Roi Roi Binale:✒️বহু অপেক্ষাৰ অন্তত অৱশেষত আজি ছবিগৃহত মুক্তি পালে প্ৰাণৰ শিল্পী জুবিন গাৰ্গৰ অন্তিমখন ছবি ‘ৰৈ ৰৈ বিনালে’। এই ছবিয়ে অসমৰ ছবি উদ্যোগলৈ এনে এক জোৱাৰ আনিলে য’ত জুবিনে বিচৰাৰ দৰেই বহু বন্ধ হৈ থকা ছবিগৃহও মুকলি হ’ল।
ইপিনে, কালি নিশাৰ ভাগত প্ৰকাশ কৰা এটা প’ষ্টে তীব্র আলোড়নৰ সৃষ্টি কৰিছে। ফেচবুকত গৰিমাৰ এখন ফটো প্রকাশ কৰিছে য’ত জুবিনৰ হাতে লিখা এটা টোকা আছে। টোকাত লিখা আছে এইদৰে- ‘ৰৈ ৰৈ বিনালে’ মোৰ নতুন চিনেমা, চাবলৈ আহিবা ‘মৰম’ৰ জুবিনদা।’ৰৈ ৰৈ বিনালে’ৰ প’ষ্টাৰত লিখা থকা জুবিনৰ এই আহ্বানে তীব্র বিচলিত কৰিছে তেওঁৰ অনুৰাগীক।
ছিংগাপুৰলৈ যোৱাৰ পূৰ্বে ১৫ ছেপ্টেম্বৰত জুবিনে এই আখৰকেইটা লিখিছিল। গৰিমাই কালি ফেচবুকত এইদৰে কয়, ‘১৫ ছেপ্টেম্বৰত তুমি লিখা আখৰকেইটা… মৰম ভৰা এক আহ্বান তোমাৰ মৰমৰ ৰাইজলৈ! প্রতিটো কথাই বুকুখন খুন্দিয়াই যায় গল্ডী! কিন্তু এই সকলোবোৰৰ মাজত শূন্য বুকুখনত দদপাই জ্বলি আছে আন এসোপা প্রশ্ন– কি হৈছিল ১৯ ছেপ্টেম্বৰত?… কেনেকৈ, কিয়? শান্তি ক’তো নাই জানো, কিন্তু এই উত্তৰ নোপোৱালৈকে যেন উত্তৰো নাই।’
‘ৰৈ ৰৈ বিনালে’ মুক্তিৰ মুহূৰ্ততে এইদৰে প্ৰশ্নৰ উত্তৰ বিচাৰিছে গৰিমাই। এই প’ষ্টৰ তলত কমেও ৪৫ হেজাৰে প্ৰতিক্রিয়া প্রকাশ কৰিছে। লুৰীণজ্যোতি গগৈয়ে লিখিছে, ‘এই প্রশ্নসমূহৰ উত্তৰ আমাক লাগিবই। এটা এটা প্রশ্নৰ উত্তৰ আমি পাবই লাগিব। আপুনি ধৈর্য ধৰিব আমি আছো।’
জুবিনদাৰ এই চিঠিখন সযতনে ৰাখিব বুলি লিখিছে বহুজনে, জাষ্টিচ ফৰ জুবিন গাৰ্গ লিখি ভৰাই দিছে।
জীৱনত কেতিয়াও এনে দিন দেখা নাই
জুবিনৰ অতি ৰহস্যজনক মৃত্যু, বিগত ৪১ দিন ধৰি অনুৰাগী-ৰাইজৰ ভগ্ন হৃদয়ৰ ধপধপনি, এছআইটিৰ তদন্তক লৈ এটাৰ পাছত আনটো নিত্য নতুন পৰিঘটনা আদি এক ৰাজ্যই কাহানিও প্রত্যক্ষ নকৰা অভাৱনীয়-নজিৰবিহীন পৰিস্থিতিৰ মাজতে মাত্র কেইঘণ্টামান পাছতে মুক্তি লভিবলৈ সাজু হৈছে প্রিয় শিল্পীৰ অন্তিমখন ছবি ‘ৰৈ ৰৈ বিনালে’।
