NepalFlood : দৈনিক অগ্ৰদূত ডিজিটেল ডেস্ক : নেপালৰ শেহতীয়া জলপ্রলয়ত দৰাচলতে কিমান লোক মৃত্যুমুখত পৰিল বা কিমান সন্ধানহীন হ’ল তাৰ সঠিক তথ্য এসপ্তাহৰ পাছতো স্পষ্ট হোৱা নাই। যোৱা ২৬ আগষ্টত অহা এই জলপ্ৰলয়ৰ ধ্বংসলীলা প্রত্যক্ষ কৰি বহুতে সহস্রাধিক লোকৰ প্ৰাণহানিৰ আশংকা কৰিছিল। এই আশংকা অমূলক নোহোৱাটোরে সম্প্রতি প্রতিপন্ন হৈছে। কাৰণ এই বিধ্বংসী বানত ডুবি মৃত্যু হোৱা ১,০৫০ জন দুর্ভগীয়া লোকৰ মৃতদেহ কালি পর্যন্ত উদ্ধাৰ কৰা হৈছে।
মঙলবাৰে এই তথ্য সদৰী কৰে দেশখনৰ ৰাষ্ট্ৰীয় দুর্যোগৰ বিপদ হ্রাস আৰু ব্যৱস্থাপনা কর্তৃপক্ষই। অৱশ্যে বাতৰি লিখা পৰলৈকে এই সহস্রাধিক মৃতদেহৰ মাথোঁ চাৰি শতাংশৰ চিনাক্তকৰণহে সম্ভৱ হৈছে। ৰাষ্ট্ৰীয় দুর্যোগ উপশম কর্তৃপক্ষই লগতে প্রকাশ কৰা অনুসৰি আজি সন্ধিয়া পর্যন্ত আন চাৰি সহস্রাধিক লোক সন্ধানহীন হৈ আছে।
এই সন্ধানহীনসকলৰ মাজত ৫৮৩ জন বিদেশী নাগৰিক, ৬৩৯ জন বিভিন্ন জলবিদ্যুৎ প্রকল্পৰ কৰ্মচাৰী তথা নেপালী সেনা আৰু আৰক্ষীৰ লোক। ইপিনে, এই জলপ্রলয়ত উটি যোৱা বা আবদ্ধ হোৱা১১,৯৯৩ জন লোকক জীৱন্ত অৱস্থাত কর্তৃপক্ষই উদ্ধাৰ কৰিছে।
বোকাৰে পৰিপূৰ্ণ সুৰংগত আবদ্ধ ছয় শতাধিক জলবিদ্যুৎ প্রকল্পৰ কৰ্মচাৰী নেপালৰ শেহতীয়া বিধ্বংসী বানত কমেও ১৩ টা জলবিদ্যুৎ প্রকল্পও বিধ্বস্ত হয়। বানৰ পানীয়ে কঢ়িয়াই অনা বোকাই এই জলবিদ্যুৎ প্রকল্পসমূহৰ সুৰংগসমূহ পুতি পেলায়।
ফলত কৰ্মৰত অৱস্থাতে এই সুৰংগসমূহৰ মাজত ছয় শতাধিক জলবিদ্যুৎ প্রকল্পৰ কৰ্মী আবদ্ধ হৈ আছে। সম্প্রতি দেশী-বিদেশী বিশেষজ্ঞৰ দলে এই আবদ্ধ কর্মীসকলক উদ্ধাৰৰ চেষ্টা অব্যাহত ৰাখিছে। উদ্ধাৰ কাৰ্যত নিয়োজিত অভিযন্তাসকলে সুৰংগৰ ভিতৰলৈ বায়ু প্ৰৱাহিত কৰি সুৰংগৰ ভিতৰত প্ৰৱেশৰ পথ সৃষ্টিৰ চেষ্টা কৰি আছে।
এই কার্যত অভিযন্তাসকল সফল হৈছে যদিও ভিতৰত প্ৰৱেশ কৰি উদ্ধাৰকাৰীয়ে কোনো লোকক প্ৰত্যক্ষ কৰা নাই। আনহাতে জলপ্ৰলয়ৰ ফলত সুৰংগত আবদ্ধ হৈ পৰা জলবিদ্যুৎ প্ৰকল্পৰ কৰ্মচাৰীসকলৰ অন্যতম অউচ ভাণ্ডাৰী নামৰ ৩৩ বছৰীয়া অভিযন্তাজনক পত্নী অনুশিলা ভাণ্ডাৰীয়ে কয়, ‘মোৰ স্বামী ঘৰলৈ ঘূৰি আহিব বুলি আমি আশা কৰি আছো।’
একেদৰে একে আশা প্রকাশ কৰে সীতা পাণ্ডে নামৰ মহিলাগৰাকীয়ে। তেওঁৰ স্বামীয়েও এই বোকাৰে পুতি পেলোৱা সুৰংগত আবদ্ধ হৈ আছে। মহিলাগৰাকীয়ে কয়, ‘মই এতিয়াও ৫০ শতাংশ আশাবাদী যে মোৰ স্বামী জীৱিত হৈ আছে। কাৰণ সুৰংগৰ ভিতৰত অক্সিজেন যোগানৰ ব্যৱস্থা আছে।’
