Zubeen Garg:✒️জুবিন গাৰ্গক হত্যাৰ অভিযোগৰ অন্তৰালত বিত্তীয় লেনদেনৰ দিশটোরে চলিত তদন্ত প্রক্রিয়াত বিশেষ গুৰুত্ব লাভ কৰিছে। এছআইটি এই কথাত নিশ্চিত হৈছে যে বিত্তীয় দিশত জুবিনৰ লগত মেনেজাৰ সিদ্ধার্থ শৰ্মাৰ মনোমালিন্যই ক্রমে গুৰুতৰ ৰূপ লৈছিল। জুবিন ধনৰ বিষয়ক লৈ উদাসীন আছিল।
শেহতীয়াকৈ বিষয়টোত জুবিনে মন দিবলৈ বাধ্য হৈছিল। তেতিয়াই সিদ্ধার্থৰ বহু কথাক লৈ জুবিনৰ আপত্তি বৃদ্ধি পাইছিল। সেই কাৰণে বিত্তীয় দিশটো নিজেই পৰীক্ষা কৰিব বুলি ঘনিষ্ঠ কে’ৰাজনৰ আগত প্রকাশ কৰিছিল এনে কাৰণতে জুবিনক ছিংগাপুৰলৈ নি কৌশলবে অবজ্ঞা কৰিছিল নেকি সিদ্ধার্থই?
এই ক্ষেত্রত সিদ্ধার্থৰ সহযোগীও আছিল নেকি কোনোবা? ইয়াৰ অনুসন্ধানো চলিছে এছআইটিত। নর্থ-ইষ্ট ফেস্টিভেলৰ মূল উদ্যোক্তা শ্যামকানু মহন্তকো হত্যাৰ অভিযোগত গ্রেপ্তাৰ কৰা হৈছে। জুবিন গাৰ্গৰ হত্যাৰ অভিযোগত সিদ্ধার্থ আৰু শ্যামকানু একেলগে গ্ৰেপ্তাৰ হোৱাটো তাৎপর্যপূর্ণ।
কালি এছআইটিৰ লগতে সাংবাদিকৰ আগতো জুবিনৰ ঘনিষ্ঠ ব্যৱসায়ী বংকিম চন্দ্র বায়মেধিয়ে কয় যে খাৰঘুলিৰ মাটি এটুকুৰা কিনিব বিচাৰি যেতিয়া টকাৰ অভাৱত ভূগিছিল, তেতিয়া তেওঁ জুবিনক টকা-পইচাৰ দিশটোত মন দিবলৈ আহ্বান জনাইছিল। ৰায়মেধিয়ে কয়, ‘জুবিনে যেতিয়া প্রয়োজন হোৱা টকা নাই বুলি কৈছিল, তেতিয়া মই কৈছিলো-তোমাৰতো টকা থাকিব লাগিছিল? তুমি অলপ চোৱা উচিত। জুবিনে তেতিয়া মোক টকাৰ হিচাপ-নিকাচ চাব বুলি কৈছিল। জুবিনৰ টকা-পইচাৰ হিচাপ নাছিল। কথাবোৰ বহুতে আহি আমাক কয়।
যোৱা ডিচেম্বৰৰ আগত জুবিনক মই এই কথাটোও কৈছিলো। তেতিয়া জুবিনে কৈছিল- এদিন বহি হিচাপ-নিকাচ কৰি ল’ম।’ টকাবোৰ ক’লৈ গ’ল বুলি জুবিনে প্রশ্ন কৰাৰ কথা ৰায়মেধিয়ে এছআইটিৰ আগত সদৰী কৰে বুলি সূত্ৰত প্রকাশ। বায়মেধিয়েও জুবিনৰ ন্যায় দাবী কৰে।
