Bihar Election:✒️বিৰোধীক ধূলিসাৎ কৰি বিহাৰত জয়ধ্বজা উৰোৱা বিজেপি নেতৃত্বাধীন এনডিএৰ মুখ্যমন্ত্রীৰ পদ নীতিশ কুমাৰে পুনৰ পাব নে তাৰ প্রতি সম্প্রতি সমগ্র দেশবাসীৰ দৃষ্টি নিবদ্ধ হৈছে। যদি এইবাবো জনতা দল (ইউ)ৰ নেতা কুমাৰে মুখ্যমন্ত্রীৰূপে শপত গ্রহণ কৰে তেন্তে তেওঁ দশমবাৰৰ বাবে ৰাজ্যখনৰ মুখ্যমন্ত্রী হ’ব।
বর্তমানলৈ কুমাৰে ১৯ বছৰ মুখ্যমন্ত্রীৰূপে কার্যনির্বাহ কৰিছে। উল্লেখ্য যে কুমাৰে এবাৰ মাথোঁ সাতদিনৰ বাবে মুখ্যমন্ত্রীরূপে কার্যনির্বাহ কৰিছিল। ২০০০ত এই ঘটনা সংঘটিত হৈছিল। সংখ্যাগৰিষ্ঠতাৰ অভাৱত তেতিয়া তেওঁৰ চৰকাৰৰ অকাল পতন ঘটে। সম্প্রতি যিহেতু কুমাৰৰ নাম পুনৰ মুখ্যমন্ত্রীৰূপে চর্চিত হৈছে, গতিকে দেশৰ বিভিন্ন ৰাজ্যত সর্বাধিক কার্যকাল মুখ্যমন্ত্রীৰূপে কার্যনির্বাহ কৰা ১০ জন ৰাজনীতিকৰ নাম বহুতৰে মনলৈ আহিছে।
এইসকলৰ তালিকাৰ প্রথমতে আছে ছিকিমৰ প্রাক্তন মুখ্যমন্ত্রী পরন কুমাৰ চামলিঙৰ নাম।চামলিঙে সুদীর্ঘ ২৪ বছৰ কাল (১৯৯৪ৰ ১২ ডিচেম্বৰৰ পৰা ২০১৯ৰ ২৬ মে’লৈ) মুখ্যমন্ত্ৰীৰূপে কার্যনির্বাহ কৰি ইতিহাস সৃষ্টি কৰে।
তেওঁৰ দলে একেৰাহে পাঁচটা বিধানসভা নির্বাচনত জয়লাভ কৰাৰ পৰিপ্ৰেক্ষিতত তেওঁ এই সুযোগ লাভ কৰিছিল। দেশৰ সৰ্বাধিক কার্যকালৰ আন নজন মুখ্যমন্ত্রী হ’ল-নবীন পাটনায়ক: ওড়িছাৰ প্ৰাক্তন মুখ্যমন্ত্রী নবীন পাটনায়কেও ২৪ বছৰ (২০০০ৰ পাঁচ মাৰ্চৰ পৰা ২০২৪ৰ ১২ জুনলৈ) মুখ্যমন্ত্রীৰূপে কাৰ্যনিৰ্বাহ কৰে।
যোৱা বছৰৰ বিধানসভা নির্বাচনত বিজেপিয়ে জয়লাভ কৰাত পাটনায়কৰ দুই দশকৰো অধিক সময়জোৰা শাসনৰ অন্ত পৰে।
জ্যোতি বসু: পশ্চিমবংগৰ প্ৰাক্তন মুখ্যমন্ত্রী জ্যোতি বসুরে একেৰাহে ২৩ বছৰ (১৯৭৭ৰ ২১ জুনৰ পৰা ২০০০ৰ পাঁচ নৱেম্বৰলৈ) মুখ্যমন্ত্রীৰূপে কার্যনির্বাহ কৰে। একালৰ বিচক্ষণ ৰাজনীতিকৰূপে দেশজুৰি চর্চা লাভ কৰা বসুৱে দেশৰ প্রধানমন্ত্রীৰ দায়িত্ব গ্রহণ কৰিবলৈও এবাৰ অস্বীকাৰ কৰিছিল।
