৰ চকু আছে ন’বেল শান্তি বঁটাত। তেওঁ বহু সময়ত বিলাপো কৰিছে যে যি কাম কৰিলেও তেওঁ এই বঁটা লাভ নকৰিব। কিছুদিন পূর্বে ট্রাম্পে ভাৰত আৰু পাকিস্তানৰ মাজত জম্মু-কাশ্মীৰৰ পহলগামত সন্ত্রাসবাদী আক্ৰমণৰ পাছত সৃষ্টি হোৱা সংঘাতৰ সময়ত দুয়ো ৰাষ্ট্ৰৰ মাজত শান্তি স্থাপন কৰা বুলি দাবী কৰিছিল।
পাকিস্তানে এই ক্ষেত্ৰত মার্কিন যুক্তৰাষ্ট্ৰক ধন্যবাদ দিয়াৰ পৰিৱৰ্তে ভাৰতে স্পষ্ট কৰি দিয়ে যে কেতিয়াও মধ্যস্থতা গ্রহণ কৰা নহ’ব। ইছলামাবাদৰ অনুৰোধ মৰ্মেহে যুদ্ধবিৰতি হোৱা বুলি ভাৰতে স্থিতি জাহিৰ কৰে। অলপতে ট্রাম্পে সামাজিক মাধ্যমত এইদৰে লিখিছে, ‘নাই, মই শান্তিৰ ন’বেল বঁটা লাভ নকৰো, মই যি কামেই নকৰো কিয়, সেয়া ৰাছিয়া-ইউক্রেইন, ইজৰাইল-ইৰানৰ ক্ষেত্ৰতে যি ফলশ্রুতি নহওক কিয়, মই শান্তিৰ ন’বেল লাভ নকৰো।
অৱশ্যে মানুহে জানে আৰু সেয়াই মোৰ বাবে যথেষ্ট।’ সম্প্রতি বিগত ৪৮ ঘণ্টাৰ ভিতৰত ট্রাম্পে ইৰানত বোমা আক্ৰমণ কৰি তেলৰ যোগানক লৈ বিশ্বজুৰি ভীতিগ্রস্ততাৰ সৃষ্টি কৰে আৰু তাৰ পাছত যুদ্ধবিৰতি ঘোষণা কৰি এই উদ্বেগ মৰিষণো কৰে। এইদৰে এটাৰ পাছত আনটো বিশ্বকে হতচকিত কৰা কাম-কাজৰে মার্কিন ৰাষ্ট্ৰপতি ন’বেল বঁটাৰ ওচৰ চাপিছে নেকি?
এই প্রশ্ন উত্থাপন হৈছে। প্রকৃতার্থত তেওঁ দিয়ে মধ্যপ্রাচ্যৰ যুদ্ধবিৰতি বাস্তৱায়িত কৰিব পাৰে তেন্তে নিশ্চয় ন’বেলৰ দাবীদাৰ হোৱাৰ অধিকাৰ থাকিব ট্রাম্পৰ। এই ভাষ্যও একাংশ বিশ্লেষকৰ।
