Jal Jeevan Mission:✒️উন্নয়নৰ ক্ষেত্ৰত নহয়, অভিলাষী জল জীবন আঁচনিত চলা অবাধ লুণ্ঠনৰ ফলত দেশৰ শীর্ষলৈ আহিল অসম। গ্রামাঞ্চলসমূহৰ লোকসকলক বিশুদ্ধ খোৱাপানী যোগানৰ উদ্দেশ্যে ২০১৯ত কেন্দ্রীয় চৰকাৰে আৰম্ভ কৰা এই আঁচনিত অসমকে ধৰি একাংশ ৰাজ্যত কেনে লুণ্ঠনৰাজ চলিছে তাৰ তথ্য শেহতীয়াভাবে পোহৰলৈ আহিছে। স্বয়ং কেন্দ্ৰৰ অনুসন্ধানতে জল জীৱন আঁচনি ৰূপায়ণত এনে বৃহৎ অনিয়ম হোৱাৰ তথ্য ধৰা পৰিছে।
সূত্ৰৰ মতে, অসমকে ধৰি দেশৰ ১৫ খন ৰাজ্য আৰু কেন্দ্রীয় শাসিত অঞ্চলত জল জীবন আঁচনিত বিস্তৰ দুর্নীতি-অনিয়ম সংঘটিত হৈছে। অভিযোগ অনুসৰি এই ৰাজ্যসমূহৰ জনস্বাস্থ্য কাৰিকৰী বিভাগৰ বিষয়া-অভিযন্তা তথা ঠিকাদাৰে মিলি আঁচনিৰ ধনত অবাধ লুটপাট চলাইছে। নিম্নমানৰ কাম কৰি আঁচনিৰ ধন অবাধে উলিয়াই নিছে লুণ্ঠনকাৰী চক্রই।
এই অবাধ দুর্নীতি-অনিয়মৰ বিৰুদ্ধে অজস্র অভিযোগ দাখিল হৈছে। মাথোঁ অসমতে ১,২৩৬ টা অভিযোগ উত্থাপন হৈছে। অসমতকৈ অধিক তথা দেশৰ ভিতৰত সৰ্বাধিক অভিযোগ উত্থাপন হৈছে উত্তৰ প্ৰদেশত। লক্ষ্যণীয় যে প্রধানমন্ত্রী নৰেন্দ্ৰ মোদীসহ বিজেপিয়ে দুর্নীতিৰ বিৰুদ্ধে অবিৰাম শ্ল’গান দি অহাৰ সময়তে অসম আৰু উত্তৰ প্ৰদেশত জল জীৱন আঁচনি ৰূপায়ণত এনে শোচনীয় অৱস্থা বিৰাজ কৰিছে। অথচ দুয়োখন ৰাজ্যত বিজেপিৰ চৰকাৰ আছে। আঁচনিখন ৰূপায়ণত হোৱা অনিয়ম সংক্রান্তীয় ১৬,৬৩৪ অভিযোগ উত্তৰ প্রদেশত দাখিল হৈছে।
তদুপৰি বিজেপি শাসিত আন এখন ৰাজ্য ত্ৰিপুৰাতো জল জীৱন আঁচনিত বিস্তৰ অনিয়ম সংঘটিত হোৱাৰ তথ্য পোহৰলৈ আহিছে। এই ক্ষেত্ৰত ত্ৰিপুৰাই দেশৰ ভিতৰত তৃতীয় স্থান অধিকাৰ কৰিছে। ৰাজ্যখনত দাখিল হৈছে ৩৭৬ টা অভিযোগ। অৱশ্যে সূত্ৰৰ মতে জল জীৱন আঁচনিত দুর্নীতি-অনিয়ম সংঘটিত কৰা বিভিন্ন ৰাজ্যৰ ৫৯৬ বিষয়া-কৰ্মচাৰী, ৮২২ ঠিকাদাৰ আৰু ১৫২ তৃতীয় পক্ষ পৰিদৰ্শন সংস্থাৰ বিৰুদ্ধে চিবিআইকে ধৰি বিভিন্ন তদন্তকাৰী সংস্থাই তদন্ত আৰম্ভ কৰিছে।এই লুণ্ঠনৰাজৰ অন্ততঃ সাতটা গোচৰ চিবিআয়ে পৰীক্ষা কৰি আছে বুলি সূত্রই জনায়।
