Minister’s wife buys land:
মন্ত্রী পত্নী হোৱাৰ সুবাদতে জুলি ডেকা বৰুৱাৰ ব্যৱসায়িক মুনাফা তথা সা-সম্পত্তিৰ তালিকাই দীঘলীয়া জাঁপ মাৰি উর্ধ্বমুখী হৈছে। ৰাজ্যৰ বহুকেইজন জনপ্ৰতিনিধিৰ দৰে মন্ত্রী জয়ন্ত মল্ল বৰুৱাৰ পত্নী হোৱাটোৱে উদ্যোগী মহিলা বুলি জাহিৰ কৰা জুলি ডেকা বৰুৱাৰ অন্যতম অর্হতা বুলি বিভিন্ন মহলত চলি থকা চর্চাই কে’বা কোটিটকীয়া ভূমি ক্রয়ৰ অতি শেহতীয়া তথ্য তথ্য ফাদিলৰ পাছত তুংগত উঠে।
ৰাজ্যত বহু এনে উদ্যোগী মহিলা আছে। তেওঁলোকে নিশাটোৰ ভিতৰতে বহু কোটি বাদেই, লাখ টকাৰ অধিকাৰী হ’ব পাৰিছে নে? ৰাজ্যৰ বিভিন্ন আঢ্যৱন্ত-চহকী অথবা সম্ভাৱনাপূর্ণ অঞ্চলত ভূমি ক্ৰয় কৰিব পাৰিছে নে? কোনো ধৰণৰ প্ৰভাৱশালীৰ পৃষ্ঠপোষকতা নোহোৱাকৈ কিমানগৰাকী উদ্যোগী মহিলাই হঠাতে বৃহৎ পৰিমাণৰ সা-সম্পত্তিৰ অধিকাৰী হ’ল অথবা চৰকাৰী কাৰ্যালয়লৈ তাঁত-বাটি নকৰাকৈ লক্ষ লক্ষ টকাৰ ৰাজসাহায্য লাভ কৰিলে তাৰ তালিকা প্রকাশ কৰিব পাৰিবনে মন্ত্রী জয়ন্ত মল্লই।
এইবোৰ প্ৰশ্ন এতিয়া ৰাইজৰ মুখে মুখে। জুলি ডেকা বৰুৱাই মন্ত্রী পত্নী হোৱাৰ অৰ্হতাৰ বাবেই কমেও ৫০ লাখ ৰাজসাহায্য লাভৰ বিষয়টোৰ চৰ্চা অন্ত নৌপৰতে এইবাৰ ওলাল বৃহৎ পৰিমাণৰ ভূমি ক্রয়ৰ তথ্য। ৰাজসাহায্য, গীৰ গাই বিতৰ্কৰ পাছত এইবাৰ ভূ-সম্পত্তিৰ বিতৰ্কৰ আৱৰ্তত সোমাল মন্ত্রী পত্নীয়ে। জয়ন্ত মল্ল মন্ত্ৰী হোৱাৰ পাছৰে পৰা তেওঁৰ সম্পত্তিৰ পৰিমাণ ঊর্ধ্বমুখী হোৱাত প্রশ্ন উঠিছে যে সম্পত্তি ক্ৰয়ৰ ধনৰ উৎস কি, ক’ৰ পৰা আহিছে এই ধন?
