Nepal Flood update news:
দৈনিক অগ্ৰদূত ডিজিটেল ডেস্ক:যোৱা ২৬ আগষ্টৰ নেপালৰ জলপ্রলয়ত আজি নিশা পর্যন্ত ৬২৬ জন লোকে প্রাণ হেৰুওৱাটো নিশ্চিত কৰিছে দেশখনৰ চৰকাৰে। নেপালৰ দুর্যোগ প্রশমন কর্তৃপক্ষই প্রকাশ কৰা অনুসৰি এই বিধ্বংসী বানত অন্ততঃ৬২৬ জন লোকে প্রাণ হেৰুওৱাৰ উপৰি কে’বা সহস্র সন্ধানহীন হয়। সন্ধানহীন হৈ থকা সকলৰ মাজত তিনিশৰো অধিক ভাৰতীয় লোক আছে। এনেদৰে কে’বা সহস্র লোক সন্ধানহীন হৈ থকাৰ বাবে মৃতকৰ সংখ্যা বৃদ্ধিৰ আশংকা আছে।
আনহাতে, নেপাল চৰকাৰৰ মতে বান দুৰ্গতৰ উদ্ধাৰত ১৪ হেজাৰৰো অধিক নিৰাপত্তা কর্মী নিয়োগ কৰা হৈছে। এইসকলে বিগত তিনিদিন ধৰি উদ্ধাৰ অভিযান চলাই কমেও ৩,৭৪২ জন লোকক জীৱন্তে উদ্ধাৰ কৰে। তৎসত্ত্বেও বহু লোক বানে ধ্বংস কৰা ঘৰ-দুৱাৰ আৰু বোকাৰ মাজত সোমাই থকাৰ সন্দেহ কৰা হৈছে।
# শুংসূত্রহীন ৩২০ ভাৰতীয়
নেপালৰ সাম্প্ৰতিক জলপ্রলয়ত ৩২০ জন ভাৰতীয় লোক সন্ধানহীন হৈ আছে। আজি এই তথ্য প্রকাশ কৰে দেশৰ বৈদেশিক পৰিক্ৰমা মন্ত্রণালয়ৰ মুখপাত্ৰ ৰণধীৰ জয়ছোৱালে। এই সম্পর্কত তেওঁ কয়, ‘কালি বান বিধ্বস্ত অঞ্চলসমূহৰ পৰা ২১ জন ভাৰতীয় লোক আহি কাঠমাণ্ডুত উপস্থিত হয়। ত্রিশূলী১ জলবিদ্যুৎ প্রকল্পত নিয়োজিত ৬৩ জন ভাৰতীয়কো জীৱন্তে উদ্ধাৰ কৰা হৈছে।’
কাঠমাণ্ডুত উপস্থিত হোৱা এই ২১ ভাৰতীয় লোকে কালি দুপৰীয়া দিল্লী বিমান কোঠলৈ প্ৰেৰণ কৰা হয়। বিমানকোঠত তেওঁলোকক আদৰণি জনায় বৈদেশিক মন্ত্রী এছ জয়শংকৰে। ইয়াৰ পূৰ্বে কালি কাঠমাণ্ডুত তেওঁলোকক সাক্ষাৎ কৰে নেপালস্থিত ভাৰতীয় ৰাষ্ট্ৰদূতে। তাৰ পাছতে তেওঁলোকক দেশলৈ পঠিওৱাৰ ব্যৱস্থা কৰা হয়। এই আটাইকেইজন লোক তামিলনাডুৰ বাসিন্দা। তৎসত্ত্বেও নেপালৰ এই জলপ্ৰলয়ত ৩২০ জন ভাৰতীয় আৰু কমেও এশজন ভাৰতীয় মূলৰ লোক সন্ধানহীন হৈ আছে বুলি তেওঁ জনায়। বাতৰি লিখা পৰলৈকে এইসকলৰ স’তে যোগাযোগ স্থাপন সম্ভৱ হোৱা নাই।