আজি এছআইটিয়ে বক্তব্য লিপিবদ্ধ কৰে শব্দযন্ত্রী তথা জুবিনৰ পৰিয়ালৰ ব্যক্তি দিগন্ত শৰ্মাৰ। জুবিনৰ মৃত্যুক লৈ তেওঁ কে’বাটাও প্রশ্ন কৰে। শৰ্মাই কয়, ‘জুবিন আমাৰ বুকুৰ মানুহ। সি ঢুকাল বুলি মই ক’ব নোৱাৰো। আমি এটা পৰিয়ালৰ মানুহ। আমি জুবিনক জীয়াই ৰাখিবই লাগিব। জুবিনে ন্যায় নাপায়, কাৰণ ন্যায় পাবলৈ জুবিন আমাৰ মাজত নাই; কিন্তু আমি কথাবোৰ জানিব লাগিব। ঘটনাটো প্রকৃততে কি আছিল, কেনেকৈ সি হেৰাই গ’ল, আমি জানিব লাগিব।’
জুবিনৰ মৃত্যুক লৈ প্ৰচাৰ হোৱা ভিডিঅ’বোৰৰ বাহিৰেও আৰু ভিডিঅ’ থকা বুলি দিগন্ত শর্মাই কয়। বাকী ভিডিঅ’বোৰ ক’লৈ গ’ল বুলি প্রশ্ন কৰি শৰ্মাই স্পষ্ট কৰি দিয়ে যে সম্পূর্ণ অৱজ্ঞাত জুবিন গাৰ্গ চিৰদিনলৈ হেৰাই গ’ল। তেওঁ কয়, ‘আমি জুবিনৰ এনে পৰিণতি হ’বলৈ নিদিলোহেঁতেন। কাৰণ আমি জানো জুবিনৰ বিপদ ক’ত আছে? সি পানী-জুইৰ ওচৰলৈ যাব নোৱাৰে। বাথৰূমলৈ গ’লেও সি ভিতৰৰ পৰা দৰ্জা নামাৰে। তেনেস্থলত তাক বাৰে বাৰে পানীত নমোৱা হ’ল। চূড়ান্ত অৱজ্ঞাৰ বলি হ’ল জুবিন।’
ইপিনে, কালি এছআইটিৰ সম্মুখত দ্বিতীয়বাৰলৈ হাজিৰ হয় নর্থ-ইষ্ট ফেস্টিভেলৰ জনসম্পৰ্কৰক্ষী বিষয়া অনুজ কুমাৰ বৰুৱা। আজি বৰুৱাৰ ভাষ্যত স্পষ্ট হয় যে জুবিন গাৰ্গৰ মৃত্যুৰ পাছতো শ্যামকানুরে নর্থ-ইষ্ট ফেস্টিভেলৰ কাৰ্যসূচী অব্যাহত ৰাখিছিল। আনকি ছিংগাপুৰৰ ভাৰতৰ উচ্চায়ুক্তৰ কাৰ্যালয়েও নর্থ-ইষ্ট ফেস্টিভেলৰ কাৰ্যসূচী বন্ধ হোৱা বুলি ঘোষণা কৰিছিল। তাৰ পাছতো ফেশ্বন শ্ব’ৰ দৰে বিনোদনধর্মী কাৰ্যসূচী ৰূপায়ণ কৰাটো পৰৱৰ্তী সময়ত বৰুৱাই ভিডিঅ’ত দেখিবলৈ পাইছিল বুলি সদৰী কৰে।
কালি ন্যায়িক তদন্ত আয়োগৰ আগত ভাষ্য প্রদান কৰে জুবিনৰ বাদ্যযন্ত্রী পার্থপ্রতিম গোস্বামীয়ে। ইয়াৰ বাবে চিআইডিৰ কাৰ্যালয়ত উপস্থিত হৈ গোস্বামীয়ে কয়, ‘পিশাচকেইটাই শাস্তি পাবই লাগিব। কোনো অধিবক্তাই যাতে পিশাচকেইটাক বচাবলৈ চেষ্টা নকৰে, তাৰ বাবে মই হাতযোৰ কৰিছো।’
পুনৰ চমন জাৰি
