Mahatma Gandhi portrait:✒️জাতিৰ পিতা মহাত্মা গান্ধীয়ে গোটেই জীৱন কালত এবাৰেই নিজৰ প্ৰতিচ্ছবি অংকন কৰোৱায়। ১৯৩১৩ ব্রিটিছ-আমেৰিকান মহিলা চিত্রশিল্পী ক্লেয়াৰ লিটনৰ সন্মুখত ছবি আঁকাৰ বাবে থিয় দিয়ে।
মহিলা চিত্রশিল্পীগৰাকীয়ে অংকন কৰা গান্ধীৰ এই তৈল চিত্ৰ শেহতীয়াভাৱে নিলাম হ’ল। ব্রিটেইনৰ বিখ্যাত সংস্থা বনহামছে অনলাইন মাধ্যমত গান্ধীৰ এই চিত্র নিলাম কৰে। চিত্ৰখন এক লাখ ৫২ হেজাৰ আঠশ পাউণ্ড অর্থাৎ ভাৰতীয় মুদ্রাত এক কোটি ৭৬ লাখ টকাত বিক্রী হয়।
লক্ষ্যণীয়ভাৱে প্রথম অৱস্থাত চিত্ৰখন ৫০ হেজাৰৰ পৰা ৭০ হেজাৰ পাউণ্ড অর্থাৎ ভাৰতীয় মুদ্ৰাৰ হিচাপত ৫৮ লাখ টকাৰ পৰা ৮০ লাখ টকাত বিক্রী হ’ব বুলি বনহামছে ঘোষণা কৰিছিল; কিন্তু বাস্তৱত ছবিখন ভবাতকৈ দুগুণ অধিক মূল্যত বিক্রী হয়।
সূত্রই প্ৰকাশ কৰা অনুসৰি, ১৯৩১ত লণ্ডন ভ্ৰমণৰত অৱস্থাত সাংবাদিক হেনৰী ন’ৱেল ব্রেলছফ’ৰ্ডৰ মাধ্যমত চিত্রশিল্পী লিটনৰ স’তে গান্ধীৰ সাক্ষাৎ ঘটে। নিলাম সংস্থাৰ মতে, গান্ধীয়ে গোটেই জীৱনত একমাত্র তেতিয়াই নিজৰ প্ৰতিকৃতি অংকনৰ বাবে চিত্রশিল্পীৰ সন্মুখত থিয় দিয়ে।
সেই সূত্রে লিটনে তেওঁৰ এই চিত্র অংকন কৰে। এই সম্পৰ্কত এক বিবৃতিত বনহামছ সংস্থাই কয়, ‘গান্ধীক সাক্ষাৎ কৰাৰ সুযোগ এইগৰাকী শিল্পীয়ে একাধিকবাৰ পাইছিল। সেই সূত্রে তেওঁ চিত্রখন অংকন কৰে।’
উল্লেখ্য যে ১৯৩১ত লণ্ডনৰ ছেকভিল স্ট্রীটৰ আলবানী প্রদর্শনী গৃহত গান্ধীৰ এই তৈল চিত্ৰ সাধাৰণ লোকে দৰ্শন কৰাৰ সুযোগ পায়। অৱশ্যে তেতিয়া তাত গান্ধী উপস্থিত নাছিল। পৰৱৰ্তী সময়ত গান্ধীৰ ব্যক্তিগত সচিব মহাদেৱ দেশায়ে চিত্রশিল্পী লিটনলৈ এক পত্র লিখে।
সেই পত্ৰৰ প্ৰতিলিপিও নিলাম সংস্থাই প্রামাণ্য নথিৰূপে প্রকাশ কৰিছে। পত্ৰখনত দেশায়ে লিখে, ‘ছবিখন কেনে হৈছে, আমি দেখাৰ সুযোগ পোৱা নাই; কিন্তু বন্ধুবর্গই ছবিখন ভাল হোৱা বুলি কৈছে।’ আনহাতে, চিত্রশিল্পী লিটনৰ পৰিয়ালৰ লোকে জনোৱা মতে,১৯৭৪ত গান্ধীৰ এই ছবি বষ্টনৰ এক প্রদর্শনীত ৰখা হয়।
তেতিয়া আৰএছএছৰ এজন সমর্থকে ছবিখন ছুৰীৰে আঘাত কৰে। অৱশ্যে সেই ঘটনাৰ কোনো প্রমাণ পোহৰলৈ নাহিল। তাৰ পাছৰে পৰা একাধিকবাৰ ছবিখনৰ যতন লোৱা হয়।
ইয়াৰ প্রমাণ ছবিখনৰ ফ্ৰেমৰ পাছফালে পোৱা যায়। উল্লেখ্য যে ১৯৮৯৩ চিত্রশিল্পী লিটনৰ বিয়োগ ঘটে। তাৰ পাছৰে পৰা তেওঁৰ পৰিয়ালৰ সংগ্ৰহত গান্ধীৰ তৈলচিত্রখন আছিল।
