Crime:✒️শেহতীয়া ২০২৩ৰ অপৰাধৰ তথ্য অনুসৰি, অসমত পঞ্জীয়ন হোৱা উল্লিখিত অপৰাধৰ সংখ্যাৰ ভিতৰত ৪৯,৮৮৪টা অপৰাধ ভাৰতীয় দণ্ড বিধি আইনৰ অধীনত সংঘটিত হৈছিল। এই অপৰাধসমূহৰ ভিতৰত আছে ১,০২৫টা হত্যাকাণ্ড, য’ত ভুক্তভোগীৰ সংখ্যা হৈছে ১,০৪৭জন। একেদৰে ২০২৩ত অসমত হিট এণ্ড ৰাণৰ ১,২১১টা গোচৰ পঞ্জীয়ন হৈছিল আৰু এই গোচৰসমূহত ভুক্তভোগীৰ সংখ্যা হৈছে ১,২৭৩ জন।
ইয়াৰ উপৰি উল্লিখিত বৰ্ষটোত ১০১টা যৌতুকৰ দাবীত হত্যাৰ ঘটনা সংঘটিত হৈছে, য’ত ১০৭ গৰাকী ভুক্তভোগী। একেদৰে ২০২৩ত ৰাজ্যত ২০৪টা আত্মহত্যাৰ ঘটনা সংঘটিত হয়, য’ত ভুক্তভোগীৰ সংখ্যা হৈছে ২১৩জন। লগতে হত্যাৰ অপচেষ্টাৰ ৯০৩টা, আক্ৰমণ কৰি আহত কৰা ৫,৩৮৭টা, এচিড আক্ৰমণৰ ১০টা, মহিলাৰ ওপৰত আক্ৰমণৰ ৮৯৮টা, যৌন আতিশয্যৰ ২০৯টা, ৩,৫৬৩টা অপহৰণৰ ঘটনা, মানৱ সৰবৰাহৰ ৯৬টা (আইপিচি), ৯৮৯টা ধৰ্ষণৰ ঘটনা আৰু ধৰ্ষণৰ অপচেষ্টাৰ ১৭৩টা গোচৰ ২০২৩ত ৰাজ্যত বিভিন্ন থানাত ৰুজু হৈছে।
ইয়াৰ উপৰি এই বৰ্ষটোত ১২,৭৯৫টা চুৰিৰ ঘটনা, ২,৯২৪টা বাহন চুৰি ঘটনা, ৭৬৫টা ডকাইতি ঘটনা, ধনদাবী-ব্লেকমেইলিঙৰ ৫৬৭টা, জালিয়াতি-প্ৰতাৰণাৰ ৪,০৪৮টা, ৰাজহুৱা স্থানত তীব্ৰ গতিত বাহন চলোৱাৰ ৪,১৫৩টা ঘটনা তথা গোচৰ ৰুজু হৈছিল। একেদৰে ৰাজ্যখনত উল্লিখিত বৰ্ষত ৪,৮১৭টা অর্থনৈতিক অপৰাধ সংঘটিত হয় আৰু ইয়াৰে গৰিষ্ঠ সংখ্যকে ঠগ-প্ৰৱঞ্চনাৰ ঘটনা।
একেদৰে দুৰ্নীতিৰ ১১০টা গোচৰ ৰুজু হৈছিল, য’ত ১২টা আয়বহির্ভূত সম্পত্তিৰ গোচৰ আছে আৰু এই গোচৰসমূহত ১১৭জনক গ্ৰেপ্তাৰ কৰা হৈছিল। ইয়াৰ উপৰি চাইবাৰ অপৰাধৰ ৯০৯টা ঘটনা ২০২৩ত সংঘটিত হয়। উল্লেখ্য যে এই বৰ্ষটোত ৰাজ্যখনত আইপিচি আইনৰ অধীনত ৰুজু হোৱা সৰ্বমুঠ গোচৰৰ বিপৰীতে আৰক্ষীয়ে মুঠ ৫১,৮৫৮জন লোকক গ্ৰেপ্তাৰ কৰিছিল।
ইয়াৰে ৫১,২৮৪জন পুৰুষ আৰু ৫৭৪ গৰাকী মহিলা। একেদৰে বিশেষ আৰু ৰাজ্যিক আইনৰ অধীনত ১৮,৬৫০ জন লোকক গ্ৰেপ্তাৰ কৰা হৈছিল।
ব্যক্তিগত শত্রুতাৰ বাবে সংঘটিত হৈছিল ২৩০টা হত্যাকাণ্ড
