KickboxingChampion : দৈনিক অগ্ৰদূত ডিজিটেল ডেস্ক : অহা ০৮ ৰ পৰা ১২ ছেপ্টেম্বৰলৈকে মধ্য প্ৰদেশৰ ইন্দোৰত অনুষ্ঠিত হ’বলগীয়া ৰাষ্ট্ৰীয় চিনিয়ৰ এণ্ড মাষ্টাৰ্চ কিকবক্সিং চেম্পিয়নশ্বিপত অসম দলত স্থান লাভ কৰিছে অসম আৰক্ষীৰ লেন্সনায়ক সোনেশ্বৰ বড়াই।
ভাৰতৰ প্ৰায় ৩০ খন ৰাজ্যৰ প্ৰায় ৭০০ প্ৰতিযোগীয়ে অংশগ্ৰহণ কৰিবলগীয়া এই প্ৰতিযোগিতাৰ ৯৪ কেজি শাখাত অসম দলৰ হৈ অংশগ্ৰহণৰ সুযোগ লাভ কৰিছে আন্তঃৰাষ্ট্ৰীয় কিকবক্সিং খেলুৱৈ গৰাকীয়ে।
যোৱা বৰ্ষৰ জুলাই মাহত ছত্তিশগড়ৰ ৰায়পুৰত অনুষ্ঠিত হোৱা চিনিয়ৰ ৰাষ্ট্ৰীয় কিকবক্সিং চেম্পিয়নশ্বিপ-২০২৫ ত ৯৪ কেজি শাখাত ব্ৰঞ্জৰ পদক পাবলৈ সক্ষম হৈছিল সোনেশ্বৰ বড়াই। সেই প্ৰতিযোগিতাত মুঠ ৩৩ খন ৰাজ্যৰ খেলুৱৈয়ে অংশগ্ৰহণ কৰিছিল।
ইয়াৰ পূৰ্বে ২০১৮ চনত থাইলেণ্ডৰ বেংককত অনুষ্ঠিত হোৱা আন্তঃৰাষ্ট্ৰীয় কিকবক্সিং চেম্পিয়নশ্বিপত ৰূপৰ পদক অৰ্জন কৰা সোনেশ্বৰ বড়াই কিকবক্সিং খেলত এতিয়ালৈকে ভাৰতক তিনিবাৰকৈ প্ৰতিনিধিত্ব কৰিছে।২০০৭ চনত নেপালত অনুষ্ঠিত আন্তঃৰাষ্ট্ৰীয় কিকবক্সিং চেম্পিয়নশ্বিপত সোণৰ পদক, ২০০৯ চনত শ্ৰীলংকাত অনুষ্ঠিত আন্তঃৰাষ্ট্ৰীয় কিকবক্সিং চেম্পিয়নশ্বিপত সোণৰ পদক লাভ কৰিছে।
এতিয়ালৈকে মুঠ ১৫ বাৰ ৰাজ্যিক পৰ্যায়ৰ কিকবক্সিং খেলত পদক আৰু ৮ বাৰ ৰাষ্ট্ৰীয় পদক পাবলৈ সক্ষম হৈছে তেওঁ।
নিজৰ কৰ্মদক্ষতা আৰু সাহসিকতাৰ বাবে ২০১৮ চনত আৰক্ষী সঞ্চালক প্ৰধানৰ প্ৰশংসা পদক আৰু ২০১৬ চনত আন্তৰিক সুৰক্ষা সেৱা পদক লাভ কৰিছিল।
খেলৰ সমান্তৰালকৈ সংগীতৰ সৈতেও জড়িত তেওঁৰ আৰক্ষীৰ গীতৰ ভিডিঅ’সমূহ ক্ৰমে ‘যুঁজাৰু দা বেটেলিয়ান’, ‘চকু’, ‘ৰণুৱা দ্যা ৱাৰিয়ৰ’ আদিয়ে ৰাইজৰ বিপুল সমাদৰ লাভ কৰিছে। সেইদৰে ‘পেটং বিহু’, ‘বগাকাই’, ‘লাহন শালপতি’ আদি তেওঁৰ জনপ্ৰিয় বিহুগীত। আনহাতে ‘বক্সাৰ’ তেওঁৰ এটি মিউজিকেল ভিডিঅ’।
আন্তঃৰাষ্ট্ৰীয় বক্সাৰ তথা এছিয়ান গেমছত সোণৰ পদকৰ লগতে শ্ৰেষ্ঠ বক্সাৰৰ সন্মান লাভ কৰা অসম কন্যা কল্পনা চৌধুৰীৰ বক্সিং জীৱনক লৈ কৰা গানৰ ভিডিঅ’ হৈছে এই ‘বক্সাৰ’।
উল্লেখ্য যে, ২০১০ চনত অসম আৰক্ষীত যোগদান কৰা সোনেশ্বৰ বড়াই ১৪ বছৰ বাক্সা জিলাৰ চৰাইমাৰিস্থিত ২৪ নং অসম আৰক্ষী বেটেলিয়নত কৰ্তব্য সম্পাদন কৰাৰ পিছত সম্প্ৰতি ডুমডুমা সমজিলা আৰক্ষী অধীক্ষকৰ ব্যক্তিগত নিৰাপত্তাৰক্ষী হিচাপে কৰ্মৰত।
সোনেশ্বৰ বড়াৰ ঘৰ কাকপথাৰৰ কাঠবস্তিত। পিতৃ প্ৰয়াত প্ৰফুল্ল বড়া আৰু মাতৃ প্ৰয়াত বীণাপানি বড়া। দুয়ো প্ৰাথমিক বিদ্যালয়ৰ শিক্ষক আছিল। ২০১৯ বৰ্ষত নতুন দিল্লীৰ ৰাজেন্দ্ৰ ভৱনত ‘বাবু জগজীৱন ৰাম ৰাষ্ট্ৰীয় বঁটা’ ৰে সন্মানিত হোৱা সোনেশ্বৰ বড়া অসম আৰক্ষীৰ এগৰাকী কৰ্তব্যপৰায়ণ আৰু নিষ্ঠাবান জোৱানৰ লগতে এগৰাকী সুদক্ষ খেলুৱৈ।
২০০২ চনত কুংফুৰ জৰিয়তে ৰাজ্যৰ ক্ৰীড়াৰ ক্ষেত্ৰখনত খোজ পেলোৱা সোনেশ্বৰ বড়াৰ দৰে এগৰাকী সুদক্ষ খেলুৱৈ এটা জাতিৰ গৌৰৱ হোৱাৰ উপৰিও দেশৰ সম্পদস্বৰূপ। অসমৰ সম্ভাৱনাপূৰ্ণ ক্ৰীড়া ক্ষেত্ৰখনলৈ আশা আৰু অনুপ্ৰেৰণাৰ ঢল বোৱাই অনাৰ লগতে অসম আৰক্ষীক গৌৰৱান্বিত কৰা সুদক্ষ তথা আন্তঃৰাষ্ট্ৰীয় কিকবক্সিং খেলুৱৈ, গায়ক, অভিনেতা সোনেশ্বৰ বড়াৰ এই জয়যাত্ৰা যেন আগলৈও অব্যাহত থাকক তাকেই সকলোৱে কামনা কৰিছে।