Droupadi Murmu :✒️মার্কিন ৰাষ্ট্ৰপতি ড’নাল্ড ট্রাম্পে বেপেৰুৱা আচৰণ কৰি ভাৰতীয় সামগ্ৰীৰ ওপৰত আৰোপ কৰা ২৫ শতাংশ শুল্কক লৈ সৃষ্ট জটিলতা, উপ-ৰাষ্ট্ৰপতি জগদীপ ধনখড়ৰ উত্তৰসুৰী বাছনিক লৈ ভিন্ন চর্চা আদিৰ মাজতে কালি একেদিনাই প্রধানমন্ত্রী নৰেন্দ্ৰ মোদী আৰু কেন্দ্রীয় গৃহমন্ত্রী অমিত শ্বাহৰ স’তে সুকীয়াকৈ বৈঠকত মিলিত হ’ল বাষ্ট্রপতি দ্রৌপদী মুর্মু।
ৰাষ্ট্ৰপতিগৰাকীয়ে প্রথমে নতুন দিল্লীৰ ৰাইছিনা হিলস্থিত ৰাষ্ট্ৰপতি ভৱনত প্রধানমন্ত্রী মোদীৰ স’তে বৈঠক অনুষ্ঠিত কৰে। তাৰ পাছতে তেওঁ শ্বাহৰ স’তে সুকীয়াকৈ আলোচনাত মিলিত হয়। ট্রাম্পৰ শুল্ক আৰোপ আৰু ধনখড়ৰ পদত্যাগ তথা তেওঁৰ উত্তৰসুৰী বাছনিৰ চৰ্চাৰ মাজতে ৰাষ্ট্ৰপতিয়ে শীর্ষ কাৰ্যপালিকাদ্বয়ৰ স’তে আলোচনাত মিলিত হোৱাটোৱে যথেষ্ট তাৎপর্য বহন কৰা বুলি চর্চিত হৈছে।
ইতিমধ্যে ইয়াক লৈ চৰকাৰৰ বাহিৰে-ভিতৰে চৰ্চা তুংগত উঠিছে। অৱশ্যে ৰাষ্ট্ৰপতিয়ে অংশ লোৱা এই দুই বৈঠকত চৰ্চিত বিষয়ৰ তথ্য পোহৰলৈ অহা নাই। এই সম্পর্কত প্রধানমন্ত্রী দপ্তৰ বা কেন্দ্ৰীয় গৃহমন্ত্ৰীৰ দপ্তৰেও কোনো মন্তব্য কৰা নাই। অৱশ্যে ৰাষ্ট্ৰপতি ভৱনে বৈঠক দুখনৰ ফটো সামাজিক মাধ্যমত প্রকাশ কৰিছে।
পাছত গৃহ মন্ত্রী শ্বাহেও বৈঠকৰ ফটো সামাজিক মাধ্যমত আপলোড কৰে। উল্লেখ্য যে যোৱা ২১ জুলাইত স্বাস্থ্যজনিত কাৰণৰ অজুহাত দি আকস্মিকভাবে উপ-ৰাষ্ট্ৰপতি ধনখড়ে পদত্যাগ কৰে। ৰাষ্ট্ৰপতিলৈ প্ৰেৰণ কৰা তেওঁৰ এই পদত্যাগপত্র ততাতৈয়াকৈ গৃহীত হয়।
পৰৱৰ্তী সময়ত নির্বাচন আয়োগে ঘোষণা কৰে যে অহা ন ছেপ্টেম্বৰত উপ-ৰাষ্ট্ৰপতিৰ নিৰ্বাচন অনুষ্ঠিত হ’ব। এনে অৱস্থাতে কালি কিছু সময়ৰ অন্তৰত প্ৰধানমন্ত্ৰী আৰু কেন্দ্রীয় গৃহমন্ত্ৰীৰ স’তে বৈঠকত মিলিত হোৱাটোৱে তাৎপর্য বহন কৰিছে। উল্লেখ্য যে উপ-ৰাষ্ট্ৰপতি ধনখড়ৰ আকস্মিক পদত্যাগ, ট্রাম্পৰ শুল্কৰ উপৰি আন কেতবোৰ বিষয়েও শেহতীয়াভাৱে মোদী চৰকাৰক একপ্ৰকাৰ ব্যতিব্যস্ত কৰা বুলি চৰ্চা হৈছে।
