Kokrajhar Incident:
কোকৰাঝাৰৰ কাৰিগাঁৱৰ গৌৰীনগৰত সোমবাৰে নিশা এক দুর্ঘটনাক কেন্দ্র কৰি সৃষ্টি হোৱা চৰম উত্তেজনাপূর্ণ পৰিস্থিতিত ক্ষুব্ধ ৰাইজৰ আক্রমণত এজন লোক নিহত হোৱাৰ উপৰি আন চাৰিজন আহত হয়। তদুপৰি দুর্ঘটনা সংঘটিত কৰা এখন স্তৰপিঅ’ বাহনত দুর্বৃত্তই অগ্নিসংযোগ কৰাত বাহনখন ভস্মীভূত হয়। নিহত লোকজন হৈছে কোকৰাঝাৰৰ কাজিগাঁও আৰক্ষী থানাৰ অধীনস্থ বাশবাৰী দ্বিতীয় খণ্ডৰ চিকনা জীহালীও বিসমিট (৩২)। অনহাতে, আহতসকল হৈছে ক্রমে কাৰিগাঁৱৰ সমীপৰ ওকং গাঁৱৰ মহেশ মুর্মু (৫০), সুনীল মুর্মু (৪০), অষ্ঠাইগীলা গাঁৱৰ পিতা-পুত্র ক্রমে প্রভাত ব্রহ্ম (৫০) আৰু যুগীৰাজ ব্রহ্ম (১৭)।
ইয়াবে প্রভাত ব্রহ্মৰ অৱস্থা সংকটজনক বুলি চিকিৎসকে সদৰী কৰে । অগ্নিসংযোগৰ ফলত দাও দাওকৈ জুলি সম্পূর্ণরূপে ভস্মীভূত হয় স্বৰপিত’ বাহনখন।
নিশা প্রায় ৭-৩০ মান বজাত সংঘটিত হোৱা এক দুর্ঘটনাক কেন্দ্ৰ কৰি অঞ্চলটোত উত্তপ্ত পৰিস্থিতিৰ সৃষ্টি হয়। কোকৰাঝাৰৰ অতিৰিক্ত আৰক্ষী অধীক্ষক নৱনীতা শর্মাই জনোৱা মতে, দুর্ঘটনাৰ বিষয়ে অৱগত হৈ কৰিগাঁও আৰক্ষী চকীৰ ভাৰপ্ৰাপ্ত বিষয়া ঘটনাস্থলীত উপস্থিত হয়। ঘটনাস্থলীত জ্বলন্ত অবস্থাত প্রত্যক্ষ কৰে গাড়ীখন। ইতিমধ্যে ঘটনাৰ তদন্ত অব্যাহত ৰখা হৈছে বুলি সদৰী কৰে আৰক্ষী বিষয়াগৰাকীয়ে।
ঘটনাৰ বিৱৰণি অনুসৰি ৩১ নম্বৰ ৰাষ্ট্ৰীয় ঘাইপথৰ উত্তৰে আওদাং বজাৰলৈ যোৱা পথছোৱা নিৰ্মাণৰ বাবে ঠিকা লাভ কৰিছিল প্রতিষ্ঠিত ঠিকাদাৰ বৰোন্দা বসুমতাৰীয়ে। সম্প্রতি কাম বন্ধ হৈ আছিল আৰু শিবিৰত থকা সা-সামন্ত্রী আনিবলৈ বসুমতাৰীৰ জোঁৱায়েক চিকনা জাহালাও বিসমিটে প্রভাত আৰু যোগীৰাজ ব্ৰহ্মক লগত লৈ গৈছিল। কৰ্মস্থলীৰ পৰা সামগ্ৰী লৈ উভতি অহাৰ পথত গৌৰীনগৰত এক পথ দুর্ঘটনা সংঘটিত হয়। ফলত দুজন লোক আহত হয়। এই ঘটনাক কেন্দ্ৰ কৰি স্থানীয় ৰাইজ উত্তেজিত হয় আৰু স্কৰপিঅ’ বাহনখনলৈ শিল নিক্ষেপ কৰে পৰিস্থিতি ক্রমশঃ অতি শোচনীয় হৈ পৰে আৰু বাহনত থকা আৰোহীসকলক নির্মমভাৱে প্ৰহাৰ কৰে উন্মত্ত জনতাই আৰু বাহনখন জ্বলাই দিয়ে। পৰিস্থিতি সম্প্রতি উত্তপ্ত হৈ আছে। এক সূত্রই প্ৰকাশ কৰা অনুসৰি, উক্ত অঞ্চলটোত শেহতীয়াভাৱে গৰু চুৰিৰ একাধিক ঘটনা সংঘটিত হৈছে। সোমবাৰে তেনে এক উদ্দেশ্য লৈয়ে উক্ত লোক সকল এই অঞ্চলত উপস্থিত হোৱা বুলি সৃষ্টি হোৱা সন্দেহৰ পৰিণতিত এই হিংসাত্মক ঘটনা সংঘটিত হোৱা বুলি সূত্রটোৱে আঙুলিয়াই দিয়ে।
ইপিনে, কোকৰাঝাৰৰ বিধায়ক লৰেন্স ইহলাৰীয়ে আহতসকল চিকিৎসাধীন হোৱা কোক্ৰাঝাৰ মেডিকেল কলেজ হাস্পতাললৈ যায়। তেওঁ পৰিস্থিতিৰ বুজ লয় আৰু শান্তি-সম্প্রীতি বজাই বাখিবলৈ সকলো পক্ষকে আহ্বান জনায়।
আনহাতে মঙলবাৰে পুৱাৰে পৰা পৰিস্থিতি অধিক উত্তপ্ত হৈ পৰে ৷ হত্যাকাৰীক কঠোৰ শাস্তিৰ দাবীত কাৰিগাঁৱত ওলাই আহিল ৰাইজ । ক্ষুব্ধ ৰাইজক আৰক্ষীয়ে নিয়ন্ত্ৰণৰ চেষ্টা কৰে যদিও আৰক্ষীক ফেপেৰি পাতি ধৰে ৷ ৰাজপথত টায়াৰ জ্বলোৱাৰ লগতে কে’বাটাও বাসগৃহ জ্বলাই দিয়ে ৷ পৰিস্থিতি অগ্নিগৰ্ভা হৈ পৰাৰ বাবে আৰক্ষীয়ে শূন্যলৈ গুলীচালনা কৰে ৷ ইতিমধ্যে ঘটনাস্থলীত শীৰ্ষ আৰক্ষী উপস্থিত হৈ পৰিস্থিতিৰ নিয়ন্ত্ৰণত নামি পৰিছে ৷ বৰ্তমানেও চেপা উত্তেজনা অব্যাহত আছে।
