NepalFlood : দৈনিক অগ্ৰদূত ডিজিটেল ডেস্ক : প্রকৃতিব ধ্বংসলীলাই কাঢ়ি নিলে নেপালৰ সহস্রাধিক লোকৰ জীৱন। সমান্তৰালভাৱে বৃদ্ধি পাইছে সন্ধানহীনৰ সংখ্যাও। নেপালৰ দুর্যোগ ব্যৱস্থাপনা প্ৰাধিকৰণৰ তথ্য অনুসৰি এই পর্যন্ত মৃতকৰ সংখ্যা ৯৩৯ জন। সন্ধানহীন প্রায় ৪,৩০০ জন বুলি প্রকাশ কৰা হৈছে। ইয়াৰে ছশজন বিদেশী নাগৰিক।
সোমবাৰে নেপালৰ বিপৰ্যয়ৰ উদ্ধাৰ অভিযানৰ যষ্ঠ দিনত বিভাগীয় বিষয়াই জনোৱা মতে, এতিয়াও বহু মৃতদেহ বোকা-মাটিৰ তলত পোত খাই আছে।সেইবোৰ উদ্ধাৰ কৰিবলৈ সময়ৰ প্ৰয়োজন হ’ব। এই পর্যন্ত এটাৰ পাছত আনটো মৃতদেহ বোকা-মাটিৰ তলৰ পৰা উদ্ধাৰ কৰা হৈছে।
আকস্মিক বানত নেপালৰ আঠখন জিলা সর্বাধিক ক্ষতিগ্রস্ত হৈছে। ইয়াৰে ভিতৰত চিতুৱানৰ পৰা ২৭২, নৱালৰ পার্চি পূবৰ পৰা ২০৭, নৱালপাৰ্চি পশ্চিমৰ পৰা ১৫১ আৰু গোর্খা জিলাৰ পৰা ৬২ টা মৃতদেহ উদ্ধাৰ কৰা হৈছে। তদুপৰি নুৱাকুটত ৯৫ টা, ধাদিঙত ৫৫ টা, তানাহুত ৩৭ আৰু ৰাচুৱাত ২৪ টা মৃতদেহ উদ্ধাৰ হৈছে।
যোৱা ২৬ আগষ্টৰ প্রলয়ংকৰী বানত বিপর্যস্ত হোৱা এভাৰেষ্টৰ দেশ নেপালত আজিও বহু সন্ধানহীন হৈ আছে। সময় যিমানে আগুৱাইছে সিমানে জীবিত অৱস্থাত এইসকলৰ উদ্ধাৰৰ আশা নির্বাপিত হ’বলৈ ধৰিছে। এই পর্যন্ত জীৱিত অৱস্থাত উদ্ধাৰ কৰা হয় প্রায় ১১,৩৭৯ জন লোকৰ।
দেওবাৰে সন্ধিয়া পর্যন্ত তিব্বতত ১৬ টা মৃতদেহ উদ্ধাৰ হয়। চীনৰ কর্তৃপক্ষই জনোৱা মতে তেওঁলোকৰ অঞ্চলত কমেও পাঁচ শতাধিকৰ কোনো সন্ধান নাই। আন্তর্জাতিক সংস্থা ৰেড ক্ৰছৰ প্ৰাথমিক হিচাপ অনুসৰি আনুমানিক ক্ষতিগ্রস্ত লোকৰ সংখ্যা ৯০ শতাধিক হ’ব।
ৰাছুৱাৰ ভোটেকোশী নদীৰ বানত বোকা-মাটি আৰু পানীৰ প্ৰৱল সোঁতত লোকালয় নিশ্ছিন্ন হৈ পৰে। পানীৰ তীব্র বেগত বহু মৃতদেহ মূল ঘটনাস্থলীৰ পৰা বহু কিলোমিটাৰ দূৰলৈ উটি যায়। যাৰ ফলত উদ্ধাৰ কাৰ্য অধিক কঠিন হৈছে।
মৃতদেহ উদ্ধাৰ হ’লেই চিনাক্তকৰণ প্ৰক্ৰিয়া সম্ভৱ হোৱা নাই। অধিকাংশ দেহে চিনাক্ত কৰিব পৰা অৱস্থাত নথকা বাবেই ডিএনএ নমুনা সংৰক্ষণ কৰা হৈছে। কর্তৃপক্ষই এই মৃতদেহ স্বাভাৱিকতে বেছিদিন পেলাই থ’ব নোৱাৰে। দুর্যোগ ব্যৱস্থাপনা বিভাগে জনোৱা মতে নেপালত মর্গত এতিয়া আৰু মৃতদেহ ৰখাৰ ঠাই নাই।
অস্থায়ীভাবে কিছু ভৱনত মৃতদেহ ৰখাৰ ব্যৱস্থা কৰা হৈছে যদিও সেইসমূহত দীর্ঘসময় সংৰক্ষণৰ কোনো আন্তঃগাঁথনি নাই। গতিকে নেপাল চৰকাৰে মৃতদেহৰ পৰ্যাপ্ত তথ্য সংগ্ৰহ কৰি গণ কবৰৰ সিদ্ধান্ত লৈছে। আন এক তথ্য অনুসৰি তিব্বতত সন্ধানহীন ৫৪৭ জনৰ ভিতৰত ৪৯ জন ভাৰতীয় আৰু এইসকল তামিলনাডুৰ বাসিন্দা।
দেওবাৰে তামিলনাডুৰ এক ভ্রমণ সংস্থাই জনোৱা মতে তেওঁলোকৰ ৪৯ জনীয়া এটা পর্যটক দল কৈলাশ-মানস সৰোবৰ দৰ্শন কৰিবলৈ গৈছিল। ইপিনে, নেপালত সন্ধানহীন হোৱা প্ৰতিজন ভাৰতীয়ই পর্যটক নহয় বুলি তথ্য প্রকাশ হৈছে। বিভিন্নজনে নেপালৰ জল বিদ্যুৎ প্রকল্পত শ্রমিকৰ কাম কৰিবলৈ গৈছিল। আনহাতে নেপালৰ বহু সেনা জোৱান আৰু আৰক্ষী বিষয়া সন্ধানহীন হৈ আছে।
নেপালৰ হাস্পতালসমূহতো মানুহৰ ভিৰ আৰম্ভ হৈছে। সন্ধানহীন প্রিয়জনক বিচাৰি দূৰ দূৰণিৰ পৰা জমা হৈছে মানুহ। পৰিস্থিতি চম্ভালিবলৈ হাহাকাৰ অৱস্থাৰ মুখত পৰিছে কাঠমাণ্ডুৰ প্রশাসন। ইপিনে, ভাৰতীয় উদ্ধাৰকাৰী দল নেপালত উপস্থিত হৈছে।