২০২৪ৰ ২৯ ৰাজ্য চৰকাৰৰ ধৰিত্ৰী প’র্টেলতে জল্পজল্ পট্পট্ হৈছে জুলি ডেকা বৰুৱাৰ তেজপুৰ ৰাজহ চক্ৰৰ কাৰ্যালয়ত বিশাল ভূমি ক্ৰয়ৰ তথ্য। তেওঁৰ নামত তেজপুৰ ৰাজহ চক্র বিষয়া কার্যালয়ে ২০২৩ৰ ২৪ জুলাইত এছঅ’এন/টিইজেদ ২০২২-২৩/২০১২৬/ অ’এমইউটিচিৰ নিৰ্দেশ মর্মে ৭৪ নম্বৰ দাগৰ ১৫ বিঘা এক কঠা ১৮ লেচা মাটি নামজাৰি কৰা হয় আৰু ২০২৪ৰ পাঁচ মাৰ্চত আপোচ বাটোৱাৰা নম্বৰ এছঅ’এন/টিইজেদ/২০২৩-২৪/ ২০২৪০০০১০৯৮১/এফপিএআৰটিৰ নির্দেশ মর্মে ৭৪ নম্বৰ দাগৰ ১৫ বিঘা এক কঠা ১৪ লেচা মাটি জুলি ডেকা বৰুৱাৰ নামত ২৭৪ নম্বৰ দাগ আৰু ১০২ নম্বৰ ম্যাদী পট্টা কৰা হয়।
আনহাতে, ২০১৪ৰ ১৯ ফেব্ৰুৱাৰীত ৭৫ নম্বৰ দাগৰ ১৩ বিঘা দুই কঠা ১০ লেচা মাটি জুলি ডেকা বৰুৱাৰ নামত ৩৫২ নম্বৰ দাগ আৰু ১০০ নম্বৰ পট্টাৰ জৰিয়তে ম্যাদীপট্টা কৰা হয়। উল্লেখযোগ্য যে শোণিতপুৰৰ তেজপুৰ ৰাজহ চক্ৰৰ তথা হলেশ্বৰ মৌজাৰ অন্তৰ্গত পুনিয়নিৰ পাঁচ নম্বৰ লাটৰ খেৰাজ ম্যাদী কৰা হয় মন্ত্রী পত্নীৰ নামত। ফেব্ৰুৱাৰীৰ আপোচ বাটোৱাৰা নম্বৰ এছঅ’এন/টিইজেদ ২০২৩-২৪/২০২৪০০০১০৪৪৮/এফপিএআৰটিৰ নিৰ্দেশ মর্মে ৭৫ নম্বৰ দাগৰ ১৩ বিঘা দুই কঠা ১০ লেচা মাটি জুলি ডেকা বৰুৱাৰ নামত ৩৫২ নম্বৰ দাগ আৰু ১০০ নম্বৰ ম্যাদী পট্টা কৰা হয়।
আনহাতে, আন এক নথি অনুসৰি ২০২৪ৰ পাঁচ মাৰ্চৰ আপোচ বাটোৱাৰা নম্বৰ এছঅ’এন/টিইজেদ/ ২০২৩-২৪/ ২০২৪০০০১০৯৮০/এফপিএআৰটিৰ নিৰ্দেশ মর্মে ৭৩ নম্বৰ দাগৰ সাত বিঘা ১২ লেচা মাটি জুলি ডেকা বৰুৱাৰ নামত ৩৫৩ নম্বৰ দাগ আৰু ১০১ নম্বৰ ম্যাদী পট্টা কৰা হয়। অর্থাৎ এই নথি অনুসৰি, তেজপুৰ ৰাজহ চক্ৰৰ অন্তৰ্গত পুনিয়নিৰ গাঁৱত মন্ত্রী জয়ন্ত মল্লৰ পত্নীৰ নামত আছে ৩৬ বিঘা মাটি।
জয়ন্ত মল্ল মন্ত্রী হোৱাৰ পাছত অর্থাৎ ২০২৪ত পত্নী জুলি ডেকাই ক্ৰয় কৰিছিল এই বৃহৎ পৰিমাণৰ ভূমি। শোণিতপুৰ জিলাৰ তেজপুৰ ৰাজহ চক্ৰৰ অন্তৰ্গত পুনিয়াৰি গাঁৱৰ পাঁচ নম্বৰ দাগৰ ১০০ নম্বৰ পট্টাৰ ৭৫ নম্বৰ দাগত থকা ১৩ বিঘা দুই কঠা ১০ লেচা ভাল বাৰী শ্ৰেণীৰ মাটি ২০২৪ৰ ২৯ ফেব্ৰুৱাৰীত নিজৰ নামত কৰাৰ পাছত পাঁচ মাৰ্চত পুনৰ ১০১ নম্বৰ পট্টাত থকা বিশেষ ফৰিং শ্ৰেণীৰ পুনিয়নি গাঁৱৰ সাত বিঘা ১২ লেচা মাটিৰ গৰাকী হয় মন্ত্রী জয়ন্ত মল্লৰ পত্নীয়ে।
