যোৱা মে’ৰ অপাৰেছন সিন্দূৰৰ সময়ত ভাৰতীয় প্ৰতিৰক্ষা বাহিনীয়ে ধ্বংস কৰা মুখ্য কাৰ্যালয় পুনৰ নিৰ্মাণৰ তৎপৰতা আৰম্ভ কৰিছে পাকিস্তানী সন্ত্রাসবাদী সংগঠন জইচ-ই-মহম্মদে। এই উদ্দেশ্যে শেহতীয়াভাৱে সংগঠনটোৱে পুঁজি সংগ্ৰহ অভিযান আৰম্ভ কৰিছে।
উল্লেখ্য যে ২০০১ৰ সংসদ ভৱন আক্ৰমণৰ পৰা ২০১৯ৰ পুলৱামা নৰসংহাৰলৈকে ভাৰতত সংঘটিত একাধিক কূটাঘাতত জইচ-ই-মহম্মদ জড়িত। তদুপৰি যোৱা ২২ এপ্ৰিলৰ পহলগামৰ নৰসংহাৰ সংঘটিত কৰে জইচৰ এটা ছায়া সংগঠনে। পহলগামৰ নৰসংহাৰৰ পোেটক তুলিবলৈ ভাৰতীয় প্ৰতিৰক্ষা বাহিনীয়ে আৰম্ভ কৰা অপাৰেছন সিন্দূৰৰ সময়ত আন পাকিস্তানী সন্ত্রাসবাদী সংগঠনৰ শিবিৰসহ জইচৰ মুখ্য কার্যালয়টো ধ্বংস হয়।
ভাৰতীয় প্ৰতিৰক্ষা বাহিনীয়ে বোমাবর্ষণ কৰি ধ্বংস কৰা সন্ত্রাসবাদী সংগঠনটোৰ এই মুখ্য কার্যালয় পাকিস্তানৰ পঞ্জাৱ প্ৰদেশৰ বাহাৱালপুৰত অৱস্থিত। কার্যালয়টো ধ্বংস হোৱাৰ প্ৰায় তিনি মাহৰ পাছত ভাৰতবিৰোধী সন্ত্রাসবাদী সংগঠনটোৱে কাৰ্যালয়টো পুনৰ নিৰ্মাণৰ উদ্দেশ্যে পুঁজি সংগ্রহ অভিযান আৰম্ভ কৰাৰ তথ্য পোহৰলৈ আহিছে। সংগঠনত নতুন সদস্যভর্তি আৰু প্ৰশিক্ষণৰ উদ্দেশ্যে কার্যালয়টো পুনৰ নিৰ্মাণৰ লক্ষ্য লোৱা বুলি প্রকাশ কৰিছে।
উল্লেখ্য যে জইচ-ই-মহম্মদৰ মুৰব্বী মাছুদ আজহাৰ দীর্ঘকাল ধৰি ভাৰতবিৰোধী কার্যকলাপত লিপ্ত আছে। সামাজিক মাধ্যমত উর্দু ভাষাত শ্বেয়াৰ হোৱা এটা প’ষ্টত কোৱা হৈছে যে সন্ত্রাসবাদী সংগঠনটোৱে মুখ্য কাৰ্যালয় পুনৰ নিৰ্মাণৰ বাবে পুঁজি বিচাৰিছে। ভাৰতে ধ্বংস কৰা জইচ-ই-মহম্মদৰ মুখ্য কাৰ্যালয় বাহাৱালপুৰৰ জামিয়া মছজিদ ছুভান আল্লা অৱস্থিত আছিল।
একালত জইচৰ এই মুখ্য কাৰ্যালয়ৰ চৌহদ বিশাল আছিল। সংগঠনটোৰ মুখ্য কার্যালয়তে মাছুদ, তেওঁৰ ভ্ৰাতৃ আৰু তেওঁলোকৰ পৰিয়ালৰ সদস্যসকলৰ লগতে সন্ত্রাসবাদীয়ে বাস কৰিছিল। সামাজিক মাধ্যমত প্ৰকাশ পোৱা অনুসৰি, সংগঠনটোৱে মুখ্য কাৰ্যালয় পুনৰ নিৰ্মাণৰ উদ্দেশ্যে আজিৰ পৰা পুঁজি সংগ্রহ অভিযান আৰম্ভকৰিছে।
একাংশৰ মতে, সন্ত্রাসবাদী সংগঠনটোৱে ২০১৫ত বাহাৱালপুৰত এই মুখ্য কার্যালয় নিৰ্মাণ কৰে। তেতিয়াৰে পৰা কার্যালয়টো প্রশিক্ষণ আৰু পৰিচালনা কামত ব্যৱহৃত হৈ আছিল। আনহাতে, ভাৰতৰ সিন্দূৰ অভিযানৰ সময়ত জইচ-ই-মহম্মদৰ মুৰব্বীৰ পৰিয়ালৰ ১০ জন সদস্য নিহত হয়। এই তথ্য সংগঠনটোৰ মুৰব্বীজনে নিজে প্রকাশ কৰিছিল। তদুপৰি সিন্দুৰ অভিযানৰ সময়ত তেওঁ চাৰিজন সহযোগীকো হেৰুৱায়।
উল্লেখ্য যে ১৯৯৪৩ ভাৰতে মাছুদ আজহাৰক গ্ৰেপ্তাৰ কৰে। অৱশ্যে ১৯৯৮৩ সন্ত্রাসবাদীয়ে ইণ্ডিয়ান এয়াৰলাইন্সৰ এখন বিমান কান্দাহাৰলৈ অপহৰণ কৰি নি আজহাৰক মোকলাই নিয়ে। শেহতীয়া সিন্দূৰ অভিযানৰ সময়ত আজহাৰে তেওঁৰ ভগ্নী, ভগ্নীৰ স্বামী, ভতিজা আৰু পৰিয়ালৰ পাঁচটি শিশু হেৰুৱায়।
২৬/১১ মুম্বাই আক্ৰমণৰ অভিযুক্ত আজহাৰক ৰাষ্ট্ৰসংঘৰ নিৰাপত্তা পৰিষদে সন্ত্রাসবাদী ঘোষণা কৰি থৈছে। তদুপৰি ভাৰত চৰকাৰেও তেওঁক সন্ত্রাসবাদী ঘোষণা কৰি থৈছে।
মাছুদ ২০১৬ৰ পাঠানকোট আক্রমণতো জড়িত আছিল। উল্লেখ্য যে সন্ত্রাসবাদীৰ পৃষ্ঠপোষকতা কৰা সত্ত্বেও পাকিস্তানৰ স’তে সম্পর্ক অধিক উন্নত কৰিছে ট্রাম্প প্রশাসনে।
