OIL:
ডিগবৈ-দুলীয়াজান সংযোগী একমাত্র পথটোৰ জৰাজীৰ্ণ অৱস্থাৰ বাবে দুর্ভোগ ভুগিবলগীয়া হৈছে সাধাৰণ জনতাই। অইল ইণ্ডিয়া লিমিটেডৰ অধীনস্থ পথটোৰ দুৰৱস্থাৰ বাবে দীর্ঘদিনৰ পৰা জীয়াতু ভোগ কৰি আহিছে পথচাৰীসকলে। সদ্যব্যস্ত পথটোৰে দৈনিক অইল ইণ্ডিয়া লিমিটেডৰ সৰু-বৰ শ শ যান-বাহন চলাচল কৰাৰ লগতে ব্যক্তিগত যান-বাহনো চলাচল কৰে।
উক্ত পথটোৰেই অইল ইণ্ডিয়া লিমিটেডৰ উচ্চপদস্থ বিষয়া-কর্মচাৰীসকলৰ বাহনসমূহ যাতায়াত কৰে যদিও ডিগবৈ ৰাষ্ট্ৰীয় বিদ্যালয়ৰ পৰা বালিজান খ্ৰীষ্টানবস্তিত অৱস্থিত গির্জাঘৰ পৰ্যন্ত পথটোত ঠায়ে ঠায়ে সৃষ্টি হোৱা বৃহৎ বৃহৎ পুখুৰী সদৃশ গাঁতসমূহ চকু বন্ধ কৰি ধৃতৰাষ্ট্ৰৰ দৰে পাৰ হৈ যোৱা যেন বোধ হয়। কিয়নো অইল ইণ্ডিয়া লিমিটেডৰ উচ্চপদত অধিষ্ঠিত হৈ থকা বিষয়াই কৰ্তব্যৰ খাতিৰত উক্ত পথেৰে যাবলগীয়া হ’লে নিশ্চয়কৈ অইল ইণ্ডিয়াৰ পথ মেৰামতি বিভাগক দৃষ্টিগোচৰ কৰিলেহেঁতেন। কিন্তু যোৱা প্রায় ছমাহৰ পৰা পথটোত সৃষ্টি হোৱা বৃহৎ বৃহৎ পুখুৰী সদৃশ গাঁতসমূহ পুতি মেৰামতি কৰিবলৈ ব্যৱস্থা গ্রহণ নকৰাটো চৰম দুৰ্ভাগ্যজনক বিষয়।
পঞ্চৰত্ন কোম্পানীৰূপে পৰিচয় বহন কৰা লাভজনক কোম্পানীটোৱে সাধাৰণ জনগণৰ কথা তিলমানো চিন্তা-চৰ্চা কৰা পৰিলক্ষিত হোৱা নাই। পথটোৰ ভিন্ন প্ৰান্তত সৃষ্টি হোৱা বৃহৎ বৃহৎ পুখুৰী সদৃশ গাঁতত আকস্মিকভাবে প্রায়ে দুর্ঘটনা হৈ আহিছে। তাৰে ভিতৰত কে’বাজনো লোক গুৰুতৰভাৱে আঘাতপ্রাপ্ত হৈ চিৰদিনৰ বাবে পংগুত্বৰ জীৱন অতিবাহিত কৰিবলগীয়া হোৱাৰ বিপৰীতে এজাক কিনকিনীয়া বৰষুণ দিলেই দ’ পুখুৰীলৈ ৰূপান্তৰ হোৱাৰ লগতে ৰ’দ দিলে ডিগবৈ ৰাষ্ট্ৰীয় বিদ্যালয়ৰ পৰা বালিজান খ্ৰীষ্টানবস্তি পর্যন্ত সুদীর্ঘ প্রায় পাঁচ কিলোমিটাৰ পথ ধূলিময় পৰিৱেশে পথচাৰীক যাতায়াতৰ ক্ষেত্ৰত যথেষ্ট সমস্যাত পেলাইছে।
পথটোৰ ওপৰত সৃষ্টি হোৱা দ’ পুখুৰী সদৃশ গাঁতসমূহৰে যাত্ৰী লৈ পাৰ হৈ অহাৰ সময়ত ই-ৰিক্সা নিতৌ এখন-দুখন বাগৰি পৰিবলগীয়া অৱস্থা হৈছে। পথটোৰ শোচনীয় অৱস্থাৰ বাবে ভিন্ন সময়ত ভুক্তভোগী জনতাই অইল ইণ্ডিয়া লিমিটেডক মেৰামতিৰ বাবে দাবী জনাই আহিছে যদিও আজি পর্যন্ত তিলমানো কাণসাৰ দিয়া পৰিলক্ষিত নোহোৱাত অনতিপলমে পথটোৰে যাতায়াত কৰা অইল ইণ্ডিয়াৰ বাহনৰ ক্ষেত্ৰত বাধা প্ৰদান কৰাৰ হুংকাৰ প্ৰদান কৰিছে।
পথটোৰ দুৰৱস্থাৰ বাবে দীর্ঘদিনৰ পৰা দুর্ভোগ ভুগি অহা জনসাধাৰণৰ কষ্ট উপলব্ধি নকৰা কুম্ভকৰ্ণৰ নিদ্ৰাত মগ্ন হৈ থকা অইল ইণ্ডিয়া লিমিটেডৰ উচ্চপদস্থ বিষয়া-কৰ্মচাৰীক ধৃতৰাষ্ট্ৰৰ অন্ধ ভাবৰ পৰা বাহিৰ হৈ আহি প্ৰকৃত কৰ্মত মনোযোগ দিবলৈ আহ্বান জনাইছে।