ইফালে, ২০২৩ত সংঘটিত ১,০২৫টা হত্যাকাণ্ডৰ ঘটনাত ১,০৪৭জন লোক ভুক্তভোগী হয়। ইয়াৰে ২৩০টা হত্যাকাণ্ড ব্যক্তিগত শত্রুতাৰ বাবে সংঘটিত হৈছিল। একেদৰে যৌতুকৰ বাবে ২৪টা, প্রেম সম্পর্কীয় কাৰণত ৩০টা, অবৈধ সম্পৰ্কৰ ফলত ১৬টা, সম্পত্তি-পৰিয়াল আদি বিবাদৰ ফলত ২৪৬টা হত্যাকাণ্ড সংঘটিত হৈছিল। ইয়াৰ উপৰি ৩১টা হত্যাকাণ্ডৰ কোনো মটিভনাছিল। উল্লেখ্য যে এই হত্যাকাণ্ডসমূহত সর্বাধিক ৩০ৰ পৰা ৪৫ বছৰৰ বয়সৰ ৫১৪জন লোক ভুক্তভোগী হৈছিল। ইয়াৰে ৩৬৮জন পুৰুষ আৰু ১৪৬গৰাকী মহিলা ভুক্তভোগী। একেদৰে ৪৫ৰ পৰা ৬০ বছৰ বয়সৰ এশজন, ১৮ৰ পৰা ৩০ বছৰ বয়সৰ ৩৭৭জনৰ লগতে ৫৬জন শিশু ভুক্তভোগী আছে।
২০২৩ত ৩,৫৬৩টা অপহৰণ কাণ্ড
আনহাতে, ২০২৩ত ৰাজ্যখনত ৩,৫৬৩টা অপহৰণ কাণ্ড সংঘটিত হয়। ইয়াৰ ভুক্তভোগীসকলৰ ভিতৰত নজন ছবছৰ ভিতৰৰ শিশু, ১১৪ জন ছবছৰ পৰা ১২ বছৰ বয়সৰ শিশু, ৬২৩জন ১২ৰ পৰা ১৬ বছৰৰ শিশু, ১,০৪১ জন ১৬ৰ পৰা ১৮ বছৰ বয়সৰ কিশোৰ। অর্থাৎ উল্লিখিত অপহৰণ কাণ্ডৰ সংখ্যাৰ ভিতৰত ১,৭৮৭ গৰাকী শিশু ভুক্তভোগী আছিল, য’ত ১৬১জন নাবালক আৰু ১,৬২৬ গৰাকী নাবালিকা আছে। একেদৰে ১৮ৰ পৰা ৩০ বছৰ বয়সৰ ১,১৮৩ জন (৬২ পুৰুষ-১,১২১ মহিলা), ৩০ৰ পৰা ৬০ বছৰৰ ভিতৰত ৬৬৫জন (১০৫ পুৰুষ-৫৬০ মহিলা) আৰু পাঁচ জন ৬০ বছৰৰ ওপৰৰ ভুক্তভোগী লোক আছিল।
নাৰীৰ বিৰুদ্ধে ১২,০৭০টা অপৰাধ
ইফালে, ২০২৩ত ৰাজ্যত নাৰীৰ বিৰুদ্ধে ১২,০৭০টা অপৰাধ সংঘটিত হয়। ইয়াৰে ১৩টা (ভুক্তভোগী ১৪গৰাকী) ধর্ষণ তথা দলবদ্ধ ধর্ষণ কৰি হত্যা কৰা অপৰাধ সংঘটিত হৈছিল। একেদৰে যৌতুক হত্যা ১০১টা, আত্মহত্যা ১০২টা (ভুক্তভোগী ১১১ গৰাকী), গৰ্ভপাতৰ চাৰিটা, এচিড আক্ৰমণৰ চাৰিটা, এচিড আক্ৰমণৰ অপচেষ্টাৰ দুটা, স্বামী তথা পৰিয়ালৰ নিৰ্যাতনৰ ২,৯২৩টা, নাৰী অপহৰণৰ ৩,১১০টা, নাৰী সৰবৰাহৰ ৮১টা, ৯৮৯টা ধর্ষণ (ভুক্তভোগী ১,০৩৩) গৰাকী), ধৰ্ষণৰ অপচেষ্টাৰ ১৭৩টা অপৰাধৰ ঘটনা সংঘটিত হয়।
ৰাজহুৱা সম্পত্তি ধ্বংসৰ দুশটা ঘটনা
ইফালে, ২০২৩৩ ২৭৮টা ৰাজ্যখনৰ বিৰুদ্ধে অপৰাধ সংঘটিত হয়। ইয়াৰে দুশটা ৰাজহুৱা সম্পত্তি ধ্বংসৰ ঘটনা তথা গোচৰ ৰুজু হৈছিল। লগতে ৭৩টা বেআইনী কাৰ্যকলাপৰ ঘটনা উল্লিখিত বর্ষটোত সংঘটিত হৈছিল।
চৰকাৰী ৰেল আৰক্ষীৰ অধীনত ৮৬৯টা অপৰাধ