মুক্তিৰ পূৰ্বে অভিলেখ স্তম্ভ কৰা নজিৰবিহীন অভিজ্ঞতা কেৱল অসমেই নহয়, বিশ্বৰেই বহু স্থানলৈ কঢ়িয়াইছে ছবিখনে। কোনে প্রথম দর্শনীৰ ব্যৱস্থা কৰিব পাৰে তাৰ অঘোষিত প্রতিযোগিতাৰ মাজতে নিশ্চিত হ’ল যে গুৱাহাটীৰ মেট্রিক্সৰ চিনেমাত প্রথম দর্শনী প্রদর্শন হ’ব পুৱা ৪-২৫ বজাত।
বুক মাই শ্ব’ শীর্ষক টিকট ক্ৰয়ৰ এপৰ উপৰি টেলিফোনযোগেও বুকিঙৰ ব্যৱস্থা কৰা বুলি ছবিগৃহৰ কৰ্তৃপক্ষই জনাইছে। অথচ সন্ধিয়ালৈ উচ্চাৰিত হৈছিল ধেমাজিৰ আৰ আৰ চিনেমা নামৰ ছবিগৃহৰ নাম। সাতদিনলৈ ৪২টা দর্শনীৰ সম্পূৰ্ণ টিকট বিক্রী হোৱা এই চিত্রগৃহত আছে ১৭৪ খন আসন। জুবিনৰ ছবিৰ প্ৰথম দর্শনীৰ গৌৰৱৰ অধিকাৰী হ’বলৈ লোৱাৰ অপেক্ষাৰ সময়তে নিশালৈ সলনি হ’ল চিত্ৰপথ।
ছবিগৃহৰ স্বত্বাধিকাৰী দিগন্ত তালুকদাৰে জনোৱা মতে, ‘ ৰৈ ৰৈ বিনালে’ৰ বাবে ধেমাজিৰ জুবিন অনুগাৰীয়ে জনাইছে অভূতপূর্ব সঁহাৰি। এই উদুলি-মুদুলি পৰিৱেশৰ সৃষ্টি হৈছে ছবিগৃহটোত। অৱশ্যে কেৱল ধেমাজিতে নহয়, ৰাজ্যজুৰি বিৰাজ কৰিছে এক তীব্র উৎকণ্ঠাৰ সমান্তৰালভাৱে জুবিনৰ ছবি চোৱাৰ সুতীব্ৰ হেঁপাহৰ পৰিৱেশ।
এনে পৰিস্থিতি হৈছে যেন ছবিখন চোৱাটো বা উপভোগ কৰিব পৰাটো মানুহৰ বাবে এক নৈতিক দায়িত্ব।অসমৰ এজন আগশাৰীৰ বিতৰক সিদ্ধার্থ গোৱেংকাই ৰাইজৰ অভূতপূর্ব সঁহাৰি প্ৰত্যক্ষ কৰি কয়, ‘জীৱনত কেতিয়াও এনে দিন দেখা নাছিলো আৰু নাভাবো যে কেতিয়াবা দেখিবলৈ পাম।’
দীর্ঘ সময়জুৰি পিতৃৰ দিনৰে পৰা এই জগতত বিচৰণ কৰা গোৱেলে কয় যে অসমৰ চিনেমা একে সময়তে বাহিৰতো মুক্তি দিয়া প্রথমজন মানুহে হৈছে জুবিনদা। জুবিনৰ আন এখন ছবি মিছন ছাইনাৰ কথা সুঁৱৰি তেওঁ কয়, ‘জুবিনদা থাকিলে আজি কি হ’ল হয় ভাবিবই পৰা নাই। এই কথা ক’ব পাৰো যে তেওঁ হৈছে অসমৰ প্রথমজন মানুহ, যিয়ে একে সময়তে অসমৰ বাহিৰতো ছবি মুকলি কৰিছে। তেওঁ বিভিন্ন পৰীক্ষা-নিৰীক্ষা কৰিছিল। ‘জুবিনদাৰ বাবেই অসমৰ বাহিৰত অসমীয়া চিনেমা মানুহে চাবলৈ পাইছে।’
