দৈনিক অগ্ৰদূত ডিজিটেল ডেস্ক : ৰাজ্য চৰকাৰে বন ধ্বংস, অবৈধ খনন আৰু প্ৰাকৃতিক সম্পদৰ লুণ্ঠনৰ বিৰুদ্ধে কঠোৰ পদক্ষেপ গ্ৰহণৰ কথা ঘোষণা কৰি অহাৰ সময়তে নগাঁও আৰু হোজাই জিলাৰ সীমান্তৱৰ্তী অঞ্চলত অব্যাহত আছে অবৈধ শিলৰ কুৱেৰীৰ ৰমৰমীয়া ব্যৱসায়।
বন মন্ত্রী জয়ন্ত মল্লবৰুৱাই অবৈধ খনন চক্ৰৰ বিৰুদ্ধে কঠোৰ ব্যৱস্থা গ্ৰহণৰ সকীয়নি দিয়াৰ পাছতো একাংশ অসাধু চক্রই বন বিভাগৰ চকুত ধূলি দি পুনৰ সক্রিয় কৰি তুলিছে শিল খননৰ অবৈধ ঘাটি। অভিযোগ অনুসৰি, ডবকা পাহাৰৰ মাদাতলি, ভেলৌগুৰি আদি অঞ্চলত একাধিক অবৈধ শিলৰ কুৱেৰী দীৰ্ঘদিন ধৰি চলি আছে।
নগাঁও বন সংমণ্ডল আৰু হোজাই দক্ষিণ বন সংমণ্ডলৰ অধীনস্থ এই অঞ্চলসমূহত কোনো ধৰণৰ চৰকাৰী অনুমতি, নিবিদা অথবা বৈধ নথিপত্র অবিহনেই দিনে-নিশাই চলি আছে শিল খননৰ কাম। স্থানীয় লোকৰ অভিযোগ অনুসৰি, এই অবৈধ কুৱেৰীসমূহৰ পৰা প্ৰতিদিনে শশ ডাম্পাৰে চালানবিহীনভাৱে শিল সৰবৰাহ কৰি আছে নগাঁও, হোজাইসহ বিভিন্ন প্রান্তলৈ।
ইয়াৰ ফলত চৰকাৰে প্ৰতিদিনে লাখ লাখ টকাৰ ৰাজহ হেৰুৱাবলগীয়া হৈছে বুলি অভিযোগ উত্থাপন হৈছে। ইফালে, ইমান বৃহৎ পৰিসৰত চলি থকা অবৈধ শিলৰ ব্যৱসায়ৰ ক্ষেত্ৰত বন বিভাগৰ ভূমিকা সন্দর্ভতো প্রশ্ন উত্থাপন হৈছে। স্থানীয় সচেতন মহলে অভিযোগ কৰিছে যে বিভাগীয় একাংশ বিষয়াৰ গাফিলতি অথবা একাংশ অসাধু চক্ৰৰ স’তে গোপন বুজাবুজিৰ বাবেই এনে অবৈধ ব্যৱসায় অব্যাহত ৰাখিবলৈ সক্ষম হৈছে।
আনহাতে, অবৈধ শিল কঢ়িওৱা ডাম্পাৰৰ বিৰুদ্ধে হোজাই জিলা পৰিবহণ বিভাগৰ ভূমিকাক লৈয়ো অসন্তুষ্টি প্রকাশ কৰিছে স্থানীয় ৰাইজে। অভিযোগ অনুসৰি, বহু ডাম্পাৰে অত্যধিক বোজা কঢ়িয়াই ৰাষ্ট্ৰীয় ঘাইপথ আৰু সংযোগী পথসমূহত চলাচল কৰি আছে।
অভাৰলোড ডাম্পাৰৰ বাবে পথৰ ক্ষতি হোৱাৰ লগতে সাধাৰণ যাত্ৰীৰ জীৱনলৈও বিপদ নামি অহাৰ আশংকা বৃদ্ধি পাইছে। সচেতন মহলৰ অভিযোগ, অবৈধ শিল খননে কেৱল চৰকাৰী ৰাজহৰ ক্ষতিয়েই কৰা নাই, ই পৰিৱেশৰ ওপৰতো গভীৰ প্ৰভাৱ পেলাইছে।
পাহাৰ কাটি প্রাকৃতিক ভাৰসাম্য বিনষ্ট কৰাৰ লগতে ভূমিস্খলন, জলস্তৰ হ্ৰাস আদি সমস্যাৰ সৃষ্টি হোৱাৰ সম্ভাৱনা বৃদ্ধি পাইছে। ইতিমধ্যে ডবকাৰ বিভিন্ন মহলে এই অবৈধ শিলৰ কুৱেৰীসমূহৰ বিৰুদ্ধে তাৎক্ষণিক কঠোৰ অভিযান চলোৱাৰ দাবী জনাইছে।
সমগ্র বিষয়টোত মুখ্যমন্ত্রীৰ হস্তক্ষেপ বিচাৰি এক উচ্চ পৰ্যায়ৰ তদন্তৰ দাবী উত্থাপন কৰিছে স্থানীয় ৰাইজে। এতিয়া প্রশ্ন উঠিছে- বনমন্ত্ৰীৰ কঠোৰ সকীয়নিৰ পাছতো কেনেকৈ চলি আছে এই অবৈধ শিলৰ সাম্রাজ্য? কাৰ আশীৰ্বাদত সক্ৰিয় হৈ আছে বন মাফিয়াৰ এই চক্র? এই সকলো প্ৰশ্নৰ উত্তৰ বিচাৰিছে ডবকা তথা নগাঁও-হোজাইবাসীয়ে।