আনহাতে, ২০২৩ত অসমত চৰকাৰী ৰেল আৰক্ষীৰ অধীনত ৮৬৯টা অপৰাধ সংঘটিত হয়। ইয়াৰে ১২টা হত্যাকাণ্ড, তিনিটা আত্মহত্যা, দুটা হত্যাৰ অপচেষ্টা, ২৩টা আক্রমণ, ১১টা অপৰহণ, দুটা মানৱ সৰবৰাহ, তিনিটা শিশু বিক্ৰী, ৪৭৮টা চুৰিৰ ঘটনা। একেদৰে ৰেল সুৰক্ষা কৰ্মী তথা আৰপিএফৰ অধীনত ৰাজ্যত ৮,৭৯২টা গোচৰ ৰুজু হয়।
১,৭৫০জন শিশু নিরুদ্দেশ-সন্ধান নাই ৪১৪জনৰ
ইফালে, ২০২৩ত ৰাজ্যত ১৮ বছৰৰ তলৰ ১,৭০৫জন শিশু নিরুদ্দেশ হৈছে। পূৰ্বৰ বৰ্ষত সন্ধান নোলোৱা পাঁচজনসহ শিশু নিৰুদ্দেশৰ সংখ্যা হৈছে ২,২০৫জন। নিরুদ্দেশ হৈ থকাসকলৰ ভিতৰত আছে ১,৫৮৯ গৰাকী ছোৱালী আৰু ৬১৬জন ল’ৰা। অৱশ্যে উল্লিখিত বর্ষটোত ১,৭৯১জনক উদ্ধাৰ আৰু সন্ধান সংশ্লিষ্ট বিভাগসমূহে লাভ কৰিছে যদিও ৪১৪জনৰ কোনো সন্ধান লাভকৰা নাই। একেদৰে উল্লিখিত বৰ্ষটোত ৰাজ্যত ৬,০৮১জন লোক নিৰুদ্দেশৰ গোচৰ ৰুজু হৈছিল। পূৰ্বৰ বৰ্ষৰ সন্ধান নোলোৱা ১,৭১৭জনসহ মুঠ নিৰুদ্দেশৰ সংখ্যা হয়গৈ ৭,৭৯৮জন। অৱশ্যে উল্লিখিত বৰ্ষটোত ইয়াৰে ৬,৩৩৩জনক উদ্ধাৰ তথা সন্ধান লাভ কৰাৰ বিপৰীতে ১,৪৬৫ জনৰ কোনো সন্ধান পোৱা নগ’ল।
আৰক্ষীৰ জিম্মাৰ পৰা পলায়নৰ চেষ্টা কৰা ৫৬টা ঘটনা
ইফালে, ২০২৩ত অসম আৰক্ষীৰ জিম্মাৰ পৰা অভিযুক্তই পলায়নৰ চেষ্টা কৰা ৫৬টা গোচৰ পঞ্জীয়ন হৈছিল। ইয়াৰে এটা লকআপৰ পৰা আৰু ৫৬টা লক্আপৰ বাহিৰৰ পৰা পলায়নৰ চেষ্টা কৰা ঘটনা। ইয়াৰে ২৩জনক পুনৰ কৰায়ত্ত কৰা হয়। আনহাতে, উল্লিখিত বৰ্ষটোত অসমত আৰক্ষীৰ বিৰুদ্ধে ২৭টা গোচৰ ৰুজু হৈছিল।
১৮৫টা অবৈধ মাৰণাস্ত্র-১,৩৫৭টা গোলা-বাৰুদ জব্দ
আনহাতে, ২০২৩ত ৰাজ্যখনত ১৮৫টা অবৈধ মাৰণাস্ত্রসহ ১,৩৫৭টা গোলা-বাৰুদ জব্দ হয়। একেদৰে অনুজ্ঞাপত্ৰ থকা দুটা মাৰণাস্ত্ৰও আৰক্ষীয়ে জব্দ কৰে। লগতে উল্লিখিত বৰ্ষটোত দুহেজাৰটকীয়া ৮৫২খন ভাৰতীয় টকা (১৭,০৪,০০০ টকা), ১,১০৬ খন পাঁচশটকীয়া (বন্ধ হোৱা পুৰণি টকাও অন্তর্ভুক্ত) ভাৰতীয় টকা (৫৫,৩০০০), ২৩২খন দুশটকীয়া, ২০৪খন এশটকীয়াসহ সর্বমুঠ ২৩,২৪,১৬০ টকা জব্দ কৰা হয়। ইয়াৰ উপৰি ২০২৩ত নকল ১,৮৮,১৯,৫৭০ টকা (ভাৰতীয়) জব্দ কৰা হয়।