ঘটনাৰ ৫৬ ঘণ্টাৰ পাছতো এনেদৰে তিনি শতাধিক ভাৰতীয় লোক সন্ধানহীন হৈ থকাত দেশৰ চৌদিশে প্রচণ্ড উদ্বিগ্নতাৰ সৃষ্টি হৈছে। সন্ধানহীন এই লোকসকলৰ মাজত অসমৰ লোক থকা বুলিও সন্দেহ কৰা হৈছে। আনহাতে, নেপালৰ পৰ্যটন মন্ত্রণালয়ে প্রকাশ কৰা অনুসৰি আজি আবেলি তিনি বজা পর্যন্ত বান কৱলিত অঞ্চলসমূহৰ পৰা ৮৫ জন ভাৰতীয় নাগৰিকক জীৱন্তে উদ্ধাৰ কৰা হয়।
#উত্তৰ প্ৰদেশত উদ্ধাৰ বানত উটি অহা সাতটা মৃতদেহ
নেপালৰ ভয়াৱহ আকস্মিক বানে উটুৱাই নি মৃত্যুমুখত পেলোৱা সাতজন দুৰ্ভগীয়া লোকৰ মৃতদেহ উত্তৰ প্ৰদেশ সীমান্তত উদ্ধাৰ হৈছে। নেপালৰ পৰা ভাৰতত প্ৰৱেশ কৰা নৈয়ে মৃতদেহকেইটা উটুৱাই আনে। অৱশ্যে বাতৰি লিখা পৰলৈকে মৃত লোককেইজন চিনাক্ত হোৱা নাই। তদুপৰি এই লোককেইজন সন্ধাহীনৰ তালিকাত আছে নে নাই সেয়াও স্পষ্ট হোৱা নাই।
উল্লেখ্য যে উত্তৰ প্ৰদেশৰ মহাৰাজগঞ্জ আৰু কুশীনগৰ জিলা নেপাল সীমান্তত অৱস্থিত। সূত্ৰই জনোৱা মতে, কালি মহাৰাজগঞ্জ নৈৰে চাৰিটা মৃতদেহ নেপালৰ পৰা উটি আহে। এই সম্পৰ্কত মহাৰাজগঞ্জ জিলাৰ জিলা আযুক্ত গৌৰৱ সিং সোগৰৱালে কয়, ‘এই লোককেইজনৰ মৃত্যু নেপালৰ বানৰ ফলত হয় বুলি আমি ধাৰণা কৰিছো। নৈৰে উটি অহা অৱস্থাত মৃতদেহকেইটা উদ্ধাৰ হয়।’ আন তিনিটা মৃতদেহ কুশীনগৰ জিলাত উদ্ধাৰ হয়। নেপাল সীমান্তৰ পৰা ভাৰতৰ ফালে ৭০ কিলোমিটাৰ ভিতৰত এই সাতজন দুৰ্ভগীয়াৰ মৃতদেহ উদ্ধাৰ হয়।
# বিদেশী সাহায্য বাহিনী প্ৰেৰণৰ প্ৰস্তাৱ অগ্রাহ্য নেপালৰ
ভাৰতকে ধৰি বিভিন্ন দেশে সাহায্য বাহিনী প্ৰেৰণৰ যি প্ৰস্তাৱ আগবঢ়াইছে সেয়া প্রাকৃতিক দুর্যোগ বিধ্বস্ত নেপালে অগ্রাহ্য কৰিছে। কালি এই কথা স্পষ্ট কৰি দি দেশৰ বৈদেশিক মন্ত্রণালয়ে কয়, ‘দুর্গতসকলক সন্ধান আৰু উদ্ধাৰ অভিযানৰ ক্ষেত্ৰত আমাক কোনো বৈদেশিক সাহায্যৰ প্ৰয়োজন নাই। আমাৰ নিৰাপত্তা সংস্থাসমূহে সন্ধান আৰু উদ্ধাৰ অভিযান চলাই আছে।’ একেদৰে এই সম্পৰ্কত বৈদেশিক মন্ত্রণালয়ৰ মুখপাত্র লোক বাহাদুৰ ছেত্রীয়েও কয় যে এনে দুৰ্যোগৰ সময়ত সহায় আগবঢ়াবলৈ লোৱাটো স্বাভাৱিক ঘটনা; কিন্তু এতিয়া নেপালক সহায়ৰ প্ৰয়োজন নাই। নেপাললৈ বিদেশী ৰাষ্ট্ৰই সাহায্য বাহিনী প্ৰেৰণৰ বাবে আগবঢ়োৱা প্ৰস্তাৱ নাকচ কৰা বুলি দক্ষিণ কোৰিয়াৰ বৈদেশিক মন্ত্রণালয়েও প্ৰকাশ কৰিছে।