একেদিনাই আন এখন পট্টাৰ ১৫ বিঘা এক কঠা ১৮ লেচা মাটি নিজৰ নামত ক্ৰয় কৰে মন্ত্রী পত্নীয়ে। পুনিয়নিৰ ১০২ নম্বৰ পট্টাৰ ভাল বাৰী শ্ৰেণীৰ ৭৪ নম্বৰ দাগৰ মাটিখিনি ক্রয় কৰে জুলি ডেকা বৰুৱাই। এইদৰে তেজপুৰৰ পুনিয়নি গাঁৱত মুঠ ৩৬ বিঘা মাটিৰ ২০২৪ত গৰাকী হয় মন্ত্রী পত্নীয়ে। তেজপুৰ বিশ্ববিদ্যালয়ৰ সমীপত এইদৰে বিঘাই বিঘাই মাটি ক্রয় কৰাৰ তথ্য ৰাজহুৱা হোৱাৰ পাছতে প্রশ্ন উত্থাপন হৈছে যে জয়ন্ত মল্ল মন্ত্রী হোৱাত তেওঁ কি এনে অৰ্হতাৰ অধিকাৰী যে মুঠিয়ে মুঠিয়ে ধন ঘটাবলৈ সক্ষম হয়।
ৰঙিয়াৰ পৰা তেজপুৰলৈ গৰু ফাৰ্মৰ ব্যৱসায়ীৰ পৰা বিঘাই বিঘাই মাটিৰ গৰাকী হোৱা জুলি ডেকা বৰুৱাৰ ২০১৯-২০ বিত্তীয় বর্ষত মুঠ আয় আছিল মাত্র ১৫ লাখ ৬৬ হেজাৰ ১৫০ টকা। মন্ত্রী জয়ন্ত বৰুৱাই ২০২১ৰ বিধানসভা নিৰ্বাচনৰ শপতনামাত দাখিল কৰিছিল এই তথ্য। ইয়াৰ বিপৰীতে মুঠ অস্থাৱৰ সম্পত্তিৰ পৰিমাণ আছিল ৮৪ লাখ ১৯ হেজাৰ ৩০৬ টকা। তথা স্থাৱৰ সম্পত্তি আছিল দুই কোটি ১৫ লাখ টকাৰ।
মন কৰিবলগীয়া যে ৰাজসাহায্য লাভ কৰি বিতৰ্কত সোমাই পৰা জেএমএ এগ্র’ প্রাইভেট লিমিটেডত ২০১৯-২০ৰ লাভৰ পৰিমাণ আছিল ১.৯৫ লাখ আৰু ২০২০-২১ত আছিল ১.৯৮ লাখ। এই তথ্য দিছে জুলি ডেকাই প্রতিষ্ঠানটোৰ অংশীদাৰ হোৱাৰ পূৰ্বৰ। তেওঁৰ প্ৰৱেশৰ পাছতে ৰকেট গতিত প্ৰতিষ্ঠানৰ লাভৰ পৰিমাণ বৃদ্ধি পায়। অর্থাৎ ২০২১-২২ত ৩৩ লাখ টকা লাভ হয় কোম্পানীটোৰ, অৰ্থাৎ ১৬শ শতাংশ যাদুকৰী পৰিমাণ বৃদ্ধি হয় লাভৰ পৰিমাণ। ইয়াৰ পাছত আকৌ ২০২২-২৩ত এশ শতাংশ বৃদ্ধিৰে লাভৰ পৰিমাণ আছিল ৬৬ লাখ।
আনহাতে, ক্ৰয় কৰা ভূমিৰ বৃহৎ চৌহদৰ চাৰিওকাষে এতিয়া পাছত প্রকাণ্ড পকী বেৰ দি ঘেৰি থোৱা হৈছে যদিও ইয়াৰ ভিতৰত কোনো নিৰ্মাণ কাৰ্য আৰম্ভ কৰা নাই। এই স্থান তেজপুৰ কেন্দ্ৰীয় বিশ্ববিদ্যালয়ৰ সমীপত।
উল্লেখ্য তেজপুৰ বিশ্ববিদ্যালয়, ইণ্ডিয়ান স্ট্রেটিছটিকেলে ইষ্টিটিউটৰ দৰে উচ্চ শিক্ষানুষ্ঠানৰ সমীপতে তথা চকীঘাট দলং, চাৰিশৰীয়া পথৰ কাষৰীয়া এই অঞ্চলত এতিয়া মাটিৰ মূল্য যথেষ্ট বৃদ্ধি পাইছে। সেই অনুসৰি, মন্ত্রী পত্নীয়ে গৌৰী ভট্টাচার্য, তুলসী চৰণ ভট্টাচার্য, সমীৰণ ভট্টাচার্য, অপূর্বও ভট্টাচার্য আৰু অর্পণা ভট্টাচাৰ্যৰ পৰা ক্ৰয় কৰা এই বৃহৎ ভূমিৰ মূল্য এতিয়া কে’বা কোটি টকা হ’ব।
