CockroachJanataParty : দৈনিক অগ্ৰদূত ডিজিটেল ডেস্কঃ ককৰোচ জনতা পাৰ্টিৰ দুই নেতা সৌৰভ দাস আৰু আশুতোষ ৰাংকাৰ জে’ল জিম্মাৰ ম্যাদ পুনৰ বৃদ্ধি কৰিছে আদালতে। আদালতৰ এই সিদ্ধান্তৰ তীব্ৰ বিৰোধিতা কৰিছে চিজেপিৰ প্ৰতিষ্ঠাপক অভিজিৎ দীপকে। তেওঁৰ ভাষ্য অনুসৰি, হত্যাৰ গোচৰত দোষী সাব্যস্ত হোৱা লোকক আদালতে মুক্তি দিছে, অথচ ককৰোচ নেতাসকলৰ জামিন মঞ্জুৰ কৰা নাই। আনহাতে, আদালতে আশুতোষ আৰু সৌৰভৰ বিৰুদ্ধে এটাৰ পাছত আনটো বিস্ফোৰক অভিযোগ উত্থাপন কৰিছে।
সোমবাৰে বিশেষ কাৰ্যবাহী দণ্ডাধীশৰ আদালতে জনায় যে ককৰোচৰ দুই নেতাই আৰু দুদিন জে’ল জিম্মাত থাকিব লাগিব। কাৰণ, তেওঁলোকৰ আইনৰ প্ৰতি শ্ৰদ্ধা নাই। আদালতৰ নিৰ্দেশনামাত আৰু কোৱা হৈছে যে এই দুই ককৰোচ নেতাই সাধাৰণ জনতাক যথেষ্ট প্ৰভাৱিত কৰিছে।
যন্তৰ-মন্তৰক প্ৰতিবাদস্থলীৰ তালিকাৰ পৰা আঁতৰাই দিয়াৰ পিছতো তাত প্ৰতিবাদ কৰিবলৈ ‘উচটনি’ দিছিল তেওঁলোকে। আদালতে সোঁৱৰাই দিয়ে যে শান্তি-শৃংখলা ভংগ কৰিব পৰা কাম নকৰাৰ চৰ্তত ১১ অক্টোবৰত মুকলি কৰি দিয়া হৈছিল দুই নেতাক। তাৰ পিছতো যন্তৰ-মন্তৰ আৰু কনট প্লেছৰ দৰে স্থানত আন্দোলনৰ আহ্বান জনাইছিল তেওঁলোকে।
আদালতৰ ভাষ্য অনুসৰি, ককৰোচৰ দুই নেতাই আইনৰ প্ৰতি কোনো সন্মান প্ৰদৰ্শন কৰা নাই। সাধাৰণ জনতাৰ শান্তি আৰু শৃংখলা ভংগকাৰী হিচাপেও দুই নেতাক গণ্য কৰিছে আদালতে। প্ৰতিবাদৰ বাবে নিৰ্ধাৰিত নোহোৱা স্থানত বাৰে বাৰে কাৰ্যসূচীৰ আহ্বান জনাইছে চিজেপিয়ে।
এই পৰিস্থিতিৰ প্ৰতি লক্ষ্য ৰাখি আদালতৰ মত, আইন ভংগ কৰাটো এই নেতাসকলৰ অভ্যাসত পৰিণত হৈছে। সেয়েহে, আগন্তুক দিনত জামিন লাভ কৰিলে এই দুই নেতাই পুনৰ আইন ভংগ নকৰিব বুলি নিশ্চিত হ’ব পৰা নাই আদালত। সেই কাৰণেই দুয়োকে পুনৰ কাৰাগাৰলৈ প্ৰেৰণ কৰা হৈছে। অহা বুধবাৰে চিজেপিৰ দুই নেতাক দণ্ডাধীশৰ সন্মুখত হাজিৰ কৰোৱা হ’ব।
উল্লেখ্য যে যোৱা মঙলবাৰে আৰক্ষীৰ নিষেধাজ্ঞা অমান্য কৰি বেৰিকেড অতিক্ৰম কৰি যন্তৰ-মন্তৰত প্ৰৱেশ কৰিছিল চিজেপিৰ দুই শীৰ্ষ নেতা আশুতোষ আৰু সৌৰভে। তাত তেওঁলোকে ত্ৰিৰংগা উৰুৱায়। ইয়াৰ পিছতে দুয়োকে গ্ৰেপ্তাৰ কৰে দিল্লী আৰক্ষীয়ে। আদালতে দুই নেতাক পাঁচ দিনৰ জে’ল জিম্মালৈ প্ৰেৰণ কৰাৰ নিৰ্দেশ দিছিল।
সোমবাৰে দিল্লী আৰক্ষীয়ে চিজেপিৰ দুই নেতাৰ জে’ল জিম্মাৰ ম্যাদ বৃদ্ধিৰ আবেদন জনায়। সেই আবেদন মঞ্জুৰ কৰে দণ্ডাধীশে। ককৰোচৰ অভিযোগ, নেতাসকলক কাৰাগাৰত বন্দী কৰি ৰখাৰ উদ্দেশ্যেই গোচৰৰ কাৰ্যক্ৰম দীঘলীয়া কৰা হৈছে।
