Olive ridley turtles:✒️এনেয়ে বিৰল, তাতে আকৌ লুপ্তপ্রায়। উপযুক্ত উপায়েৰে সংৰক্ষণৰ ব্যৱস্থা নকৰিলে অগোচৰত থাকিয়েই চিৰকাললৈ পৃথিৱীৰ পৰা সম্পূর্ণৰূপে বিলুপ্ত হৈ পৰিব অলিভ ৰিডলে কাছৰ দল। সেয়ে এই বিৰল কাছবিধক ৰক্ষা কৰিবলৈ বৃহৎ পদক্ষেপ ল’লে ওড়িছা চৰকাৰে।
আগন্তুক সাত মাহলৈ সাগৰৰ উপকূলবর্তী অঞ্চলৰ পৰা মাছ ধৰা নিষিদ্ধ ঘোষণা কৰিছে ওড়িছা চৰকাৰে। সম্প্ৰতি সংক্রান্তীয় বিজ্ঞপ্তি জাৰি কৰা হয়। তাত কোৱা হৈছে যে পহিলা নৱেম্বৰৰ পৰা আগন্তুক বৰ্ষৰ ৩১ মে’ পর্যন্ত সাগৰতীৰৰ সংলগ্ন ২০ কিলোমিটাৰ অঞ্চলত মাছ ধৰিব নোৱাৰিব।ওড়িছা চৰকাৰৰ এই উদ্যোগক সাধুবাদ জনাইছে সামুদ্রিক প্রাণী বিশেষজ্ঞসকলে।
ভৰপূৰ জৈৱ-বৈচিত্র্যৰ কাৰণে উছাৰ ভিতৰকণিকা অৰণ্য ভাৰতৰ ‘মিনি আমাজান’ৰূপে পৰিচিত। ইয়াৰ মূল বাসিন্দা লুণীয়া পানীৰ ঘূৰিয়াল আৰু অলিভবিডলে কাছ হৈছে ইয়াৰ বিশেষত্ব। তাৰ ভিতৰত অলিভ ৰিডলে কাছ ইয়াত বিলুপ্তপ্রায়। এই বিৰল প্ৰজাতিৰ কাছক ৰক্ষা কৰিবলৈ ১৯৮৩ৰ পৰা কাছ বা সিবোৰৰ কণী সংগ্রহ, ক্রয়-বিক্রয় সম্পূৰ্ণৰূপে নিষিদ্ধ কৰা হৈছিল; কিন্তু প্ৰতি বছৰে সিবোৰৰ জীৱন অভিশাপ হৈ পৰে কোনো নহয় কোনো ঘূর্ণী ধুমুহাত।
ফণী, অশনি, আমফানৰ পৰা আৰম্ভ কৰি ২০২৪ৰ ডানা ঘূর্ণী ধুমুহা আদি সকলো ক্ষেত্ৰতে ৰিডলে কাছবোৰ বিপদত পৰে। ২০২৪ৰ পৰিসংখ্যা অনুসৰি, মে’ৰ পৰা আগষ্ট পর্যন্ত দুৰ্যোগৰ কাৰণে সেই বছৰ উপকূলত কাছৰ ১৫ৰ পৰা ২০ শতাংশ কণী নষ্ট হৈ পৰে।
এই বিপত্তি এৰাই ঘূৰি থিয় দিয়াৰ সংগ্ৰাম অলিভ ৰিডলে কাছবোৰৰ স্বাভাৱিকতে অতি প্রত্যাহ্বানজনক। সেয়ে এই প্রজাতিক সাহায্য কৰাৰ বাবে ডাঙৰ পদক্ষেপ ল’লে ওড়িছা চৰকাৰে। প্ৰশাসনৰ তৰফৰ পৰা জনাইছে যে আগন্তুক সাত মাহলৈ উপকূলীয় অঞ্চল ধৰ্মা, দেৱী, ৰুছিকুল্যা আৰু গহিৰমথাত মাছ ধৰা নিষিদ্ধ।
কিয়নো বিলুপ্তপ্রায় সৰীসৃপসমূহ প্রায়েই নিজৰ বিচৰণ ক্ষেত্ৰতে মাছ ধৰাৰ জাল বা ট্ৰলাৰৰ চিকাৰ হয়। ফলত তুলনাত আৰু কমি আহিছে ইহঁতৰ সংখ্যা। প্রশাসনৰ সূত্ৰই জনাইছে যে এই নিষেধাজ্ঞা জাৰিৰ পাছৰে পৰা জলভূমি, জংঘল আদি সংশ্লিষ্ট অঞ্চলত টহলদাৰী বৃদ্ধি পাইছে। সকলো সময়তে দৃষ্টি ৰাখিছে আৰক্ষীয়ে।উপকূলত একাধিক শিবিৰো স্থাপন কৰা হৈছে।