গেগং আপাং: অৰুণাচল প্ৰদেশৰ প্ৰাক্তন মুখ্যমন্ত্রী গেগং আপাঙে দুটা পৰ্যায়ত ২৩ বছৰ মুখ্যমন্ত্ৰীৰূপে কার্যনির্বাহ কৰিছিল। ইয়াৰে প্ৰথম পর্যায়ত তেওঁ ১৯৮০ৰ ১৮ জানুৱাৰীৰ পৰা ১৯৯৯ৰ ১৯ জানুৱাৰীলৈ মুখ্যমন্ত্রীৰূপে কার্যনির্বাহ কৰে। পৰৱৰ্তী সময়ত তেওঁ ২০০৩ৰ তিনি আগষ্টৰ পৰা ২০০৭ৰ ন এপ্ৰিললৈ মুখ্যমন্ত্ৰীৰ দায়িত্বত থাকে।
লাল থানৱালা: মিজোৰামৰ মুখ্যমন্ত্ৰীৰূপে লাল থানৱালাই ২২ বছৰ কাৰ্যনিৰ্বাহ কৰিছিল। ১৯৮৪ৰ পাঁচ মে’ৰ পৰা ২০১৮ৰ ১৫ মে’লৈ ৰাজ্যখনৰ মুখ্যমন্ত্রী পদত থাকে।
বীৰভদ্র সিংঃ হিমাচল প্ৰদেশৰ মুখ্যমন্ত্রী বীৰৰ্ভদ্র সিঙে সুদীর্ঘ ২১ বছৰ কাল মুখ্যমন্ত্ৰীৰূপে কার্যনির্বাহ কৰিছিল। তেওঁৰ মুখ্যমন্ত্ৰীৰ কাৰ্যকাল আৰম্ভ হয় ১৯৮৩ৰ আঠ এপ্ৰিলত। ২০১৭ৰ ১৭ ডিচেম্বৰত তেওঁৰ কাৰ্যকাল অন্ত পৰে।
মাণিক সৰকাৰ : ত্ৰিপুৰাৰ বর্ষীয়ান বাঁওপন্থী ৰাজনীতিক মাণিক সৰকাৰে একেৰাহে ১৯ বছৰ মুখ্যমন্ত্ৰীৰূপে কার্যনির্বাহ কৰে। ১৯৯৮ৰ ১১ মাৰ্চত তেওঁ প্ৰথমবাৰৰ বাবে মুখ্যমন্ত্রীৰূপে শপতগ্ৰহণ কৰে। তেওঁৰ মুখ্যমন্ত্ৰীৰ কাৰ্যকাল অন্ত পৰে ২০১৮ৰ ন মাৰ্চত।
এম কৰুণানিধি: তামিলনাডুৰ একালৰ প্ৰতাপী ৰাজনীতিক মুথুভেল কৰুণানিধিয়ে সুদীর্ঘ ১৮ বছৰ কাল মুখ্যমন্ত্রীৰূপে কার্যনির্বাহ কৰিছিল। তেওঁৰ মুখ্যমন্ত্ৰীৰ কাৰ্যকাল ১৯৬৯ৰ ১০ ফেব্ৰুৱাৰীত আৰম্ভ হয়। অৱশ্যে তেওঁ একেৰাহে ১৮ বছৰ কাল মুখ্যমন্ত্রীৰূপে কাৰ্যনিৰ্বাহ কৰা নাছিল। কৰুণানিধিৰ মুখ্যমন্ত্ৰিত্বৰ কাৰ্যকাল অন্ত পৰে ২০১১ৰ ১৬ মে’ত।
প্রকাশ সিং বাদল: পঞ্জাৱৰ একালৰ প্ৰভাৱশালী ৰাজনীতিক প্রকাশ সিং বাদলে ১৮ বছৰ মুখ্যমন্ত্রীৰূপে কার্যনির্বাহ কৰিছিল। তেওঁৰ মুখ্যমন্ত্ৰিত্বৰ কাৰ্যকাল আৰম্ভ হয় ১৯৭০ৰ ২৭ মাৰ্চত আৰু অন্ত পৰে ২০১৭ৰ ১৬ মাৰ্চত। তদুপৰি তেওঁ আছিল দেশৰ সৰ্বকনিষ্ঠ মুখ্যমন্ত্রী।