Ukrainian vessel:✒️স্থলসেনাক ধ্বংস কৰাৰ পাছত এইবাৰ জলপথত আক্ৰমণ। ৰাছিয়াৰ ড্ৰ’ন আক্ৰমণত ডুব গ’ল ইউক্ৰেইনৰ আটাইতকৈ ডাঙৰ যুদ্ধজাহাজ ছিমফেৰ’পল।
এতিয়ালৈকে এই আক্ৰমণত দুজন নৌসেনাৰ জোৱানৰ মৃত্যু হোৱাৰ লগতে আৰু বহুতো সন্ধানহীন হৈছে।
উদ্ধাৰ অভিযান আৰম্ভ হৈছে। ছচিয়েল মিডিয়াত ভাইৰেল হৈছে এই মাৰাত্মক আক্ৰমণৰ এটা ভিডিঅ’।
এক দশকৰো অধিক সময় ধৰি ছিমফেৰ’পল ইউক্ৰেইনৰ সৰ্ববৃহৎ জাহাজ হিচাপে পৰিচিত আছিল।ৰেডিঅ’, ইলেক্ট্ৰনিক, ৰাডাৰ, অপটিকেল চিষ্টেমেৰে লাগুনা শ্ৰেণীৰ জাহাজখন সজ্জিত। ইয়াত যুদ্ধাস্ত্র হিচাপে আছিল ৩০ মিমি এ কে ৩০৬ আৰ্টিলাৰী ব্যৱস্থা ।
ৰাছিয়াৰ প্ৰতিৰক্ষা মন্ত্ৰালয়ে জনোৱা মতে, যোৱা নিশা ইউক্ৰেইনৰ ডাবিউব নদীত এখন যুদ্ধ জাহাজ নৌসেনাৰ কামিকাজে ড্ৰ’নে খুন্দা মাৰে।কিছু মুহূৰ্তৰ ভিতৰতে বৃহৎ বিস্ফোৰণত জাহাজখন ডুব যায়।
ইউক্ৰেইনৰ নৌসেনাই স্বীকাৰ কৰিছে যে জাহাজখন ৰাছিয়াৰ আক্ৰমণত ডুব গৈছিল।ৰাছিয়াৰ সংবাদ সংস্থা টাছে প্ৰকাশ কৰা অনুসৰি ইউক্ৰেইনৰ এখন জাহাজ ধ্বংস কৰাৰ বাবে ৰাছিয়াৰ নৌসেনাৰ ড্ৰোনৰ এইটোৱেই প্ৰথম সফল ব্যৱহাৰ।
ইউক্ৰেইনৰ নৌসেনাই এক বিবৃতিত কয় যে এই আক্ৰমণত এতিয়ালৈকে দুজন ক্ৰু মেম্বাৰ নিহত হৈছে।
তদুপৰি এতিয়াও বহু লোক সন্ধানহীন হৈ আছে।তেওঁলোকৰ সন্ধানত উদ্ধাৰৰ কাম আৰম্ভ হৈছে।এই ঘটনাত আহত আৰু কেবাজনো লোকক উদ্ধাৰ কৰা হৈছে।
মন কৰিবলগীয়া যে ৰাছিয়া আৰু ইউক্ৰেইনৰ মাজত যুদ্ধ বন্ধ কৰাৰ ক্ষেত্ৰত আমেৰিকাই দীৰ্ঘদিন ধৰি সক্ৰিয় হৈ আহিছে।
এই বিষয়ত আমেৰিকাৰ ৰাষ্ট্ৰপতি ড’নাল্ড ট্ৰাম্পে নিজেই পুটিনৰ স’তে বৈঠকত মিলিত হৈছে। যদিও কোনো সমাধান পোৱা নাই। ৰাছিয়াই শান্তিৰ চৰ্তত ইউক্ৰেইনৰ ডনেটস্ক অঞ্চল এৰি যাবলৈ বাৰ্তা প্ৰেৰণ কৰিছে।
কেৱল জেলেনস্কিয়েই এই প্ৰস্তাৱ গ্ৰহণ কৰা নাই।এই পৰিস্থিতিত দুয়োখন দেশৰ মাজত যুদ্ধ আৰু অধিক বৃদ্ধি পাইছে। শেহতীয়াকৈ ৰাছিয়াই ইউক্ৰেইনৰ ৰাজধানী কিয়েভত ভয়ংকৰ ড্ৰ’ন আক্ৰমণ চলাইছিল। এই আক্ৰমণত কমেও ১৮ জন লোক নিহত হয়। আহত হৈছে কমেও ৪৮ জন। ইয়াৰ মাজতে এইবাৰ জলপথত আক্ৰমণ আৰম্ভ হৈছে।
