Death penalty for rape and murder of children:চাৰি বছৰীয়া কন্যা শিশুৰ ধৰ্ষণ-হত্যাৰ অপৰাধীক মৃত্যুদণ্ড

দৈনিক অগ্ৰদূত ডিজিটেল ডেস্ক:এগৰাকী চাৰি বছৰীয়া কন্যা শিশুৰ ধৰ্ষণ আৰু হত্যাৰ অপৰাধীক মৃত্যুদণ্ডৰে দণ্ডিত কৰিলে বিলাসীপাৰা অতিৰিক্ত জিলা আৰু সত্ৰ ন্যায়াধীশৰ আদালতে। সোমবাৰে আদালতে এই ৰায় প্ৰদান কৰি মৃত্যুদণ্ডবে দণ্ডিত কৰা অপৰাধীজন হৈছে উৎপল ৰায়।

উল্লেখ্য যে চাপৰৰ কৃষ্ণকলি চাহ বাগিচাত বিগত ২০২৩ৰ চাৰি ছেপ্টেম্বৰত নিজ ঘৰৰ পৰা নিৰুদ্দেশ হৈছিল এগৰাকী আদিবাসী সম্প্ৰদায়ৰ চাৰি বছৰীয়া কণমানি কন্যা শিশু। পাছত পৰিয়ালৰ লোকে চাপৰ আৰক্ষী থানাত ঘটনা সন্দৰ্ভত এজাহাৰ দাখিল কৰে। এজাহাৰৰ ভিত্তিত আৰক্ষীয়ে ১৭৯/২৩ নম্বৰত এটা গোচৰ ৰুজু কৰি স্নিফাৰ ডগৰ সহায়ত অভিযান চলাই তিনিদিনৰ মূৰত চাহ বাগিচাখনৰ মাজৰ পৰা উদ্ধাৰ কৰিছিল কণমানিগৰাকীৰ মৃতদেহ। পাছত আৰক্ষীয়ে অনুসন্ধান চলাই অঞ্চলটোৰে উৎপল ৰায় নামৰ লোকজনক আটক কৰে।

উল্লেখ্য যে কৃষ্ণকলি চাহ বাগিচাৰ অফিচ লাইনত সংঘটিত এই নৃশংস ধর্ষণ আৰু হত্যাকাণ্ডত ভুক্তভোগী শিশুটো আছিল বাগিচাখনৰ এগৰাকী দৰিদ্ৰ আদিবাসী শ্রমিক পৰিয়ালৰ কন্যা। ঘটনাৰ দিনা পুৱাৰ ভাগত পিতৃ-মাতৃয়ে কণমানিগৰাকীক ঘৰত অকলে থৈ বাগিচাত কাম কৰিবলৈ ওলাই যায়। এই সুযোগৰে অপব্যৱহাৰ কৰে একে বস্তিতে ঘৰ জোঁৱাইৰূপে বাস কৰা উৎপলে। বঙাইগাঁও জিলাৰ ভাকৰীভিটা উজনপাৰাৰ ধীৰেন ৰায়ৰ পুত্র উৎপলে কেইবছৰমান পূর্বে কৃষ্ণকলি চাহ বাগিচাৰ এগৰাকী আদিবাসী যুৱতীক বিবাহ কৰাই ঘৰ জোঁৱাইৰূপে বাগিচাখনত বাস কৰি আহিছিল।

তদন্তকাৰী বিষয়া তথা চাপৰ থানাৰ তৎকালীন ভাৰপ্ৰাপ্ত বিষয়া ৰঞ্জিত কাকতিয়ে ঘটনাৰ অনুসন্ধান চলাই ঘৰত কোনো নথকাৰ সুযোগ লৈ উৎপলে চকলেটৰ প্রলোভন দেখুৱায় আৰু খেলাৰ ছলেৰে শিশুটিক ফুচুলাই বাগিচাৰ ভিতৰলৈ নিয়াটো নিশ্চিত হয়। কিছু সময় পাছত একাংশ স্থানীয় লোকে উৎপলক অকলে বাগিচাৰ পৰা ওলাই অহা প্রত্যক্ষ কৰে। কিন্তু তেতিয়ালৈ শিশুটিৰো কোনো সন্ধান পোৱা নাছিল। সন্ধিয়া উকলি যোৱাৰ পাছতো কন্যা শিশুটি ঘৰলৈ নহাত চিন্তিত পিতৃ-মাতৃয়ে চাপৰ থানাত এজাহাৰ দাখিল কৰে। আৰক্ষীয়ে তদন্তৰ ভিত্তিত ছয় ছেপ্টেম্বৰত উৎপলক আটক কৰে।

