Himanta biswa sarma: ✒️ঋণৰ বোজাত ককবকাই থকা ৰাজ্যৰ ধাৰৰ বোজা অধিক বৃদ্ধিৰ সিদ্ধান্ত গৃহীত হ’ল বুধবাৰে ইয়াত অনুষ্ঠিত কেবিনেট বৈঠকত। এইবাৰ শিক্ষাখণ্ডৰ বাবে ৰাজ্য চৰকাৰে ২,৭৫০ কোটি টকা ঋণ লোৱাৰ সিদ্ধান্ত গ্রহণ কৰিছে।
এই কেবিনেট বৈঠকৰ পাছত এখন সংবাদমেলত মুখ্যমন্ত্রী ড° হিমন্ত বিশ্ব শর্মাই এই কথা ঘোষণা কৰে। সংবাদমেলত মুখ্যমন্ত্রীয়ে কয় যে শিক্ষা খণ্ডৰ বাবে ৰাজ্য চৰকাৰে গ্ৰহণ কৰিবলৈ লোৱা ২,৭৫০ কোটি টকাৰ ঋণৰ ৯০ শতাংশ ধন কেন্দ্ৰীয় চৰকাৰে ওভতাই দিব।
এই ঋণৰ ধনৰ মাত্র ১০ শতাংশ অর্থাৎ ২৭৫ কোটি টকাহে অসম চৰকাৰে পৰিশোধ কৰিব লাগিব বুলি তেওঁ জনায়। মুখ্যমন্ত্ৰীয়ে সদৰী কৰা অনুসৰি, ৰাজ্য চৰকাৰে ল’বলৈ লোৱা এই ঋণৰ ধনৰ অংশ শিক্ষক-শিক্ষয়িত্রীক গণিত, বিজ্ঞানৰ প্ৰশিক্ষণ, অধ্যক্ষ আৰু প্ৰধান শিক্ষকসকলক মেনেজমেণ্টৰ প্ৰশিক্ষণ, আধাতে ছাত্ৰ-ছাত্ৰীৰ শিক্ষাগ্রহণ ত্যাগ (ড্রপ আউট) প্ৰতিৰোধ, বিজ্ঞান-প্রযুক্তিবিদ্যাৰ সম্পৰ্কীয় কামত ব্যয় কৰা হ’ব বুলি মুখ্যমন্ত্রীয়ে জানিবলৈ দিয়ে।
এই ধনৰ ব্যয় আঁচনি সম্পৰ্কে সদৰী কৰি তেওঁ লগতে কয়, ‘এই পুঁজিৰ জৰিয়তে ৰাজ্যৰ চাৰিশখন স্কুল সুন্দৰকৈ নিৰ্মাণ কৰা হ’ব। ইয়াৰ বাবদ তিনিশৰ পৰা পাঁচশ কোটি টকা ব্যয় কৰা হ’ব। তদুপৰি ১,৭৩৩টা অংগনৱাড়ী কেন্দ্ৰ নির্মাণত ২৫ লাখ টকাকৈ ব্যয় কৰা হ’ব। ইয়ে ৰাজ্যৰ শিক্ষাখণ্ডত এক নতুন দিগন্তৰ সূচনা কৰিব।’
কেবিনেট বৈঠকত গৃহীত আন সিদ্ধান্তৰ বিষয়ে সদৰী কৰি মুখ্যমন্ত্ৰীয়ে কয় যে ৰাজ্যৰ তিনি হেজাৰ যুৱক-যুৱতীক মুখ্যমন্ত্রী ‘ফ্লাইট’ প্ৰকল্পৰ অধীনত জাপানী ভাষাৰ প্ৰশিক্ষণ প্ৰদানৰ লক্ষ্য লোৱা হৈছে। এই যুৱক-যুৱতীসকলক জাপানত সংস্থাপনৰ নিশ্চয়তা দিয়া হ’ব বুলিও মুখ্যমন্ত্রীয়ে জানিবলৈ দিয়ে।
