RS Gandhi:
স্বয়ং ন্যায়ালয় আৰু কেন্দ্রীয় পৰিৱেশ, বন আৰু জলবায়ু পৰিৱৰ্তন মন্ত্রণালয়ৰ নিৰ্দেশ অমান্য কৰি কাৰ্বি আংলঙৰ পানীমাৰাত এজন কুখ্যাত ব্যৱসায়ীয়ে কোটি কোটি টকাৰ ৰাজহ ফাকি দি শিলৰ খনন আৰু সৰবৰাহ অব্যাহত ৰাখি লুণ্ঠনৰাজ চলাই আহিছে। অভিযোগ অনুসৰি, দিছপুৰৰ প্রভাৱশালী চক্রক হাত কৰি ৰণবীৰ সিং গান্ধী (আৰ এছ গান্ধী) নামৰ এই কুখ্যাত ব্যৱসায়ীজনে অবৈধভাবে শিল খনন আৰু সৰবৰাহ কৰি আহিছে।
এই অবৈধ কাৰবাৰ অব্যাহত ৰাখিবলৈ তেওঁ বন বিভাগ আৰু একাংশ আৰক্ষী বিষয়াকো হাত কৰি লোৱাৰ অভিযোগ উত্থাপন হৈছে। পোহৰলৈ অহা তথ্য অনুসৰি, পূব কাৰ্বি আংলং বন সংমণ্ডল প্ৰাধিকাৰী (ডিএফঅ’)য়ে শিলৰ মহল বন্ধ কৰিবলৈ দিয়া নির্দেশকো ভ্রুকুটি কবি ব্যৱসায়ীজনে শিলৰ খনন আৰু সৰবৰাহ অব্যাহত ৰাখিছে। আনকি কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্রণালয়ৰ পৰিৱেশগত অনুমোদনৰ ম্যাদ উকলাৰ পাছতো ব্যৱসায়ীজনে শিলৰ মহলত ধাৰাবাহিকভাৱে বিস্ফোৰণ ঘটাই লুণ্ঠনৰাজ চলাই থকাৰ অভিযোগ উত্থাপন হৈছে।
জিলাখনত মাটি লীজত লৈ কুখ্যাত ব্যৱসায়ীজনে লুণ্ঠনৰাজ চলোৱাৰ তথ্য সম্পর্কত শেহতীয়াকৈ অভিযোগ পোৱা গৈছে। ব্যৱসায়ীজনে কাৰ্বি আংলং জিলাৰ দ্বাৰ বামুণী মৌজাৰ বৰজুৰি (এনচি) গাঁৱৰ কণিকা ৰংহাংপিৰ মাটিও লীজত লৈ লুণ্ঠন চলাইছে। মহিলাগৰাকীৰ স্বামী চন্দন বৰাই প্ৰকাশ কৰা অনুসৰি, তেওঁৰ পত্নীৰ নামত থকা ৩০ বিঘা মাটি কুখ্যাত আৰ এছ গান্ধীয়ে ২০১৭ৰ ১১ জুলাইত চুক্তিপত্ৰৰ জৰিয়তে ১২ বছৰৰ বাবে লীজত লয়। দুয়োপক্ষৰ মাজত হোৱা বুজাবুজি অনুসৰি, প্ৰথম দুবছৰ মাটিৰ ভাড়াৰ বাবদ প্ৰতি বছৰে দুই লাখ ৪০ হেজাৰ টকাকৈ আৰু পাছৰ ১০ বছৰ ৩০ হেজাৰ টকাকৈ মাটিৰ গৰাকীয়ে পাব।
এই ক্ষেত্রত সম্মত হৈ দুয়ো পক্ষই চুক্তিপত্ৰত স্বাক্ষৰ কৰে। বৰাই অভিযোগ কৰা অনুসৰি, পানীমাৰা এক, দুই আৰু তিনি নম্বৰত থকা শিলৰ মহলকেইটা আৰ এছ গান্ধীয়ে লীজত লয় যদিও পৰিৱেশগত কাৰণত পানীমাৰা এক আৰু পানীমাৰা দুইৰ শিলৰ মহলকেইটা বন্ধ হয়। পৰৱৰ্তী সময়ত কুখ্যাত ব্যবসায়ীজনে পানীমাৰা তিনিৰ শিলৰ মহলত খনন আৰম্ভ কৰে। এই শিলৰ মহলত সাত বছৰৰ বাবে খনন চলাব বুলি ৰাজহ আদায় দি ব্যৱসায়ীজনে পৰিৱেশগত অনুমোদন উলিয়ায়।
আনহাতে, জিলাখনৰ উত্তৰ-পশ্চিম পার্কুপ পাহাৰ আঞ্চলিক বন বিষয়া কাৰ্যালয়ৰ অধীনৰ পানীমাৰাৰ শিলৰ মহলত বাবদ সাত বছৰৰ বাবে শিল খনন কৰিব বুলি ব্যৱসায়ীজনে তিনি লাখ ঘনমিটাৰ শিলৰ বাবদ ৰাজহ আদায় দিয়ে। সম্প্রতি অভিযোগ উত্থাপন হৈছে যে বিগত সাত বছৰত তেওঁ ৭০ লাখৰো অধিক ঘনমিটাৰ শিল খনন আৰু সৰবৰাহ কৰে। দিছপুৰৰ প্ৰভাৱশালী চক্ৰৰ আশীৰ্বাদত আৰ এছ গান্ধী বাহিনীয়ে এখন চালানৰে ২০-৩০ বাৰ পৰ্যন্ত শশ ডাম্পাৰৰে শিল সৰবৰাহ কৰি থকাৰ অভিযোগ উত্থাপন হৈছে।