জুবিন গাৰ্গৰ লগত য়টত থকা সাতজন প্রবাসী অসমীয়াক কালি পুনৰ এছআইটিয়ে হাজিৰ হোৱাৰ চমন জাৰি কৰে। ইয়াৰ পূৰ্বে আঠজনক চমন দিছিল। তাৰে ৰূপকমল কলিতাই দুদিন এছআইটিৰ সম্মুখীন হৈ আজি ছিংগাপুৰলৈ উভতি যায়। পুনৰ চমন জাৰি কৰা কেইজন হ’ল তন্ময় ফুকন, অভিমন্যু তালুকদাৰ, দেৱজ্যোতি শইকীয়া, সিদ্ধার্থ বৰা, পৰীক্ষিত শর্মা, সুদীপ চেটার্জী, বাজিদ আহমেদ।
আনহাতে, কালি নতুনকৈ চমন জাৰি কৰে সুস্মিতা গোস্বামী নামৰ এগৰাকী যুৱতীক। ছিংগাপুৰত অধ্যয়ন কৰি থকা যুৱতীগৰাকীয়েও য়টখনত আছিল। জুবিনক হত্যাৰ গোচৰত গ্ৰেপ্তাৰ হোৱা অমৃতপ্রভা মহন্তৰ লগতে সুস্মিতা গোস্বামীয়েও সেইদিনাৰ ঘটনাৰ ভিডিঅ’ কৰিছিল।
এছআইটিৰ কামক লৈ অসন্তুষ্টি মানৱ অধিকাৰ আয়োগৰ সদস্যৰ
জুবিন গাৰ্গৰ হত্যাৰ তদন্ত এছআইটিয়ে যি ধৰণে অব্যাহত ৰাখিছে, তাকে লৈ অসন্তুষ্টি প্রকাশ কৰিছে, অসম ৰাজ্যিক মানৱ অধিকাৰ আয়োগৰ সদস্য শান্তনু ভৰালীয়ে। ৰাজ্যিক বিজেপিবো এজন জ্যেষ্ঠ নেতা ভৰালীয়ে আজি এই সন্দর্ভত কে’বাটাও মন্তব্য কৰে।
তেওঁ কয়, ‘ঘটনা সংঘটিত হোৱা আজি ২১ দিন পাৰ হ’ল। অথচ তদন্তকাৰী দল ঘটনা সংঘটিত হোৱা স্থানলৈ যোৱা নাই। ঘটনা সংঘটিত কৰা স্থানত তদন্ত কৰাটো তদন্ত প্রক্রিয়াৰ এটা মূল বিষয়। ইতিমধ্যে তদন্তকাৰী দল সেই স্থানলৈ যাব লাগিছিল। পৃথিৱীত এনে কোনো আইন নাই যে এটা হত্যাকাণ্ডৰ তদন্তৰ ক্ষেত্ৰত কোনো দেশে সহযোগ নকৰিব। তাতে ছিংগাপুৰ হ’ল ভাৰতৰ বন্ধু ৰাষ্ট্ৰ।’
ভৰালীয়ে আশংকা প্রকাশ কৰে যে ঘটনা সংঘটিত হোৱা স্থানলৈ তদন্তকাৰী দল নগ’লে জুবিন গাৰ্গৰ ন্যায় প্রাপ্তি কিমান ফলপ্রসূ হ’ব, সেয়া সময়তহে স্পষ্ট হ’ব। আকৌ বিহপান কৰাই জুবিনক হত্যা কৰাৰ যি অভিযোগ এজন অভিযুক্তই উত্থাপন কৰিছে, সেই বিষয়ত এজন অধিবক্তাও হোৱাৰ অভিজ্ঞতাৰে ভৰালীয়ে কয় যে এই অভিযোগ প্রমাণ কৰিবলৈ হ’ল আদালতত বিহ দিয়া পাত্ৰ আৰু খাদ্যৰ সবিশেষ দাখিল কৰিব লাগিব। তদুপৰি ফৰেনচিকৰ প্ৰতিবেদনো লাগিব। অন্যথা আদালতৰ মজিয়াত এই অভিযোগ প্রমাণিত নহ’ব। তাৎপর্যপূর্ণভাৱে ভৰালীয়ে কয়, ‘মৃত্যুৰ ৰহস্য কল্পনা কৰি তদন্ত কৰাটো সম্ভৱ নহয়।’