এই সম্পৰ্কত তেওঁ আৰু কয়, ‘এডভান্টেজ আছাম ২.০ বিনিয়োগ সন্মিলনত তিনিটা জাপানী প্রতিষ্ঠান-এছিয়ান বান কোম্পানী লিমিটেড, জেছেক্স ভেন্সাৰ্ছ লিমিটেড আৰু মেইকো কেৰিয়া পার্টনাৰ্ছ লিমিটেডৰ স’তে চুক্তি স্বাক্ষৰ হয়। এই চুক্তিৰ ভিত্তিত এনে উদ্যোগ গ্রহণ কৰা হৈছে। এই তিনি জাপানী প্রতিষ্ঠানে অসমলৈ আহি ইয়াত আমাৰ যুৱক-যুৱতীসকলক প্রশিক্ষণ দিবলৈ আগ্রহ প্রকাশ কৰে। প্ৰত্যেক যুৱক-যুৱতী জাপানী ভাষা শিক্ষণৰ বাবদ মুঠ খৰচ তিনি-চাৰি লাখ টকা হ’ব।ৰাজ্য চৰকাৰে ডেৰ লাখ টকাৰ বৃত্তি প্রদান কৰিব আৰু বাকী ধন স্ব-অর্থায়ন বা বেংক ঋণৰ জৰিয়তে পূৰণ কৰিব পৰা হ’ব।’
তেওঁ কয় যে সফল প্রশিক্ষার্থীসকলে জাপানত প্রতি মাহে ভাৰতীয় মুদ্ৰাৰ হিচাপত দুইৰ পৰা আঢ়ৈ লাখ টকাৰ দৰমহাৰ চাকৰি লাভকৰিব। ভাৰতত থকা জাপানী কোম্পানীসমূহতো প্রশিক্ষণপ্রাপ্তসকলে কাম কৰাৰ সুযোগ পাব বুলিও তেওঁ আশা প্রকাশ কৰে। প্ৰাৰম্ভিক প্রশিক্ষণ তিনিটা পাঠ্যক্রম-গাড়ী চলোৱা, তথ্য-প্রযুক্তি আৰু নাৰ্ছিংকেন্দ্রিক হ’ব।
অহা অক্টোবৰৰ পৰা এই প্রশিক্ষণ আৰম্ভ হ’ব বুলি প্রকাশ কৰি তেওঁ লগতে কয়, ‘যদি চাহিদা বৃদ্ধি পায়, আমি অধিক খণ্ডলৈ সম্প্ৰসাৰণ কৰিম বুলি ভাবিছো। দীর্ঘম্যাদী ভিত্তিত জাপানে আমাৰ ২৫ হেজাৰ যুৱক-যুৱতীক নিয়োগ কৰিবলৈ আগ্রহ প্ৰকাশ কৰিছে। এই প্ৰকল্পৰ লক্ষ্য হৈছে অসমৰ যুৱক-যুৱতীৰ বাবে গোলকীয় চাকৰিৰ সুযোগ বৃদ্ধিৰ লগতে জাপানৰ কাৰ্যবাহী শক্তিৰ চাহিদা পূৰণ কৰা।’
ইপিনে, অহা ১২ আগষ্টত ৰাজ্যত নতুনকৈ ১০ খন সমজিলা গঠন কৰা হ’ব। এই সমজিলাসমূহত কাৰ্যনিৰ্বাহৰ বাবে সমজিলা আৰক্ষী অধীক্ষকৰ ১০টা পদ সৃষ্টিতো আজিৰ বৈঠকে অনুমোদন জনায় বুলি মুখ্যমন্ত্ৰীয়ে সদৰী কৰে। ১২ আগষ্টৰ পৰা এই সমজিলাসমূহৰ কাম আৰম্ভ হ’ব বুলি প্ৰকাশ কৰি মুখ্যমন্ত্ৰীয়ে জানিবলৈ দিয়ে যে এই ১০ নতুন সমজিলা হৈছে বকো-ছয়গাঁও, পলাশবাৰী, ৰঙাপৰা, বৰছলা, মৰিয়নি, টীয়ক, মাকুম, ধলাই, ডিগবৈ আৰু দুধনৈ।
