Antony Raju:✒️প্ৰায় ৩৫ বছৰৰ আগতে সংঘটিত হোৱা এটা ঘটনাই এতিয়া কাল হৈ উঠিল কেৰেলাৰ ৭১ বছৰীয়া বিধায়ক তথা প্ৰাক্তন মন্ত্ৰী এন্টনি ৰাজুৰ । এটা মাদক গোচৰত প্ৰমাণ হিচাপে জমা থকা এটা অন্তৰ্বাসৰ আকাৰ সলনি কৰাৰ অভিযোগ প্ৰমাণিত হোৱাত ইতি পৰিল তেওঁৰ প্ৰায় ৫০ বছৰৰ ৰাজনৈতিক জীৱনৰ।
এন্টনি ৰাজু পেছাত এজন আইনজীৱী। আজিৰ পৰা ৩৫ বছৰ পূৰ্বে তেওঁ ড্ৰাগছৰ গোচৰত অভিযুক্ত অষ্ট্ৰেলিয়াৰ এজন নাগৰিকক প্ৰতিনিধিত্ব কৰিছিল। অভিযোগ অনুসৰি বিচাৰৰ সময়ত তেওঁ গোচৰটোৰ গুৰুত্বপূৰ্ণ প্ৰমাণ তেওঁৰ ক্লায়েণ্টৰ আণ্ডাৰৱেৰৰ আকাৰ সলনি কৰিছিল।
ফলত অষ্ট্ৰেলিয়াৰ নাগৰিকজন দোষমুক্ত হ’ল। একেটা গোচৰতে ২০২৬ চনৰ দুই জানুৱাৰীত তিৰুৱনন্তপুৰমৰ নেদুমনগড়ৰ প্ৰথম শ্ৰেণীৰ দণ্ডাধীশ আদালতে ৰাজুক প্ৰমাণ নষ্ট কৰাৰ অভিযোগত তিনি বছৰৰ কাৰাদণ্ডৰ শাস্তি প্ৰদান কৰে।
এই ৰায়ৰ লগে লগে কেৰালাৰ শাসকীয় এলডিএফ চৰকাৰৰ বিধায়ক হিচাপে তেওঁৰ পদোচ্যুতি ঘটে।লগতে তেওঁ বিধানসভাৰ সদস্য পদো হেৰুৱায় । চলিত বছৰে কেৰেলাত বিধানসভা নিৰ্বাচন অনুষ্ঠিত হ’ব। এই বছৰ কেৰালাত বিধানসভা নিৰ্বাচন অনুষ্ঠিত হ’ব, আৰু এই আদালতৰ ৰায়দানে ফলপ্ৰসূভাৱে তেওঁৰ ৰাজনৈতিক কেৰিয়াৰৰ ভাগ্যত ছীল মাৰিছে।
এই গোচৰৰ আন এজন অভিযুক্ত কে জোছকো আদালতে অপৰাধত সহযোগ কৰাৰ অভিযোগত তিনি বছৰৰ কাৰাদণ্ডৰ শাস্তি দিয়ে। অৱশ্যে উচ্চ আদালতত আবেদন জনাবলৈ ৰাজু আৰু জোছ—দুয়োকে আদালতে এএমাহৰ বাবে জামিন দিয়ে।
এন্টনি ৰাজু কেৰেলাৰ ৰাজনৈতিক দল জনাধিপথ্য কেৰেলাৰ কংগ্ৰেছ (জেকেছি)ৰ নেতা আৰু তিৰুঅনন্তপুৰমৰ বিধায়ক আছিল। জেকেছি এলডিএফৰ সহযোগী দল। ২০১৬ চনৰ ন মাৰ্চত কেৰেলা কংগ্ৰেছ (এম)ৰ পৰা বিভক্ত হৈ এই দলটো গঠন হৈছিল।
২০২১ চনৰ ২০ মেৰ পৰা ২০২৩ চনৰ ২৪ ডিচেম্বৰলৈকে এন্টনি ৰাজুৱে এলডিএফ চৰকাৰত পৰিবহণ মন্ত্ৰী হিচাপে দায়িত্ব পালন কৰিছিল। পাছত মন্ত্ৰীসভাৰ পৰা আঁতৰাই দিয়া হৈছিল যদিও এতিয়ালৈকে বিধায়ক পদ অটুট আছিল। মাদক গোচৰত দোষী সাব্যস্ত হোৱাৰ পাছত সেই পদো হেৰালে তেওঁ।
কেৰেলাৰ বিধানসভাৰ সচিবালয়ে পাঁচ জানুৱাৰীত জাৰি কৰা এক বিজ্ঞপ্তিত জনাইছে যে, এটা ফৌজদাৰী গোচৰত দোষী সাব্যস্ত হোৱাৰ পাছত এন্টনি ৰাজুক বিধায়ক হিচাপে অযোগ্য ঘোষণা কৰা হৈছে। তেওঁ জনাধিপথ্য কেৰেলাৰ কংগ্ৰেছৰ একমাত্ৰ বিধায়ক আছিল।
কিয় বিধায়ক পথ হেৰুৱালে ৰাজুয়ে?
