Congress MLA:
ৰাজ্যৰ বিধানসভা নিৰ্বাচনলৈ মাজত মাত্ৰ ডেৰটা মাহ থকা অৱস্থাত শাসকীয় বিজেপি দলৰ সমান্তৰালভাৱে বিৰোধী কংগ্ৰেছেও আৰম্ভ কৰিছে ব্যাপক কুজকাৱাজ । সোমবাৰে কংগ্ৰেছে প্ৰথম খন প্ৰাৰ্থী তালিকা ঘোষণা কৰাৰ পিছত দুই -তিনিদিনৰ ভিতৰত বিজেপিয়েও প্ৰথম খন প্ৰাৰ্থী তালিকা ঘোষণা কৰাৰ সম্ভাৱনা প্ৰকট হৈ পৰিছে ৷ আনহাতে বিজেপিৰ প্ৰাৰ্থী তালিকা ঘোষণা কৰাৰ পূৰ্বে গেৰুৱা দলটোত যোগদান কৰিবলৈ সাজু হৈছে তিনিজনকৈ কংগ্ৰেছ বিধায়ক ৷
বুধবাৰে বৰপেটা সত্ৰত আয়োজিত দৌলযাত্ৰা উৎসৱৰ তৃতীয় দিনৰ কাৰ্যসূচীত অংশ লৈ মুখ্যমন্ত্ৰী ড:হিমন্ত বিশ্বশৰ্মাই সাংবাদিকৰে হোৱা বাৰ্তালাপত সদৰি কৰে যে বৃহস্পতিবাৰে তিনি কংগ্ৰেছ বিধায়ক ক্ৰমে বসন্ত দাসে,শশীকান্ত দাস, কমলাক্ষ দে’ পুৰকায়স্থই বিজেপি দলত যোগদান কৰিব ৷
অসমৰ ৰাজনৈতিক পৰিৱেশ উত্তপ্ত হোৱাৰ লগে লগে মুখ্যমন্ত্ৰী ড:শৰ্মাই বড়োলেণ্ডত বিজেপিৰ মিত্ৰতা সন্দৰ্ভতো কয়, ‘বিপিএফৰ সৈতে মিত্ৰতাৰ চৰ্ত আজি চূড়ান্ত হোৱাৰ সম্ভাৱনা আছে । এদিন বা দুদিনৰ ভিতৰত আমি অগপৰ সৈতে আসন ভাগ-বতৰা সন্দৰ্ভতো চূড়ান্ত সিদ্ধান্ত গ্ৰহণ কৰিম। এন ডি এৰ দুয়োটা মিত্ৰ বি পি এফ আৰু ইউ পি পি এলক বড়োলেণ্ড টেৰিটৰিয়েল ৰিজিঅ’নৰ ভিতৰত আসন ভাগ-বতৰা কৰাৰ ক্ষেত্ৰত একমত হ’বলৈ আহ্বান জনাই তেওঁ কয় যে মই পোনপটীয়াকৈ বড়ো ৰাজনীতিত প্ৰৱেশ কৰিব নোৱাৰো। তেওঁ আৰু কয়, “কাইলৈ আমি পুনৰ আমাৰ জন আশীৰ্বাদ যাত্ৰা আৰম্ভ কৰিম।
উল্লেখযোগ্য , শশীকান্ত দাস ৰহাৰ কংগ্ৰেছৰ বিধায়ক ৷ আনহাতে কৰিমগঞ্জ আৰু মঙলদৈ (অনুসূচিত জাতি)ৰ বিধায়ক হিচাপে আছে কমলাখ্যা দে পুৰকায়স্থ, আৰু বসন্ত দাস । তিনি কংগ্ৰেছ বিধায়কক বিজেপি চৰকাৰলৈ মুকলিকৈ সমৰ্থন আগবঢ়োৱাৰ বাবে নিলম্বন কৰিছিল এপিচিচিয়ে ৷
