Bihar Election:✒️নিৰ্বাচনৰ দিন ঘোষণাৰ প্ৰাহ্মণলৈ মহিলাসকলক ১০ হেজাৰ টকাকৈ একাউণ্টযোগে আদায় দিয়াতে বিহাৰৰ নীতিশ কুমাৰ চৰকাৰ ক্ষান্ত থকা নাছিল। সদ্যসমাপ্ত নির্বাচনত জয়ী হৈ চৰকাৰ গঠন কৰিবলৈ সক্ষম হ’লে দবিদ্র ৰাজ্যখনৰ ডেৰ কোটি মহিলাক দুই লাখ টকাকৈ দিয়াৰো প্রতিশ্রুতি দিছিল নীতিশ চৰকাৰে।
মঙলবাৰে এই কথা উল্লেখ কৰি জন সুৰাজ পাৰ্টিৰ মুৰব্বী তথা একালৰ নিৰ্বাচনী ৰণনীতি বিশেষজ্ঞ প্রশান্ত কিশোবে অংগীকাৰ কৰে যে যদি নতুন এনডিএ চৰকাৰে এই প্ৰতিশ্ৰুতি ৰক্ষা কৰি সঁচাকৈয়ে ডেৰ কোটি মহিলাক দুই লাখ টকাকৈ দিবলৈ সক্ষম হয়, তেন্তে তেওঁ ৰাজনীতিৰ পৰাই অৱসৰ ল’ব। অৱশ্যে এনডিএলৈ এই প্রত্যাহ্বান জনাওতে তেওঁ পূৰ্বৰ অংগীকাৰ সলনি কৰে। সদ্যসমাপ্ত নিৰ্বাচনৰ প্ৰচাৰ চলি থকাৰ সময়ত কিশোৰে অংগীকাৰ কৰিছিল যে যদি নীতিশ কুমাৰৰ জনতা দল ইউবে ২৫ খন আসনতো জয়লাভ কৰে তেন্তে তেওঁ ৰাজনীতি ত্যাগ কৰিব।
কিশোৰৰ এই দাবীৰ বিপৰীতে যোৱা ১৪ নৱেম্বৰত দেখা গ’ল যে জেডিইউৱে পূৰ্বৰবাৰতকৈ একপ্ৰকাৰ দুগুণ আসনত জয়লাভ কৰে। এইবাৰ জেডিইউ ৮৫ খন আসনত জয়যুক্ত হয়। একেদৰে বিজেপিয়েও ৮৯ খনত জয়লাভ কৰে। ফলত অবিশ্বাস্যভাৱে ২০২ খন আসনত এনডিএই জয় সাব্যস্ত কৰি ক্ষমতালৈ উভতি আহে। ইয়াৰ পাছতে জন সুৰাজ পার্টিয়ে অভিযোগ উত্থাপন কৰে যে নিৰ্বাচনৰ প্ৰাহ্মণলৈ ৪০ হেজাৰ কোটি টকা বিনামূলীয়া আঁচনিৰ জৰিয়তে বিলাইহে এনডিএই পুনৰ ক্ষমতা দখল কৰিছে।
আনকি বিশ্ববেংকৰ পৰা ঋণৰূপে পোৱা ১৪ হেজাৰ কোটি টকাও নীতিশ চৰকাৰে নিৰ্বাচনৰ প্ৰাক্ষণত মহিলাসকলৰ মাজত বিলাই দিলে বুলি দলটো সৰৱ হৈ উঠে। একেদৰে কংগ্ৰেছকে ধৰি আন বিৰোধী দলসমূহে ভোেট চুৰিৰ জৰিয়তেহে এনডিএই বিহাৰত পুনৰ হস্তগত কৰিবলৈ সক্ষম হয় বুলি অভিযোগ কৰি আহিছে। ইয়াৰ বিপৰীতে ফলাফল ঘোষণাৰ দিনাৰ পৰা ফলাফলক লৈ কিশোৰ মৌন হৈ থাকে।কালি তেওঁ মৌনতা ভংগ কৰি দলৰ শোচনীয় পৰাজয়ৰ দায়িত্বও স্বীকাৰ কৰে।