তেওঁ কয় যে নাগপুৰ, কেৰালা আদি বিভিন্ন অঞ্চলৰ পৰা ফোনকলৰ উত্তৰ দি তেওঁ ভাগৰি পৰিছে।উত্তৰ-পূৰ্বাঞ্চলত কমেও ৭৫০ টা দর্শনীৰ একে সময়তে ব্যৱস্থা আছে। ইয়াৰে কমেও ৬০০টা অসমতে হ’ব। বাংগালুৰু, চেন্নাই, সমগ্ৰ উত্তৰ-পূৰ্বাঞ্চল, কটক, পাটনা, ৰাঁচী, ডেৰাডুন, মালদা, মুম্বাই, পুনে, চণ্ডীগড়, আহমেদাবাদ, কোচী, ধানবাদ, কলকাতাকে ধৰি বিভিন্ন স্থানত অসমৰ বাহিৰতো দর্শকে উপভোগ কৰিব ‘ৰৈ ৰৈ বিনালে’।
বিতৰকে জনোৱা মতে, গুজৰাট, কেৰালা আদি বিভিন্ন স্থানৰ পৰা তেওঁলোকলৈ প্ৰস্তাৱ আহিছে। বুকমাই শ্ব’ৰ তথ্য অনুসৰি, নিশা প্রায় ১২ বজালৈ কমেও এক লাখ ১৫ হেজাৰ লোকে ছবিখনৰ টিকট ক্ৰয় কৰিছে। নিশা ১১ৰ পৰা ১২ বজাৰ ভিতৰত কমেও ডেৰ হেজাৰ টিকট বিক্রী হৈছে।
ছবিখনত জুবিনৰ সহ অভিনেত্রী মৌচুমী আলিফাই সংবাদমেলক জনোৱা মতে, ছবিখনৰ শুটিং চলি থকা অৱস্থাত জুবিনে কৈছিল যে এই ছবিখনক লৈ সৃষ্টি হ’ব তীব্র উন্মাদনাৰ। অৱশ্যে সেয়া যেন কল্পনাৰো বাহিৰৰ পৰিস্থিতি হ’ব সেয়া হয়তো জুবিনে অনুমান কৰা নাছিল। ই কেৱল বক্স অফিচৰ বৃহৎ উদ্যাপনেই নহয়, ছবিখন হৈ পৰিছে প্ৰাণৰ শিল্পীলৈ চকুলোৰে ভৰা চিনেমেটিক্স শ্রদ্ধাঞ্জলি।
দেশজুৰি ৪৬ খন মহানগৰীত ছবিখন প্রদর্শিত হ’ব বুলি শেহতীয়া তথ্য প্রকাশিত হৈছে। কেৱল বাংগালুৰুতে এদিনত হ’ব ৩১টা প্রদর্শনী। গুৱাহাটীত চিটি চেণ্টাৰৰ পিভিআৰ আৰু অ’ৰজ মলৰ আয়নক্সত প্রথম দিনা ২৩টা প্রদর্শনী হ’ব। ই এক আশ্চৰ্যকৰ বিষয় হৈছে। ছবিখনৰ প্ৰদৰ্শনীৰ সময়ে ভাৰতীয় ছবিৰ প্ৰদৰ্শনীত যুগান্তকাৰী মুহূৰ্তৰ সৃষ্টি কৰিছে। এইদৰে কাহিলিপুৱাতে কেটিয়াও কোনো ছবিয়ে প্ৰদৰ্শন কৰা হোৱা নাই।
দক্ষিণ ভাৰতত উৎসৱৰ বতৰসমূহত পুৱা ছয় বজাত স্থানীয় ছবি প্ৰদৰ্শনৰ ইতিহাসৰ লগতে আন কিছুমান ঠাইতো দেখা যায় যদিও এনে এক প্রচেষ্টা পূর্বতে তামিলনাডুত ছুপাৰষ্টাৰ বিজয়ৰ ‘ভাৰিছু’ ছবিৰ বাবে কৰা হৈছিল। কিন্তু ৰাজ্য চৰকাৰে পুৱা চাৰি বজাত এনে প্রদর্শনীত নিষেধাজ্ঞা জাৰি কৰাত এয়া সম্ভৱ নহ’ল। অৱশ্যে সেই বিতৰ্কৰ স’তে অসমত ‘ৰৈ ৰৈ বিনালে’ৰ প্ৰতি ৰাইজৰ আবেগৰ তুলনা কৰিব নোৱাৰি। কিয়নো এয়া কেবল বাণিজ্যিক বিষয় হৈ থকা নাই। ভাৰততেই নহয় গোটেই বিশ্বৰে ছবিজগতত নজিৰবিহীনভাৱে মানুহৰ শোকৰ স্রোত ছবিগৃহমুখী হৈছে।
