Mumbai Rain:✒️কেবাদিনো হোৱা ধাৰাসাৰ বৰষুণৰ অন্তত আজি মুম্বাই আৰু কাষৰীয়া অঞ্চলত ৰ’দ দেখিবলৈ পোৱা গৈছে! মহানগৰীৰ ৰাজপথৰ পৰা ক্ৰমান্বয়ে পানী কমিছে।
বাছসেৱাও সচৰাচৰৰ দৰে পুনৰ আৰম্ভ হৈছে। যদিও বেছি দিনলৈ নাথাকিব এই সকাহ ।
বতৰ বিজ্ঞান বিভাগে জনাইছে যে বৃহস্পতিবাৰেও মুম্বাইকে ধৰি উত্তৰ কোংকনৰ কিছু অঞ্চলত প্ৰবলৰ পৰা অতি প্ৰবল বৰষুণৰ সম্ভাৱনা আছে। অৱশ্যে স্বাভাৱিক জীৱনত আৰু কোনো ধৰণৰ বিপৰ্যস্ত হোৱাৰ সম্ভাৱনা নাই।
মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাদনভিছে কয় যে মুম্বাইকে ধৰি ৰাজ্যখনৰ দুৰ্যোগ পৰিস্থিতি বৰ্তমান নিয়ন্ত্ৰণত আছে।
ৰাজ্যৰ যিবোৰ অঞ্চলত প্ৰচণ্ড বৰষুণ সংঘটিত হৈছে সেইবোৰ অঞ্চলত ৰাষ্ট্ৰীয় আৰু ৰাজ্যিক দুৰ্যোগ সঁহাৰি বাহিনীৰ জোৱান মোতায়েন কৰি দুৰ্যোগ ব্যৱস্থাপনা সম্পৰ্কীয় সকলো প্ৰয়োজনীয় সাৱধানতা অৱলম্বন কৰা হৈছে।
ফাদনভিছে কয়, “ৰাজ্য চৰকাৰে ইতিমধ্যে জলাশয়ৰ পৰা পানী এৰি দিয়াৰ বাবে চুবুৰীয়া ৰাজ্যসমূহৰ স’তে যোগাযোগ কৰিছে। মুম্বাই আৰু মহাৰাষ্ট্ৰৰ অন্যান্য অঞ্চলৰ সামগ্ৰিক বৰষুণৰ পৰিস্থিতি নিয়ন্ত্ৰণলৈ আহিছে।কিন্তু এতিয়াও কিছু অঞ্চলত ধাৰাসাৰ বৰষুণৰ সম্ভাৱনা আছে। ”
মুখ্যমন্ত্রীয়ে লগতে জনাইছে, এই বিগত কিছুদিনৰ বৰষুণৰ ফলত সমগ্ৰ মহাৰাষ্ট্ৰৰ ১৪ লাখ হেক্টৰ মাটিত শস্যৰ ক্ষতি হৈছে৷ পৰিস্থিতিৰ বুজ লোৱাৰ পাছত ৰাজ্যই ক্ষতিগ্ৰস্ত কৃষকসকলক চৰকাৰী সাহায্য প্ৰদানৰ আশ্বাস দিছে।