ধৃত উৎপলে আৰক্ষীৰ জেৰাত প্রথমে শিশুটিক সমীপৰ চাহ বাগানত নি অমানুষিকভাবে ধৰ্ষণ কৰাৰ লগতে এই ঘটনা লুকুৱাই ৰাখিবলৈ শিশুটিক নির্মমভাবে হত্যা কৰি পেলাই থৈ আহিছিল বুলি স্বীকাৰ কৰে। ভয়-ভাবুকি প্রদান কৰি চাহ বাগিচাখনৰ ভিতৰলৈ মাতি নি অসৎ কাৰ্য চৰিতাৰ্থ কৰা উৎপলে পাছত শিশুটিক হত্যা কৰি অসংযত অৱস্থাত পেলাই থৈ অহা বুলি স্বীকাৰ কৰিছিল। তেওঁৰ স্বীকাৰোক্তিৰ ভিত্তিত ছয় ছেপ্টেম্বৰৰ বিয়লি স্নিফাৰ ডগৰ সহায়ত আৰক্ষীয়ে শিশুটিৰ মৃতদেহ উদ্ধাৰ কৰে।

এই ঘটনাৰ পাছতে স্থানীয় ৰাইজৰ লগতে আদিবাসী ছাত্র সংগঠন, আছা আৰু বিভিন্ন দল-সংগঠনৰ নেতা-কর্মী ঘটনাস্থলীত উপস্থিত হৈ তীব্র প্রতিবাদ সাব্যস্ত কৰে। ঘটনাটোৰ গুৰুত্ব উপলব্ধি কৰি তদানীন্তন আৰক্ষী অধীক্ষক নবীন সিঙে ঘটনাস্থলীত উপস্থিত হৈ ক্ষুব্ধ ৰাইজক উচিত তদন্ত আৰু ন্যায় প্ৰদানৰ আশ্বাস দিছিল। আৰক্ষীয়ে ঘটনা সন্দৰ্ভত ভাৰতীয় দণ্ড বিধিৰ অধীনত ৩৬৩ (এ), ৩৭৬ (এবি), ৩০২, ২০১ আৰু আৰডব্লিউ ছেকছন ৬ পক্স’ আইনৰ ধাৰাত গোচৰ ৰুজু কৰি তদন্ত প্ৰক্ৰিয়া আৰম্ভ কৰে। তদন্তমৰ্মে আৰক্ষীয়ে নৰপিশাচ উৎপলক গ্ৰেপ্তাৰ কৰি জেললৈ প্ৰেৰণ কৰে।

দীর্ঘদিন ধৰি চলা গোচৰৰ অন্তত আজি ৰাণা দত্তৰ বিশেষ আদালতে সাক্ষীবাদী গ্রহণ আৰু আদালতৰ বিচাৰ প্রক্রিয়া সম্পন্ন হোৱাত পৈশাচিক ঘটনাটোৰ ঐতিহাসিক ৰায়দান প্রদান কৰে।

সেই অনুযায়ী অভিযুক্ত উৎপলক ৩০২ ধাৰাৰ অধীনত দোষী সাব্যস্ত কৰি মৃত্যুদণ্ডৰ ৰায় প্ৰদানৰ লগতে পক্স’ আইন ৬ৰ অধীনত ২০ বছৰ আৰু ২০১ ভাৰতীয় দণ্ড বিধিৰ অধীনত পাঁচ বছৰৰ কাৰাদণ্ড বিহে আদালতখনে। দীর্ঘ তিনি বছৰৰ অন্তত আজি এই ঐতিহাসিক ৰায় প্ৰদানৰ যোগেদি ন্যায় প্ৰদান কৰাত স্বস্তিৰ নিশ্বাস এৰিছে দুৰ্ভগীয়া পৰিয়ালটোৱে।

শিশুটিক ন্যায় প্ৰদানৰ লগতে শিশু নির্যাতন আৰু এনে জঘন্য অপৰাধৰ বিৰুদ্ধে সমাজলৈ এক কঠোৰ বাৰ্তা প্ৰেৰণ কৰিছে সত্ৰ ন্যায়াধশজনে। উল্লেখ্য যে এই গোচৰটোত চৰকাৰী অধিবক্তাৰূপে যুক্তি দর্শাইছিল লৈ তপন ভট্টাচার্য, গীতুমণি কলিতা নিয়োগী আৰু মৃদুলা বৰাই। আনহাতে, গোচৰটোৰ তদন্তকাৰী আৰক্ষী বিষয়াৰূপে তদন্তৰ প্রতিবেদন দাখিল কৰিছিল প্ৰথম অৱস্থাত অর্পনা তালুকদাৰে। পাছত ৰঞ্জিত কাকতিৰ লগতে শপতনামা দাখিল কৰিছিল আৰক্ষী বিষয়া দ্বীপজ্যোতি ইংতিয়ে।

ইফালে, আদালতৰ এই ঐতিহাসিক ৰায়দানত স্থানীয় বিভিন্ন মহিলা সংগঠনৰ লগতে বিভিন্ন পক্ষই সন্তুষ্টি প্রকাশ কৰিছে।