উল্লেখ্য যে অসমত জল জীৱন আঁচনি ৰূপায়ণৰ দায়িত্বত আছে মুখ্যমন্ত্ৰীৰ ঘনিষ্ঠ মন্ত্ৰী জয়ন্ত মল্লবৰুৱাৰ জনস্বাস্থ্য কাৰিকৰী বিভাগ। দীর্ঘদিন ধৰি অসমতো আঁচনিখন ৰূপায়ণত বিস্তৰ অনিয়ম সংঘটিত হোৱাৰ অভিযোগ উত্থাপন হৈ আহিছে।কেন্দ্ৰৰ পৰিদৰ্শনত পোহৰলৈ আহিল জল জীৱন আঁচনি ৰূপায়ণত বিভিন্ন ৰাজ্যত সংঘটিত বৃহৎ অনিয়মৰ তদন্ত আৰম্ভ হয় কেন্দ্ৰৰ হস্তক্ষেপত।
আঁচনিখন ৰূপায়ণ তদাৰক কৰা কেন্দ্ৰীয় জল শক্তি মন্ত্রণালয়ৰ অধীনৰ খোৱাপানী আৰু অনাময় বিভাগে যোৱা অক্টোবৰৰ পৰা এক কাৰ্যক্ষেত্ৰ পৰিদৰ্শন কাৰ্যসূচী হাতত লয়। এই কাৰ্যসূচীৰ অধীনত শতাধিক নডেল বিষয়াই জল জীৱন মিছনৰ ৰূপায়ণ পৰিদৰ্শন কৰে। এই নডেল বিষয়াসকলে দাখিল কৰা প্ৰতিবেদনৰ ভিত্তিত যোৱা অক্টোবৰত কেন্দ্রই দুর্নীতি-অনিয়মৰ বিৰুদ্ধে ব্যৱস্থা গ্রহণ কৰিবলৈ নিৰ্দেশ জাৰি কৰে।
ইয়াৰ ভিত্তিত বিভিন্ন তদন্তকাৰী সংস্থাই দুর্নীতি-অনিয়মত জড়িতসকলৰ বিৰুদ্ধে তদন্ত আৰম্ভকৰিছে। অৱশ্যে অসমত দুর্নীতিগ্রস্ত কিমান বিষয়া-কৰ্মচাৰীৰ বিৰুদ্ধে চৰকাৰে ব্যৱস্থা গ্রহণ কৰিছে সেই তথ্য পোহৰলৈ অহা নাই। ইয়াৰ বিপৰীতে উত্তৰ প্ৰদেশ চৰকাৰে বৃহৎ সংখ্যক দুর্নীতিগ্রস্ত বিষয়া-কৰ্মচাৰী আৰু ঠিকাদাৰৰ বিৰুদ্ধে তদন্তৰ ব্যৱস্থা কৰিছে। ৰাজস্থান চৰকাৰেও ১৭০ বিষয়া-কৰ্মচাৰী তথা ঠিকাদাৰ আৰু মধ্য প্রদেশ চৰকাৰে ১৫১ বিষয়া-কৰ্মচাৰী তথা ঠিকাদাৰৰ বিৰুদ্ধে ব্যৱস্থা লৈছে।
এই ক্ষেত্রত দেশৰ ভিতৰতে ত্ৰিপুৰা চৰকাৰে সৰ্বাধিক ৩৭৪ বিষয়া-কৰ্মচাৰী তথা ঠিকাদাৰৰ বিৰুদ্ধে ব্যৱস্থা গ্রহণ কৰিছে। এইসমূহ তথ্য সংশ্লিষ্ট ৰাজ্য চৰকাৰসমূহে কেন্দ্ৰক অৱগত কৰিছে।
