Assam Govt:
দৈনিক অগ্ৰদূত ডিজিটেল ডেস্ক: মাত্র দুসপ্তাহৰ ভিতৰতে পুনৰ এহেজাৰ কোটি টকা ঋণ ল’বলৈ সাজু হৈছে অসম চৰকাৰ। অহা পহিলা ছেপ্টেম্বৰত এই ঋণ চৰকাৰে গ্ৰহণ কৰিব। ঋণৰ সুতৰ হাৰৰ পৰিমাণ ধার্য কৰা হৈছে ৭.৫৬ শতাংশ। চৰকাৰৰ বণ্ড নিলামৰ জৰিয়তে গ্রহণ কৰিবলগীয়া এই ঋণৰ বাবে ‘কম্পিটিটিভ’ আৰু ‘নন কম্পিটিটিভ’ দুয়ো প্ৰকাৰৰ নিবিদা আহ্বান কৰা হৈছে।
নিলাম অনুষ্ঠিত নিলাম অনুষ্ঠিত হ’বলগীয়া দিনটোতে আগ্রহী বিনিয়োগকাৰীয়ে পুৱা নিবিদা দাখিল কৰি দুপৰীয়া নিলামত অংশগ্ৰহণ কৰিব পাৰিব বুলি অসম চৰকাৰৰ বিত্ত বিভাগৰ বাজেট শাখাই নিয়ম ধাৰ্য কৰিছে। ভাৰতীয় ৰিজার্ভ বেংকৰ মুম্বাইস্থিত শাখাত এই নিলাম অনুষ্ঠিত হ’ব। উল্লেখ্য যে যোৱা ১৮ আগষ্টতো একেটা স্থানতে বণ্ড বিক্ৰীৰ জৰিয়তে অসম চৰকাৰে এহেজাৰ কোটি টকা ঋণ লৈছিল।
উল্লেখ্য যে বৰ্তমানৰ অসম চৰকাৰখনে যোৱা কাৰ্যকালটোত ঋণৰ নামত অসমক আকণ্ঠ ধাৰৰ বোজাই বুৰোৱা বুলি তীব্র প্রতিক্রিয়া অব্যাহত আছে। কিন্তু তেনে প্রতিক্রিয়ালৈ কর্ণপাতো নকৰি চৰকাৰে ঋণ গ্ৰহণৰ গতি এইবাৰ চৰকাৰ গঠনৰ সময়ৰ পৰাই ত্বৰান্বিত কৰিছে। তাৰেই পুনৰাবৃত্তি অহা পহিলা ছেপ্টেম্বৰত পুনৰ ঘটিব। উল্লেখ্য যে বিত্ত বিভাগৰ তথ্য অনুসৰি অসম চৰকাৰৰ ৰাজহুৱা ঋণৰ পৰিমাণ ইতিমধ্যে ১.৬২ লাখ কোটিৰো অধিক হৈছে।
বিত্তীয় নাটনিত চলি থকা ৰাজ্যখনক শেহতীয়াকৈ পূৱ অসমৰ চাৰিখন জিলাৰ অভাৱনীয় বানে একপ্ৰকাৰ কঁকাল ভাঙে। এই ক্ষতি পূৰাবলৈ মুখ্যমন্ত্ৰীৰ সাহায্য পুঁজিত জমা হোৱা ধন ব্যৱহাৰ কৰা হ’ব বুলি ঘোষণা কৰিছে মুখ্যমন্ত্রীয়ে। তদুপৰি কেন্দ্ৰীয় চৰকাৰেও অসমে বিচৰা মতেই পুঁজি আবণ্টন দিয়াৰ আশ্বাস দিছে। ইয়াৰ বিপৰীতে অনুৎপাদক আৰু উন্নয়নমূলক কাম কৰিবলৈ অসমক প্রয়োজন হৈছে বৃহৎ পৰিমাণৰ পুঁজি। ইতিমধ্যে অৰুণোদয় আঁচনি পুনৰ সক্ৰিয় কৰা হৈছে। তদুপৰি হিতাধিকাৰীক পোনপটীয়াকৈ টকা দিয়া আন কে’বাখনো আঁচনি ছেপ্টেম্বৰৰ পৰা ৰূপায়ণ হোৱাৰ সম্ভাৱনা আছে। ইয়াৰ বাবে প্ৰয়োজন হৈছে বৃহৎ পৰিমাণৰ পুঁজি।
অসমৰ দৰে অৰ্থনৈতিকভাৱে পিছপৰা ৰাজ্য এখনে এনেদৰে উপর্যুপৰি ঋণ গ্রহণ কৰাক লৈ বিতৰ্কৰো সূচনা হৈ আহিছে। অথচ উৎপাদন শূন্য বোজাৰ বাবে প্রায় প্রতিমাহে চৰকাৰে ঋণ ল’বলগীয়া হৈছে। অসমে যি গতিত ঋণ গ্রহণ কৰি আহিছে তাকে লৈ ভাৰতৰ মহাগাণনিকেও উদ্বেগ প্রকাশ কৰিছে।