তেওঁ কয়, ‘আমি আৰম্ভণিৰ পৰাই ইতিবাচক মনোভাৱেৰে যথেষ্ট কষ্ট কৰিলো। আমি চৰকাৰ সলনি কৰাত ব্যৰ্থ হ’লো। বোধহয়, জনতাক আমাৰ কথা বুজোৱাত আমি ক’ৰবাত ব্যৰ্থ হ’লো। মই সকলো দোষ মূৰ পাতি লৈছো। আমি আমাৰ ভুল-ত্রুটিৰ পুনৰীক্ষণ কৰিম।’ তেওঁ লগতে কয় যে তেওঁ এদিনৰ বাবে ‘মৌন উপবাস’ত থাকিব। ব্যৱস্থাটোৰ পৰিৱৰ্তনৰ কথাটো বাদেই, ক্ষমতাৰ এটা পৰিৱৰ্তনো সাধন কৰিবলৈ সক্ষম নোহোৱাৰ কথা স্বীকাৰ কৰে জন সুৰাজৰ মুৰব্বীজনে।
তেওঁ লগতে কয়, ‘আমি এক সৎ পদক্ষেপ লৈছিলো; কিন্তু সম্পূৰ্ণৰূপে অসফল হ’লো। কিন্তু আমি বিহাৰৰ ৰাজনীতিৰ পৰিৱৰ্তন সাধনত নিশ্চিতভাবে কিছু ভূমিকা পালন কৰিলো।’ লগতে তেওঁ স্পষ্ট কৰি দিয়ে যে তেওঁ এতিয়াই ৰাজনীতি ত্যাগ নকৰে। তেওঁ কয়, ‘আমি পূৰ্বৰ শক্তিৰেই অটল হৈ থাকিম। যিসকলে ভাবিছে মই বিহাৰ ত্যাগ কৰিম বুলি, তেওঁলোকৰ ধাৰণা সম্পূৰ্ণৰূপে ভুল। জেডিইউৱে ২৫ খন আসনত জয়ী হৈ দেখুৱাওক বুলি মই পূৰ্বে কৰা মন্তব্যক লৈ মানুহে বহু কথা কৈছে। যদি প্রতিশ্রুতি অনুসৰি নীতিশ কুমাৰে ডেৰ কোটি মহিলাক দুই লাখকৈ টকা দিব পাৰে আৰু তেওঁ ভোট কিনি ভুল নাই কৰা বুলি প্ৰমাণ কৰিব পাৰে, তেন্তে মই কোনো চৰ্ত অবিহনেই ৰাজনীতি ত্যাগ কৰিম।’
অৱশ্যে তেওঁ ৪০ হেজাৰ কোটি টকাৰে নীতিশ চৰকাৰে ভোট কিনাৰ যি অভিযোগ উত্থাপন হৈছে সেয়া মানি ল’বলৈ অস্বীকাৰ কৰে। জনতাই নিজৰ ভৱিষ্যৎ আৰু সন্তানৰ ভৱিষ্যৎ বিক্ৰী নকৰে বুলিও দাবী কৰি তেওঁ লগতে কয়, ‘প্রথমবাৰৰ বাবে স্বাধীন ভাৰতত বিশেষকৈ বিহাৰত চৰকাৰে জনতাৰ বাবে ৪০ হেজাৰ কোটি টকা ব্যয় কৰাৰ প্ৰতিশ্রুতি দিছে। সেয়েহে এনডিএই বৃহৎ জয় সাব্যস্ত কৰিলে। ইয়াকে লৈ বিতৰ্কৰ অন্ত নাই।’ তেওঁ লগতে দাবী কৰে যে ভবিষ্যতে জন সুৰাজ জয়ী হ’বই।