সংসদৰ চলিত বর্ষাকালীন অধিবেশনৰ সময়ত যোৱা মঙল আৰু বুধবাৰে ‘অপাৰেছন সিন্দুৰ’ সম্পৰ্কত আলোচনা অনুষ্ঠিত হয়। প্রধানমন্ত্রী মোদী আৰু গৃহমন্ত্রী শ্বাহ দুয়োজনে বক্তব্য আগবঢ়ায়।
তদুপৰি বিহাৰত নিৰ্বাচন আয়োগে ভোটাৰ তালিকাক লৈ – চলোৱা বিশেষ গভীৰ পুনৰীক্ষণক লৈ বিৰোধী দলসমূহে ধাৰাবাহিকভাবে প্রশ্ন উত্থাপন কৰি আহিছে। আনকি সংসদতো বিষয়টো আলোচনাৰ বাবে বিৰোধী দলসমূহে দাবী উত্থাপন কৰিছে।
এনে অৱস্থাতে মোদী আৰু শ্বাহৰ স’তে ৰাষ্ট্ৰপতি পৃথকে আলোচনাত মিলিত হোৱাটোৱে তাৎপর্য বহন কৰাই স্বাভাবিক। উল্লেখ্য যে শেহতীয়া ব্রিটেইন আৰু মালদ্বীপ ভ্রমণ অন্ত পেলাই দেশত উপস্থিত হোৱাৰ পাছত আজি প্ৰথমবাৰৰ বাবে ৰাষ্ট্ৰপতিৰ স’তে বৈঠকত মিলিত হয় প্রধানমন্ত্রী মোদী।
মোদীৰ শেহতীয়া ব্রিটেইন ভ্ৰমণৰ সময়ত দেশখনৰ স’তে ভাৰতৰ দ্বিপাক্ষিক বাণিজ্যিক চুক্তি স্বাক্ষৰ হয়। এই চুক্তি স্বাক্ষৰৰ কিছুদিন পাছতে মার্কিন ৰাষ্ট্ৰপতি ট্রাম্পে ভাৰতৰ ওপৰত ২৫ শতাংশ শুল্ক আৰোপ কৰে।
কেৱল সেয়াই নহয়, ৰাছিয়াৰ পৰা সামৰিক অস্ত্ৰ আৰু তেল ক্ৰয় কৰাৰ বাবে ভাৰতক জৰিমনা বিহাৰ হুংকাৰো দিছে ট্রাম্পে। লক্ষ্যণীয়ভাবে এছিয়াৰ বিভিন্ন দেশৰ তুলনাত ভাৰতৰ ওপৰত অধিক শুল্ক আৰোপ কৰিছে মার্কিন ৰাষ্ট্ৰপতিয়ে। অথচ প্রধানমন্ত্রী মোদীয়ে ট্রাম্পক বন্ধু আখ্যা দি আহিছে।
গতিকে ট্রাম্পৰ এই ঘোষণাৰ পাছতে মোদী চৰকাৰৰ কূটনীতিক লৈ প্রশ্ন উত্থাপন কৰিবলৈ লৈছে কংগ্রেছসহ বিভিন্ন বিৰোধী দলে। সম্প্রতি বিৰাজ কৰা এই পৰিস্থিতিৰ পৰিপ্ৰেক্ষিতত ৰাছিয়াৰ পৰা তেল ক্রয় সন্দৰ্ভত ভাৰতৰ পদক্ষেপ কি হ’ব তাক লৈয়ো ব্যাপক চর্চা অব্যাহত আছে।
কার্যতঃ এনে বিষয়সমূহে মোদী চৰকাৰক জুমুৰি দি ধৰাৰ আভাস স্পষ্ট হৈছে। এনে অৱস্থাতে অৰাজক মণিপুৰৰ প্ৰসংগও চর্চিত হৈছে। উল্লেখ্য যে যোৱা ১৩ ফেব্ৰুৱাৰীৰ পৰা ৰাষ্ট্ৰপতিৰ শাসনৰ অধীনত আছে মণিপুৰ। যোৱা সপ্তাহত ৰাজ্যখনত ৰাষ্ট্ৰপতি শাসনৰ ম্যাদ ছমাহলৈ বৃদ্ধিত লোকসভাই অনুমোদন জনায়। অৱশ্যে এই প্রস্তার বর্তমানলৈ ৰাজ্যসভাত উত্থাপন হোৱা নাই। এনে পৰিস্থিতিতে কালি মোদী-শ্বাহৰ স’তে পৃথকে বৈঠক অনুষ্ঠিত কৰে ৰাষ্ট্ৰপতিয়ে।
