Sivsagar:
দৈনিক অগ্ৰদূত ডিজিটেল ডেস্ক:বীৰ লাচিত সেনাৰ শিমলুগুৰি আঞ্চলিক সমিতিৰ সভাপতি মানসজ্যোতি চেতিয়াৰ ৰহস্যজনক মৃত্যুৰ তদন্ত মুখ্যমন্ত্ৰী ড:হিমন্ত বিশ্ব শৰ্মাৰ নিৰ্দেশক্ৰমে বুধবাৰৰ পৰা আৰম্ভ হোৱাৰ পিছত কালিয়ে ঘটনাস্থলীত ফৰেনচিক বিশেষজ্ঞৰ এটা দল আৰু আইজিপি উপস্থিত হৈ ঘটনাস্থলী পৰিদৰ্শন কৰি নিৰীক্ষণ কৰি কেতবোৰ নমুনা সংগ্ৰহ কৰিছে। আনহাতে এনে ঘটনাক্ৰমৰ মাজতে মানসজ্যোতি চেতিয়াৰ ৰহস্যজনক মৃত্যুৰ তদন্তৰ বাবে গঠন হ’ল এছআইটি ৷
শিৱসাগৰৰ ডিএছপি লীলা বৰাৰ নেতৃত্বত গঠন কৰা হয় এছআইটি ৷ এছআইটি দলটোৰ আন সকল হ’ল আমগুৰি থানাৰ অ’চি মৃদুল হাজৰিকা, গোচৰটোৰ তদন্তকাৰী বিষয়া তথা নাজিৰা থানাৰ এছআই চিৰাজ শইকীয়া আৰু এছআই সুমি বর্মন ৷
উল্লেখ্য যে যোৱা ২৩ আগষ্টৰ নিশা ৯-৩০ বজাত নাজিৰাৰ বিহুবৰৰ পথৰ ওপৰত মুমূর্ষু অৱস্থাত স্থানীয় একাংশ লোকে মানসক উদ্ধাৰ কৰে। লগে লগে তেওঁক ডিব্ৰুগড়ৰ অসম চিকিৎসা মহাবিদ্যালয় হাস্পতাললৈ প্ৰেৰণ কৰা হয়। দুর্ভাগ্যবশতঃ কালি পুৱা চিকিৎসাধীন অৱস্থাতে তেওঁৰ মৃত্যু হয়। মানসৰ মুখমণ্ডল আৰু হাতত গুৰুতৰ আঘাতৰ চিন আছিল।
গতিকে তেওঁৰ মৃত্যুক বহুতে সহজভাবে লোৱা নাই। বীৰ লাচিত সেনায়ো ঘটনাটোৰ উচ্চ পৰ্যায়ৰ তদন্ত দাবী কৰিছে। তদুপৰি পৰিয়াল, স্থানীয় লোক আৰু বীৰ লাচিত সেনাৰ মতে, ঘটনাটো সাধাৰণ পথ দুর্ঘটনা নহয়, পূর্বপৰিকল্পিত আক্রমণ হ’ব পাৰে। এনে অৱস্থাতে বিহুবৰৰ নিৱাসী আটাউৰ ৰহমানৰ মাটি-ভেটিক কেন্দ্ৰ কৰি পূৰ্বে সৃষ্টি হোৱা এক বিবাদৰ কথাও চর্চালৈ আহিছে।
অভিযোগ অনুসৰি যোৱা ১৯ জুলাইৰ বানত ৰহমানৰ ঘৰ উটি যোৱাৰ সুযোগ লৈ একাংশ লোকে তেওঁক পুনৰ ভেটিত ঘৰ সজাত বাধা দিছিল। আনহাতে, ৰহমানৰ হৈ মানসজ্যোতিয়ে থিয় দিছিল বুলি সূত্রই জনায়। পৰৱৰ্তী সময়ত কে’বাটাও দল-সংঠনৰ সহযোগত আটাউৰ ৰহমানক নিজৰ ভেটিতে ঘৰ সাজি দিয়াৰ ব্যৱস্থা কৰা হৈছিল। এই ঘটনাক কেন্দ্ৰ কৰি মানসজ্যোতি চেতিয়াৰ স’তে একাংশ লোকৰ তৰ্ক-বিতর্ক হোৱা বুলিও অভিযোগ উঠিছে।
আনহাতে, মানসৰ মৃত্যুৰ স’তে জড়িত বুলি সন্দেহ কৰা এক ঘটনাই ৰহস্য অধিক গভীৰ কৰি তুলিছে। শনিবাৰে নিশা শুই থকা অৱস্থাত আটাউৰ ৰহমানক কোনো দুর্বৃত্তই প্ৰহাৰ কৰাৰ সন্দেহ কৰা হৈছে। পুৱা পৰিয়ালৰ লোকে তেওঁক মুখেৰে তেজ ওলাই থকা অৱস্থাত উদ্ধাৰ কৰে। তেওঁৰ মুখমণ্ডল আৰু হাততো আঘাতৰ চিন আছিল বুলি পৰিয়ালৰ সূত্রই জানিবলৈ দিছে।
অভিযোগ অনুসৰি, যোৱা ২৩ আগষ্টৰ নিশা ৰহমানৰ খবৰ ল’বলৈ কোনোবাই ফোন কৰি মানসজ্যোতি চেতিয়াক মাতি নিছিল। ৰহমানৰ ঘৰলৈ আহি থকাৰ সময়তে পথৰ ওপৰত তেওঁক মুমূর্ষু অৱস্থাত উদ্ধাৰ কৰা হয়।