উল্লেখ্য যে ছয় শতাধিক জলবিদ্যুৎ প্ৰকল্পৰ কৰ্মচাৰী আবদ্ধ হৈ থকা এই সুৰংগসমূহত বহু সংখ্যক ভাৰতীয় বিশেষজ্ঞও উদ্ধাৰ অভিযান অব্যাহত ৰাখিছে। কালি উদ্ধাৰকাৰী বাহিনীৰ এটা দল এটা বিধ্বস্ত জলবিদ্যুৎ প্রকল্পৰ থলীতো প্ৰৱেশ কৰিবলৈ সক্ষম হয়।
সাহায্য সামগ্ৰীৰ নাটনি: পোৱা নাই বহু বানপীড়িতই
ভাৰতকে ধৰি বিশ্বৰ বিভিন্ন দেশ তথা আন্তর্জাতিক সংস্থাই জলপ্রলয় বিধ্বস্ত নেপাললৈ বিপুল পৰিমাণত সাহায্য সামগ্ৰী প্ৰেৰণ কৰিছে যদিও দেশখনৰ বহু স্থানৰ বানপীড়িতই কোনো সাহায্য সামগ্রী লাভ কৰা নাই। স্বয়ং নেপাল চৰকাৰৰ দুর্যোগ উপশম কর্তৃপক্ষই এই কথা প্ৰকাশ কৰিছে। দুর্যোগ উপশম কর্তৃপক্ষই প্ৰকাশ কৰা অনুসৰি এই বানত বিধ্বস্ত দুই জিলা ৰাসূয়া আৰু নোৱাকট জিলাৰ বন্যাক্রান্তসকলে সাহায্য সামগ্রী লাভ কৰা নাই। ইয়াৰ কাৰণ হৈছে সাহায্য সামগ্ৰীৰ নাটনি।
এই সম্পর্কত দুর্যোগ উপশম কর্তৃপক্ষই আৰু কয়, ‘ৰাসূয়াৰ উত্তৰ গয়া গ্রামীণ পৌৰ নিকায়ৰ অধীনৰ বানাক্ৰান্ত ৰাইজৰ বাবে অস্থায়ী আশ্রয়স্থল নিৰ্মাণৰ সামগ্রী, চাউল, মচুৰ দাইল আদিৰ অভাৱ ঘটিছে। একে অৱস্থা নুৱাকটৰ তাৰকেশ্বৰ গ্ৰামীণ পৌৰ নিকায়ৰ অধীনৰ অঞ্চলসমূহতো। এই অঞ্চলসমূহত কোনো সাহায্য সামগ্রী উপলব্ধ হোৱা নাই।’
ফলত এই অঞ্চলসমূহৰ বহু লোকে অনাহাৰে অনিদ্ৰাৰে মুকলি আকাশৰ তলত বিগত এসপ্তাহ ধৰি সময় অতিবাহিত কৰিবলগীয়া হৈছে। চিতুৱান জিলাত প্ৰশাসনৰ উদ্যোগত তিনিশৰ শেষকৃত্য নেপালৰ শেহতীয়া জলপ্রলয়ত বিধ্বস্ত হোৱা চাৰি জিলাৰ অন্যতম চিতুৱানত হাতেসজা সমাধিক্ষেত্রত বিগত কিছুদিন ধৰি নিতৌ বানত মৃত্যু হোৱা বহু লোকৰ শেষকৃত্য সম্পন্ন কৰা হৈছে। আজি বাতৰি লিখা পৰলৈকে এই সমাধিক্ষেত্রত কমেও তিনিশ লোকক দাহ কৰা হৈছে। এই সমাধিক্ষেত্র চিতুৱানৰ নৈৰ পাৰত অৱস্থিত।
নৈৰ পানীয়ে উটুৱাই অনা মৃতদেহসমূহ এই সমাধিস্থলত দাহ কৰা হৈছে। ফলত ডাঠ ধোঁৱাই আকাশমার্গ ছানি ধৰিছে। চৰকাৰী বাহিনীয়ে পিপিই কিট আৰু মাস্ক পৰিধান কৰি এই দুৰ্ভগীয়াসকলৰ দাহ কাৰ্যত অংশ লৈছে। এই সম্পর্কত জিলাখনৰ মুৰব্বী বিষয়া গণেশ আৰিয়ালে সংবাদ মাধ্যমক জনায় যে ডিএনএ পৰীক্ষাৰ জৰিয়তে এই মৃতদেহসমূহ চিনাক্ত কৰা হ’ব। কাৰণ চিনাক্ত নকৰাকৈয়ে মৃতদেহ একেলগে দাহ কৰি থকা হৈছে। এই সম্পর্কত বিষয়াজনে লগতে কয়, ‘শ শ মৃতদেহ ৰাখিব পৰাকৈ আমাৰ ইয়াত ফ্রীজাৰ নাই। গতিকে আমি অস্থায়ী সমাধিক্ষেত্রত মৃতদেহ দাহ কৰিবলগীয়া হৈছে। এনে অৱস্থাত আমি হতচকিতও হৈছো। পৰৱৰ্তী সময়ত ডিএনএ পৰীক্ষাৰ জৰিয়তে মৃতদেহ চিনাক্ত কৰা হ’ব।’
