Street dog :✒️দেশত গৰাকীবিহীন পথ কুকুৰৰ সংখ্যা দ্রুতগতিত বৃদ্ধি পাইছে। একে সময়তে বৃদ্ধি পাইছে কুকুৰে মানুহক কামোৰা বা আক্রমণ কৰাৰ ঘটনা। ইতিমধ্যে পথ কুকুৰৰ এই সমস্যাৰ বিষয়টো ন্যায়ালয়ৰ বিচাৰাধীন হৈছে।
উচ্চতম ন্যায়ালয়ে এই বিষয়টো নিজাববীয়াকৈ বিচাৰৰ বাবে লৈ ইয়াৰ শুনানি গ্রহণ কৰাৰ লগতে সকলো ৰাজ্য চৰকাৰলৈ প্রয়োজনীয় তথ্য দাখিল কৰাৰ নির্দেশ দিছিল। এই বিষয়ত এজন আবেদনকাৰী আৰু প্ৰাক্তন কেন্দ্রীয় মন্ত্রী বিজয় গোৱেলে সদৰী কৰা অনুসৰি ভাৰতত কমেও ১২ কোটি পথ কুকুৰ আছে।
কেৱল দিল্লীতে গৰাকীবিহীন ১০ লাখৰো অধিক কুকুৰে পথত মুক্ত বিচৰণ কৰিছে। চৰকাৰী পৰিসংখ্যাত লগতে উল্লেখ কৰা অনুসৰি প্ৰতি বছৰে ভাৰতত গড়ে ৩৭ লাখৰ অধিক লোকক কুকুৰে আক্ৰমণ কৰাৰ ঘটনা সংঘটিত হৈছে।
কুকুৰৰ এনে আক্রমণত মহিলা, শিশু, বৃদ্ধ লোকৰ প্ৰাণহানিৰ ঘটনাও হৈছে। গোরেলে আদালতত এইদৰে কয়, ‘গৰাকীহীন কুকুৰৰ সংখ্যা বঢ়াৰ ফলত কুকুৰে কামোৰাৰ ঘটনাও বাঢ়িছে। এই সমস্যা এতিয়া ৰাষ্ট্ৰীয় পৰ্যায়ৰ চিন্তাৰ বিষয়ত পৰিণত হৈছে। উচ্চতম ন্যায়ালয়ে নিজাববীয়াকৈ বিষয়টো বিবেচনাৰ বাবে গ্রহণ কৰিছে আৰু ময়ো এই বিষয়ত আবেদন জনাইছিলো। আমাৰ মূল প্রশ্নটো হৈছে কুকুৰে কামোৰাৰ ঘটনাৰ পৰা সাধাৰণ ৰাইজক কেনেকৈ ৰক্ষা কৰিব পাৰি। আদালতে এই বিষয়ত সমাধান সূত্র উলিয়াব লাগিব।’
ইফালে উচ্চতম ন্যায়ালয়ে শুনানিৰ সময়ত কয় যে বাতৰি কাকতত সদায় পথ কুকুৰে মানুহক আক্রমণ কৰাৰ বাতৰি প্ৰচাৰ হৈ আহিছে। পথ কুকুৰৰ এই সমস্যাৰ কাৰণত বিশ্বজুৰি ভাৰতৰ বদনাম হোৱা বুলিও সর্বোচ্চ ন্যায়ালয়ে উদ্বেগ প্ৰকাশ কৰি কয় যে ছিংগাপুৰ, জার্মানী বা আমেৰিকাৰ দৰে দেশত পথত কুকুৰে মানুহক আক্রমণ কৰাৰ ঘটনা প্রত্যক্ষ নহয়। উচ্চতম ন্যায়ালয়ে এই বিষয়ত তিনিটা নির্দেশনা জাৰি কৰিলে।
গৰাকীহীন কুকুৰক প্ৰজনন ক্ষমতাহীন কৰা, পথ কুকুৰক নিৰ্ধাৰিত স্থানত খাদ্যৰ যোগান ধৰা আৰু মানুহক আক্রমণ কৰা কুকুৰক পিঞ্জৰাত বন্দী কৰি পশুগৃহলৈ প্ৰেৰণৰ বাবে সর্বোচ্চ ন্যায়ালয়ে নির্দেশনা দিলে।
আবেদনকাৰী গোৱেলে কয় যে পথ কুকুৰৰ সমস্যা কেৱল দিল্লীতে সীমিত নহয়, এই সমস্যাই সমগ্র দেশকে প্রভাবিত কৰিছে। পথ কুকুৰৰ সমস্যাৰ সন্দর্ভত উচ্চতম ন্যায়ালয়ে সকলো ৰাজ্যক তথ্যৰ যোগান ধৰিবলৈ নির্দেশ দিছিল যদিও বর্তমানলৈকে কেবল পশ্চিমবংগ আৰু তেলেংগানাইহে প্রয়োজনীয় তথ্য দাখিল কৰিলে।
সর্বোচ্চ ন্যায়ালয়ে সকলো ৰাজ্যৰ মুখ্য সচিবক অহা তিনি নৱেম্বৰত ব্যক্তিগতভাবে আদালতত উপস্থিত হ’বলৈ আৰু নিজৰ প্ৰতিবেদন জমা দিবলৈকো সময় পুনৰ বান্ধি দিলে।