Guwahati Mathgharia Accident Update:
দৈনিক অগ্ৰদূত ডিজিটেল ডেক্স:-মহানগৰীৰ মঠঘৰীয়াৰ গে’ট হাস্পতালৰ সন্মুখত মঠঘৰীয়াত সোমবাৰে সংঘটিত ভয়ংকৰ পথ দুৰ্ঘটনাত প্ৰাণ হেৰুৱাইছিল তিনিগৰাকী যুৱতী আকাংক্ষা শইকীয়া, পূজা সাহা আৰু আৰ্মিনা আহমেদে।দুৰ্ঘটনা সংঘটিত কৰা ছইফট ডিজায়াৰ খনৰ চালক আছিল ছামিম আহমেদ। দুৰ্ঘটনা সংঘটিত কৰিয়েই পলায়ন কৰিছিল ছামিমে। গুৱাহাটীৰ পৰা পলায়ন কৰি শ্বিলঙত আত্মগোপন কৰিছিল । আনকি ৰূপ সলাবলৈ শ্বিলঙৰ এখন চেলুনত চুলি-দাড়ি কটোৱাছিল ছামিমে।
অৱশ্যে পিছত ডিব্ৰুগড় আৰক্ষীয়ে ছামিমৰ ম’বাইল ট্ৰেক কৰি ডিব্ৰুগড়ৰ লাহোৱালত গ্ৰেপ্তাৰ কৰি নুনমাটি আৰক্ষীক চমজাই দিছিল ৷ কামৰূপ মহানগৰ জিলা চিজেএম আদালতত নুনমাটি আৰক্ষীয়ে হাজিৰ কৰি নিজৰ জিন্মাত লয় ৷ আৰক্ষীৰ জিন্মাত আৰক্ষীৰ মাৰাথন জেৰাত ন ন তথ্য সদৰি কৰিছে ছামিম আহমেদে ।
ছামিমৰ স্বীকাৰোক্তিৰ ভিত্তিত নুনমাটি আৰক্ষীয়ে শুকুৰবাৰে পুৱাই ছামিমক হেণ্ডকাফ লগাই মঠঘৰীয়া ঘাৰমৰা সত্ৰৰ পথত অভিযান চলাই দুৰ্ঘটনাৰ সময়ত ছামিমে পৰিধান কৰা তেজেৰে লুতুৰিপুতুৰি পোছাক উদ্ধাৰ কৰে নলাৰ পৰা । উল্লেখ্য যে দুৰ্ঘটনা সংঘটিত হোৱাৰ পিছত প্ৰমাণ নষ্ট কৰিবৰ বাবে ঘাৰমৰা সত্ৰৰ পথত ছামিমে সলনি কৰিছিল তেজ লগা পোছাক ৷ পোছাক নলাত পেলাই দিছিল ৷ তদুপৰি নলাত পেলাই দিছিল পূজা সাহাৰ ম’বাইল ফোন আৰু এটা মদৰ বটলো।
উল্লেখ্য যে ছামিম আহমেদৰ আৰক্ষীৰ জিন্মাৰ ম্যাদ আজি অন্ত পৰিব ৷ সেই অনুসৰি নুনমাটি আৰক্ষীয়ে আজিয়েই কামৰূপ মেট্ৰ’চিজিএম আদালতত হাজিৰ কৰাই পুনৰ নিজৰ জিন্মাত লোৱাৰ সম্ভাৱনা আছে ৷