সাত বছৰত তিনি লাখ ঘনমিটাৰ শিল খননৰ অনুমতি লৈ কুখ্যাত ব্যৱসায়ীজনে পানীমাৰা তিনি নম্বৰ শিলৰ মহলত আঢ়ৈশ মিটাৰ গভীৰ দ গাঁত খান্দি ৭০ লাখৰো অধিক ঘনমিটাৰ শিল সংগ্ৰহ কৰি সৰবৰাহ কৰে। অভিযোগ অনুসৰি, উক্ত শিলৰ মহলৰ পৰিৱেশগত অনুমোদনৰ ম্যাদ যোৱা ২১ মে’ত অন্ত পৰে। তাৰ পাছতো দিছপুৰৰ প্ৰভাৱশালী চক্ৰৰ আশীৰ্বাদত কুখ্যাত ব্যৱসায়ীজনে কেন্দ্রীয় পৰিৱেশ, বন আৰু জলবায়ু মন্ত্রণালয়কো ভ্রূকুটি কৰি পানীমাৰা তিনি নম্বৰ শিলৰ মহলত বিস্ফোৰণ ঘটাই শিলৰ খনন অব্যাহত ৰাখিছে।
উল্লেখ্য যে কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্রণালয়ে এএছই/এএ১৬১১/২০২১/ইচি/১৭/১৪৭১ নম্বৰৰ ফাইলৰ জৰিয়তে যোৱা ন এপ্ৰিলত চলিত বৰ্ষৰ ২১ মে’লৈকে ১৫ হেজাৰ ঘনমিটাৰ শিল খননৰ বাবে পৰিৱেশগত অনুমোদন দিয়ে। এই অনুমোদনৰ ম্যাদ উকলি যোৱাৰ পাছতো গান্ধী বাহিনীয়ে পানীমাৰা তিনি নম্বৰ শিলৰ মহলত শিল খনন কৰি সৰবৰাহ কৰি আছে। উক্ত শিলৰ মহলৰ কাষতে পাহাৰৰ ওপৰত স্থাপন কৰা শিল ভঙা মেচিনলৈ প্রথমে এই শিল সৰবৰাহ কৰা হয়।
এই সম্পর্কত পূব কার্বি আংলং বন সংমণ্ডল প্ৰাধিকাৰীক এজন ব্যক্তিয়ে ই-মেইলযোগে অভিযোগ দিয়াত বন সংমণ্ডল প্ৰাধিকাৰীয়ে যোৱা ছয় জুনত বি/কেএই/কমপ্লেইন/২০২৫/২৬/১৯৫৫ নম্বৰৰ পত্ৰৰ জৰিয়তে পানীমাৰা এক, দুই আৰু তিনি নম্বৰ শিলৰ মহলকেইটা বন্ধ ৰাখিবলৈ নিৰ্দেশ জাৰি কৰে। আশ্চর্যজনক যে বন প্রাধিকাৰীয়ে এই নির্দেশ জাৰি কৰাৰ পাছতো শিলৰ খনন আৰু সৰবৰাহ অব্যাহত ৰাখিছে।
আনহাতে, অভিযোগকাৰী বৰাই কয় যে ২০১৭ৰ ১১ জুলাইত তেওঁৰ পত্নীৰ নামত থকা পানীমাৰা তিনি নম্বৰ শিলৰ মহলৰ ৩০ বিঘা ভূমি লীজত লৈ আৰ এছ গান্ধীয়ে এই মাটি দশৰথ তীছ’ নামৰ এজন লোকৰ নামলৈ পৰিৱৰ্তন কৰে। ইয়াৰ বিৰুদ্ধে তেওঁলোক গুৱাহাটী উচ্চ ন্যায়ালয়ৰ দ্বাৰস্থ হোৱাত ন্যায়ালয়ে শিলৰ মহলটোত কাম বন্ধ কৰিবলৈ নিৰ্দেশ জাৰি কৰে।
ন্যায়ালয়ে এই নির্দেশ জাৰি কৰাৰ পাছতো শিলৰ মহলটোত খনন অব্যাহত আছে বুলি বৰাই অভিযোগ উত্থাপন কৰে। এই সম্পর্কত তেওঁ কয়, ‘উচ্চ ন্যায়ালয়ে মহলটোত কাম বন্ধ কৰিবলৈ নিৰ্দেশ দিয়াৰ পাছত আমি কিছুদিন পূর্বে মহলটোত উপস্থিত হৈ কাম বন্ধ কৰাওঁ; কিন্তু আজি দেখিবলৈ পাওঁ যে মহলটোত পূর্ণগতিত শিল ভঙা কাম অব্যাহত আছে।’ অভিযোগ অনুসৰি, চাৰিশাৰীযুক্ত ঘাইপথ নির্মাণত নিয়োজিত কোম্পানীক আৰ এছ গান্ধী বাহিনীয়ে শিলৰ যোগান ধৰে।
সম্প্ৰতি পানীমাৰা তিনি নম্বৰ শিলৰ মহলৰ পৰা কুখ্যাত ব্যৱসায়ীজনে তেজপুৰলৈকো শিলৰ যোগান ধৰি আছে। দৈনিক শশ ডাম্পাৰে তেওঁৰ শিল ভঙা থলীৰ পৰা শিল কঢ়িয়াই আছে। এই সকলো অবৈধ বেহা চৰকাৰ-প্ৰশাসনৰ জ্ঞাতসাৰেই চলি থকাৰ অভিযোগ উত্থাপন হৈছে ৷