ঘটনাটোৰ সূত্ৰপাত হৈছিল ১৯৯০ চনৰ ন এপ্ৰিলত। ভাৰতলৈ অহা অষ্ট্ৰেলিয়ান নাগৰিক অ্যান্ড্ৰু সালভাডৰ চার্ভেলিৰ অন্তৰ্বাসৰ ভিতৰত দুটা পেকেটত ৬১.৫ গ্ৰাম মাদক উদ্ধাৰ হয়। তিৰুঅনন্তপুৰম আন্তঃৰাষ্ট্ৰীয় বিমানবন্দৰত তেওঁক গ্ৰেপ্তাৰ কৰা হয়।
তেতিয়া এন্টনি ৰাজু আইনজীৱী হিচাপে কৰ্মজীৱন আৰম্ভহে কৰিছিল। তিৰুৱনন্তপুৰমৰ অধিবেশন আদালতত সৰু সৰু গোচৰ চম্ভালিছিল। তাতেই ৰাজুৱে এটা গোচৰত ছাৰ্ভেলীৰ অধিবক্তাৰ সহায়ক হিচাপে কাম কৰাৰ সুযোগ পাইছিল।
কিন্তু চাৰ্ভেলিয়ে গোচৰটোত পৰাস্ত হয়। তেওঁক দোষী সাব্যস্ত কৰা হয়। ১৯৯২ চনত তিৰুৱনন্তপুৰমৰ অধিবেশন আদালতে তেওঁক ১০ বছৰৰ কাৰাদণ্ড আৰু এক লাখ টকাৰ জৰিমনা বিহাৰ শাস্তি প্ৰদান কৰে।
ইয়াৰ পাছতে কেৰালা উচ্চ ন্যায়ালয়ৰ কাষ চাপিছিল চাৰ্ভেলি। তাতেই গোচৰটোৰ মূল প্ৰমাণ আৰু আদালতৰ জিম্মাত থকা আণ্ডাৰৱেৰটো পুনৰ উত্থাপন কৰা হয়। যুক্তি দিয়া হৈছিল যে চাৰ্ভেলি মেদবহুল।
কিন্তু আৰক্ষীয়ে প্ৰমাণ হিচাপে দাখিল কৰা আণ্ডাৰৱেৰ আকাৰত বহুত সৰু। গতিকে ইয়াৰ বাবে চাৰ্ভেলিৰ হোৱাটো অসম্ভৱ।
আদালতত চাৰ্ভেলিৰ আণ্ডাৰৱেৰটোৰ ওপৰত ট্ৰাই কৰিবলৈ কোৱা হয়। দেখা গ’ল যে সঁচাকৈয়ে ই চাৰ্ভেলিৰ কঁকালৰ আকাৰতকৈ বহুত সৰু।
এই দৃশ্য দেখি তদন্তকাৰী বিষয়াসকল আৰু চৰকাৰ পক্ষৰ আইনজীবী স্তম্ভিত হৈ পৰে। প্ৰমাণ সলনি কৰাৰ অভিযোগ উঠে।
আনহাতে, প্ৰমাণৰ অভাৱত কেৰালা উচ্চ ন্যায়ালয়ে ১৯৯৩ চনত চাৰ্ভেলীক দোষমুক্ত কৰে।। যদিও আদালতে এই বিষয়টো উপযুক্তভাৱে তদন্ত কৰাৰ আশা প্ৰকাশ কৰিছিল।
মুক্তি পোৱাৰ পাছত চার্ভেলি দেশ এৰি যায়। কিছুদিন পাছতে অষ্ট্ৰেলিয়াত এটা হত্যা গোচৰত তেওঁ গ্ৰেপ্তাৰ হয়। জিজ্ঞাসাবাদৰ সময়ত তেওঁ প্ৰকাশ কৰে যে, ভাৰতত থকা তেওঁৰ পৰিয়ালে আদালতৰ কিছুমান কৰ্মচাৰী আৰু আন লোকক উৎকোচ দি মাদক গোচৰৰ প্ৰমাণ নষ্ট কৰাইছিল।
এই তথ্য অষ্ট্ৰেলিয়ান আৰক্ষীৰ জৰিয়তে ইণ্টাৰপ’ল আৰু ভাৰতীয় তদন্তকাৰী সংস্থাসমূহলৈ প্ৰেৰণ কৰা হয়। তাৰ পাছত গোচৰটো নতুনকৈ তদন্ত আৰম্ভ হয়।
ফৰেনছিক প্ৰমাণৰ ভিত্তিত পোহৰলৈ আহে যে, অন্তৰ্বাসটো নতুনকৈ চি ললাই কৰি আকাৰ সৰু কৰা হৈছিল। তদন্তত প্ৰমাণ হয় যে এই কামত এন্টনি ৰাজু আৰু আদালতৰ কেৰানি জোছ জড়িত আছিল।
দীৰ্ঘ বছৰ ধৰি চলা আইনী প্ৰক্ৰিয়াৰ অন্তত ২০২৬ চনৰ তিনি জানুৱাৰী নেদুমংগদৰ ফাৰ্ষ্ট ক্লাছ মেজিষ্ট্ৰেট আদালতে ই এন্টনি ৰাজু আৰু জোছ—দুয়োকেই দোষী সাব্যস্ত কৰি তিনি বছৰৰ কাৰাদণ্ডৰ শাস্তি ঘোষণা কৰে।
উল্লেখযোগ্য যে, ইয়াৰ আগতেও চোৰাচালানৰ গোচৰত এন্টনি ৰাজু দোষী সাব্যস্ত হৈছিল।