DelhiHighCourt : দৈনিক অগ্ৰদূত ডিজিটেল ডেস্ক : নতুন দিল্লীত প্ৰধানমন্ত্ৰী নৰেন্দ্ৰ মোদীৰ চৰকাৰী বাসভৱনৰ আশে পাশে থকা বস্তিবাসীসকলক ছয় সপ্তাহৰ সময় দিলে দিল্লী হাই ক’ৰ্টে। এই সময়ছোৱাৰ ভিতৰত ৩৫০ৰো অধিক বস্তিবাসীয়ে উক্ত স্থান খালী কৰি চৰকাৰে পুনৰ্সংস্থাপনৰ বাবে নিৰ্ধাৰণ কৰি দিয়া ঠিকনালৈ যাব লাগিব।
মঙলবাৰে দিল্লী হাই ক’ৰ্টত ন্যায়াধীশ ডি কে উপাধ্যায় আৰু ন্যায়াধীশ তেজশ কাৰিয়াৰ ডিভিজন বেঞ্চত এই গোচৰৰ শুনানি অনুষ্ঠিত হয়। শুনানিৰ সময়তে ডিভিজন বেঞ্চে নিৰ্দেশ দিয়ে যে বি আৰ কেম্প, মছজিদ কেম্প আৰু ডি আই ডি কলনীত থকা তিনিটা বস্তি খালী কৰিব লাগিব। নিৰ্ধাৰিত সময়ৰ ভিতৰত বস্তিসমূহ খালী নকৰিলে আৰক্ষীৰ সহযোগত উচ্ছেদ অভিযান চলোৱা হ’ব।
উল্লেখ্য যে প্ৰধানমন্ত্ৰীৰ চৰকাৰী বাসভৱনৰ সমীপৰ ৰেচক’ৰ্চ ৰোডত (যাৰ নতুন নাম ‘লোক কল্যাণ মাৰ্গ’) থকা তিনিটা বস্তি অপসাৰণৰ বাবে সক্ৰিয় হৈছিল চৰকাৰ। কেন্দ্ৰীয় গৃহ নিৰ্মাণ আৰু নগৰোন্নয়ন মন্ত্ৰালয়ৰ ফালৰ পৰা সংশ্লিষ্ট বাসিন্দাসকলক ছয় মাৰ্চৰ ভিতৰত ঘৰ খালী কৰাৰ নিৰ্দেশ দিয়া হৈছিল। উচ্ছেদৰ লগতে গৃহহাৰা পৰিয়ালসমূহৰ পুনৰ্সংস্থাপনৰ বাবেও কেন্দ্ৰ সক্ৰিয় হৈছিল।
চৰকাৰী সংস্থা ‘দিল্লী আৰবান শেল্টাৰ ইমপ্ৰুভমেণ্ট ব’ৰ্ড’ (ডিইউএছআইবি)-এ তেওঁলোকৰ বাবে বিকল্প বাসস্থান নিৰ্মাণ কৰিছে। সাভদা ঘেৱৰাৰ ডিইউএছআইবি কলনীত বস্তিবাসীসকলৰ বাবে ফ্লেট আবণ্টন কৰা হৈছে। সেই ফ্লেটসমূহতে ছয় মাৰ্চৰ ভিতৰত উক্ত তিনিটা বস্তিৰ পৰিয়ালসমূহক স্থানান্তৰিত হ’বলৈ কৈছিল কেন্দ্ৰীয় গৃহ নিৰ্মাণ আৰু নগৰোন্নয়ন মন্ত্ৰালয়ৰ অধীনস্থ ‘লেণ্ড এণ্ড ডেভেলপমেণ্ট অফিচে’।
কিন্তু তাৰ পাছতো উক্ত স্থান খালী কৰা হোৱা নাছিল। এইবাৰ দিল্লী হাই ক’ৰ্টে বস্তিবাসীসকলক ছয় সপ্তাহৰ সময়সীমা বান্ধি দিলে।
